Impjiegi

Iltaqa’ man-nies tal-KtR

Il-persunal tal-KtR jaħdem bla heda biex isemma’ l-vuċi tar-reġjuni u l-bliet Ewropej. X’hemm aqwa milli ssir taf direttament mingħand il-kollegi futuri tiegħek x’tinvolvi ġurnata xogħol fi ħdan il-KtR?

Tul il-perkors professjonali tiegħek, dejjem tista’ sserraħ rasek li ssib l-appoġġ ta’ komunità ta’ esperti żgħira iżda multikulturali, dinamika u diversa. Bis-saħħa ta’ approċċ trasversali għall-ksib tal-objettivi, ikollok l-opportunità li taqsam l-għarfien tiegħek ma’ kollegi li l-isfond rikk tagħhom jirrifletti d-diversità kollha u l-potenzjal vast tal-UE.

Bħala impjegatur, il-KtR ma jiddiskriminax abbażi tas-sess, ir-razza, il-kulur, l-oriġini etnika jew soċjali, il-karatteristiċi ġenetiċi, il-lingwa, ir-reliġjon jew it-twemmin, l-opinjoni politika jew xi opinjoni oħra, l-appartenenza għal minoranza nazzjonali, il-proprjetà, it-twelid, id-diżabbiltà, l-età, jew l-orjentazzjoni sesswali, Inti tingħata opportunità indaqs biex turi l-kapaċitajiet tiegħek matul il-proċeduri tal-għażla.

Il-Kumitat Ewropew tar-Reġjuni jimpenja ruħu li jippromovi d-diversità, l-ekwità u l-inklużjoni. Nistinkaw biex nagħmlu l-avviżi ta’ postijiet vakanti u s-sejħiet għal espressjoni ta’ interess tagħna faċli biex jinqraw u aċċessibbli għal kulħadd, skont il-linji gwida dwar l-aċċessibbiltà tal-Uffiċċju tal-Pubblikazzjonijiet tal-Unjoni Ewropea.

Għandna wkoll l-għan li nipprovdu kundizzjonijiet raġonevoli għall-persuni b’diżabilità kemm matul il-proċess ta’ reklutaġġ kif ukoll fuq il-post tax-xogħol. Jekk għandek xi mistoqsijiet jew teħtieġ aġġustamenti speċjali biex tipparteċipa bis-sħiħ fil-proċess tal-għażla tagħna, ikkuntattjana fuq recruitment@cor.europa.eu.

Il-KtR jibbilanċja l-ħtieġa għal użu effiċjenti tar-riżorsi tagħna mal-ħtieġa li jiġu implimentati politiki moderni dwar ir-riżorsi umani li jippermettu lill-persunal tagħna jirrikonċilja l-ħajja professjonali u dik personali.

Aħna noffru kundizzjonijiet tax-xogħol ta’ kwalità għolja biex niżguraw ambjent tax-xogħol sod u tajjeb għas-saħħa.

Strateġija Integrata għall-Ġestjoni tat-Talenti

Ma nistgħux noffrulek “impjieg għal għomrok” però nistgħu noffru “ħajja b’impjiegi differenti”. Permezz tal-Istrateġija Integrata tagħna għall-Ġestjoni tat-Talenti, nagħtuk l-opportunità li titgħallem u tikber.

Arranġamenti tax-xogħol flessibbli, liv u vaganzi

Ħinijiet tax-xogħol flessibbli, xogħol part-time u telexogħol

24 jum ta’ vaganza (liv annwali) u btajjel pubbliċi. Soġġett għal kundizzjonijiet, jingħataw ukoll jiem addizzjonali għall-ivvjaġġar lejn il-post tal-oriġini.

Appoġġ għall-indukrar tat-tfal

Sabiex jitrawwem il-benesseri fost il-persunal, is-servizz soċjali jipprovdi sensiela ta’ servizzi lill-persunal u lill-familji tagħhom (faċilitajiet għall-indukrar tat-tfal – stabbilimenti ta’ akkoljenza għat-tfal matul il-ġurnata, skejjel Ewropej, servizzi ta’ indukrar tat-tfal wara l-ħinijiet tal-iskola u matul il-vaganzi, eċċ.)

Servizz għall-familji

Uffiċċju ta’ merħba, servizz soċjali, korsijiet tal-lingwa għas-sieħeb/sieħba, eċċ.

Politika dwar is-saħħa u l-benesseri

Servizz mediku, programm għas-sigurtà u s-saħħa fuq il-post tax-xogħol, politika dwar in-nutrizzjoni, id-disinn ergonomiku tal-uffiċċju, eċċ.

Avvenimenti soċjali u kulturali

Inħobbu nissoċjalizzaw! Ikollok ħafna opportunitajiet biex tiltaqa’ ma nies oħra. Norganizzaw ukoll avvenimenti soċjali oħra – festini tal-persunal u avvenimenti li int u l-familja tiegħek tkunu mistiedna tattendu, avvenimenti kulturali, wirjiet, konferenzi dwar suġġetti interessanti, eċċ.

Il-persunal tagħna huwa magħmul prinċipalment minn uffiċjali reklutati minn fuq il-listi ta’ riżerva ta’ kompetizzjonijiet ġenerali organizzati mill-Uffiċċju Ewropew għas-Selezzjoni tal-Persunal. Madankollu, f’ċerti ċirkostanzi, il-Kumitat Ewropew tar-Reġjuni jista’ wkoll jimpjega persunal temporanju jew kuntrattwali.

Il-kundizzjonijiet tax-xogħol u kuntrattwali tagħna huma bbażati fuq ir-Regolamenti tal-Persunal u l-Kundizzjonijiet tal-Impjieg ta’ Aġenti Oħra tal-Unjoni Ewropea.

Il-proċess ta’ applikazzjoni għal pożizzjoni fil-KtR jiddependi mit-tip ta’ kuntratt. Madankollu, sabiex tiġi rreklutat bħala uffiċjal minn istituzzjoni tal-UE, trid issegwi proċedura ta’ kompetizzjoni li tista’ tinkludi diversi eżamijiet orali u bil-miktub.

Sir af iktar

Żur is-sit tal-Karrieri mal-UE biex tfittex fil-bażi tad-data tal-opportunitajiet ta’ impjieg disponibbli għal pożizzjonijiet permanenti u temporanji, inklużi postijiet ta’ aġenti kuntrattwali, traineeships u sekondar fl-istituzzjonijiet u l-aġenziji tal-UE.

#EUcareers

#ShapingEuropeTogether