Aktar nisa fil-politika

Dwar l-inizjattiva

Il-Kumitat Ewropew tar-Reġjuni (KtR) jimpenja ruħu biex jippromovi inizjattivi li jsaħħu l-parteċipazzjoni politika tan-nisa, u jirrikonoxxi li l-awtoritajiet lokali u reġjonali huma kruċjali fit-trawwim tal-ugwaljanza bejn il-ġeneri u rappreżentanza politika ugwali, inkluż permezz tal-assemblej politiċi tagħhom u l-kontroll fuq is-servizzi pubbliċi u n-nefqa lokali.

Permezz tal-inizjattiva “Aktar nisa fil-politika”, il-KtR huwa minn ta’ quddiem biex jieħu azzjoni għal bilanċ aħjar bejn il-ġeneri fil-politika fil-livelli kollha tal-gvern, u għall-iskambju tal-aħjar prattika għall-ksib ta’ dan il-bilanċ. 

*24 ta’ Frar 2026

Bħala l-assemblea tal-UE tar-rappreżentanti lokali u reġjonali minn kull wieħed mis-27 Stat Membru, il-Kumitat Ewropew tar-Reġjuni jimpenja ruħu bis-sħiħ biex jippromovi l-ugwaljanza bejn il-ġeneri u l-parteċipazzjoni politika tan-nisa fl-aspetti kollha tal-funzjonament tiegħu. Dan l-impenn huwa rikonoxxut u ppreżentat b’mod trasparenti fil-Pjan ta’ Azzjoni dwar l-Ugwaljanza bejn il-Ġeneri, li ġie adottat fl-2023. Dan il-Pjan jippromovi dawn il-valuri fl-attivitajiet kollha tal-KtR taħt is-superviżjoni ta’ Carina Ohlsson (SE/PSE), ir-relatur tal-Bureau.

Apparti li jippromovi l-ugwaljanza bejn il-ġeneri fil-ħidma ewlenija tiegħu, il-KtR jippromovi wkoll dawn il-valuri fil-ħidma kollha li jwettaq biex jintlaħqu n-nies. Fil-fatt, in-networks tal-Politiċi Eletti Żgħażagħ u tal-Kunsilliera Lokali tal-UE huma ġestiti f’konformità mal-Pjan ta’ Azzjoni.

Is-Segretarjat Ġenerali tal-KtR għandu wkoll Strateġija apposta għall-Opportunitajiet Indaqs għall-persunal tiegħu.

L-ugwaljanza bejn il-ġeneri fl-UE

L-ugwaljanza bejn il-ġeneri hija valur u objettiv ewlieni tal-Unjoni Ewropea. Dan huwa ddikjarat b’mod ċar fit-Trattat ta’ Amsterdam u fit-Trattat dwar il-Funzjonament tal-Unjoni Ewropea, kif ukoll fil-Karta tad-Drittijiet Fundamentali tal-UE u fil-Pilastru Ewropew tad-Drittijiet Soċjali.

L-Istrateġija tal-UE dwar l-Ugwaljanza bejn il-Ġeneri 2020-2025, approvata mill-KtR fl-Opinjoni tiegħu, tippreżenta t-triq ’il quddiem tal-UE u l-azzjonijiet immirati tagħha biex issaħħaħ l-ugwaljanza bejn il-ġeneri fit-territorji tagħha. Il-Kummissjoni Ewropea tippubblika wkoll rapport dwar is-sitwazzjoni attwali tal-ugwaljanza bejn il-ġeneri fl-UE. Biex jappoġġja din il-ħidma, l-Istitut Ewropew għall-Ugwaljanza bejn is-Sessi (EIGE) jiġbor data u jiġġenera l-indiċi tal-ugwaljanza bejn il-ġeneri tal-UE. 

Il-Parlament Ewropew waqqaf il-Kumitat għad-Drittijiet tan-Nisa u l-Ugwaljanza bejn il-Ġeneri bil-għan li jippromovi l-ugwaljanza bejn il-ġeneri, u, fl-2020, beda jorganizza Ġimgħa Ewropea annwali għall-Ugwaljanza bejn il-Ġeneri. Il-KtR jappoġġja l-Ġimgħa għall-Ugwaljanza bejn il-Ġeneri mill-perspettiva tal-awtoritajiet lokali u reġjonali.

Minkejja l-inizjattivi b’saħħithom fil-livell tal-UE, in-nisa għadhom sottorappreżentati ferm fil-proċess deċiżjonali lokali: skont l-EIGE, il-proporzjon medju ta’ nisa eletti fil-kunsilli lokali u muniċipali huwa ta’ madwar 34 %, u 32 % fl-assemblej reġjonali. Għalkemm kien hemm titjib sinifikanti fl-Indiċi tal-Ugwaljanza bejn il-Ġeneri tal-2024, meta wieħed iqis li s-sehem tan-nisa fl-assemblej reġjonali u lokali żdied minn 30 % għal 31 %, il-KtR għandu l-għan li jkompli jsaħħaħ l-ugwaljanza bejn il-ġeneri f’dan il-livell.

#Power2Her