Gradaim an Aontais maidir le táirgeadh orgánach 2026: iarratas a dhéanamh anois!

Tá an tréimhse iarratais do Ghradaim Orgánacha an Aontais 2026 oscailte go hoifigiúil agus mairfidh sí go dtí an 26 Aibreán 2026. Aithníonn na gradaim, arna n-eagrú i gcomhpháirt ag Coiste Eorpach na Réigiún (CnaR), an Coimisiún Eorpach, Coiste Eacnamaíoch agus Sóisialta na hEorpa, COPA-COGECA, agus IFOAM Organics Europe, tionscnaimh den scoth a chuireann le fás agus rath an táirgthe orgánaigh agus an tomhaltais orgánaigh. Déanann na gradaim ceiliúradh ar shármhaitheas, nuálaíocht, inbhuanaitheacht agus tionchar ar fud an tslabhra luacha orgánaigh. 

Tá sé chatagóir agus seacht ngradam ag Gradaim Orgánacha an Aontais, lena n-áirítear dhá dhuais speisialta arna mbronnadh ag CnaR: an réigiún orgánach is fearr nó an bithcheantar agus an chathair orgánach is fearr. Is féidir iarratais ar na catagóirí sin a chur isteach go dtí an 26 Aibreán 2026, agus nochtfar na buaiteoirí ar Lá Orgánach an Aontais, an 23 Meán Fómhair 2026. 

Trí na gradaim sin, leanann CnaR den fheirmeoireacht orgánach inbhuanaithe a chur chun cinn trí mholtaí reachtacha a mholadh sa tuairim uaidh maidir le plean gníomhaíochta an Aontais don fheirmeoireacht orgánach. Ina theannta sin, i gcomhpháirtíocht leis an gCoimisiún Eorpach, tá CnaR tiomanta do dhea-chleachtais agus tionscadail cheannródaíocha arna bhforbairt ag pobail áitiúla ar fud an Aontais a thaispeáint agus tacú leo. 

Luaigh: 

Kirstine Helene BILLE (DA/Na Glasaigh), ionadaí ó CnaR i ngiúiré na nGradam Orgánach: “Moltar d’ionadaithe tofa áitiúla iarratas a dhéanamh ar Ghradaim Orgánacha na hEorpa chun a dtiomantas polaitiúil don fheirmeoireacht orgánach agus do chórais bhia inbhuanaithe a chur i láthair. Is deis ar leith iad na Gradaim chun aitheantas Eorpach a fháil do bheartais a thacaíonn le bia sláintiúil, le cosaint an chomhshaoil agus le geilleagair áitiúla athléimneacha.”

Cúlra: 

• Féach na foirmeacha iarratais tiomnaithe ar líne . 

• Tá ról lárnach ag na húdaráis áitiúla agus réigiúnacha maidir le táirgeadh orgánach a fhorbairt ina réigiúin. Tá roinnt luamhán ann ar féidir leo a úsáid go réamhtheachtach, amhail beartas talún lena gcuirtear bunú feirmeacha nua chun cinn agus lena spreagtar feirmeoirí chun aistriú chuig an bhfeirmeoireacht orgánach, agus go hiartheachtach, trí mhargaí áitiúla a chruthú agus trína chinntiú go mbeidh asraon dá dtáirgí ag na daoine sin a ghlacann leis an bhfeirmeoireacht orgánach. Spreagfaidh na Gradaim Orgánacha don réigiún agus don chathair orgánach is fearr iad chun níos mó a dhéanamh d'fhorbairt na hearnála seo. 

• In 2025, ba iad réigiún Chontae Võru san Eastóin agus cathair Valpaços, Alto Tâmega, sa Phortaingéil, buaiteoirí Ghradaim Orgánacha an Aontais a chuir CnaR i láthair.