Ir-reġjuni u l-bliet iridu li l-Att tal-UE dwar l-Intelliġenza Artifiċjali jippromovi l-aċċess tan-negozji ġodda u tal-SMEs għas-supercomputing u l-finanzjament aġli għall-użu etiku

It-tisħiħ tat-tmexxija tal-Ewropa fl-intelliġenza artifiċjali (IA) responsabbli jirrikjedi attenzjoni speċifika għar-rwol tan-negozji ġodda u l-SMEs u l-mobilizzazzjoni tal-awtoritajiet lokali u reġjonali fil-bini tal-fiduċja pubblika lejn applikazzjonijiet ġodda.

Matul is-sessjoni plenarja tal-Kumitat Ewropew tar-Reġjuni (KtR) tad-9 ta’ Ottubru, il-mexxejja reġjonali u lokali adottaw Opinjoni abbozzata minnEmil Boc (RO/PPE), sindku ta’ Cluj-Napoca, li tenfasizza r-rilevanza tal-leġiżlazzjonireċenti tal-UE dwarl-IA, li tagħmel lill-Unjoni l-ewwel entità ewlenija li tilleġiżla biex tiżgura l-użu etiku u sostenibbli tal-IA. Madankollu, il-membri tal-KtR appellaw għal miżuri addizzjonali u applikazzjoni flessibbli tal-Att dwar l-IA biex l-Unjoni ssir mexxejja dinjija fl-iżvilupp tal-IA.

Il-membri tal-KtR enfasizzaw li, biex tingħata spinta lill-innovazzjoni fuq skala kbira fl-UE, huwa kruċjali li jiġi ffaċilitat l-aċċess għall-infrastruttura tas-supercomputing għan-negozji ġodda u l-SMEs Ewropej. It-tnaqqis tal-burokrazija, iż-żieda fit-trasparenza, u l-għoti ta’ aċċess aktar flessibbli se jagħtu lil dawn il-kumpaniji l-kundizzjonijiet meħtieġa biex jikkompetu globalment fl-iżvilupp tal-IA.

Il-finanzjament għan-negozji ġodda fis-settur tal-IA għandu jkun rapidu, jinċentiva l-investiment inizjali, u joffri appoġġ wara t-tnedija, filwaqt li jaċċetta r-riskju ta’ falliment bħala parti mis-suċċess, irrakkomandaw il-mexxejja lokali u reġjonali. Huma qalu li l-adattament u l-estensjoni ta’ programmi bħall-Widien tal-Innovazzjoni Reġjonali jew iċ-Ċentri tal-Innovazzjoni Diġitali, jistgħu jsaħħu lill-kumpaniji Ewropej biex ikunu kompetittivi f’suq globali. 

Ir-reġjuni u l-bliet argumentaw li l-awtoritajiet lokali huma kruċjali għall-iżvilupp ta’ ekosistema tal-IA innovattiva u affidabbli bbażata fil-livell lokali fl-Unjoni Ewropea. Barra minn hekk, biex jippromwovu l-governanza f’diversi livelli, huma pproponew l-inklużjoni ta’ rappreżentanti lokali fil-bord tal-ImpriżaKonġunta Ewropea għall-Computing ta’ Prestazzjoni Għolja(Euro HPC), inizjattiva konġunta bejn l-UE, il-pajjiżi Ewropej u s-sħab privati. 

Il-Kumitat appella għall-iżvilupp ta’ proġetti interreġjonali tal-IA li jgħaqqdu r-riżorsi transfruntiera bl-appoġġ ta’ mekkaniżmi ta’ finanzjament tal-UE bħall-Fond Ewropew għall-Iżvilupp Reġjonali. Huwa enfasizza l-ħolqien ta’ ċentri reġjonali ta’ talent, fi sħubija mal-universitajiet, biex jinżammu u jiġu attirati speċjalisti tal-IA. 

Fl-aħħar nett, il-membri tal-KtR enfasizzaw li f’ambjent teknoloġiku li qed jinbidel b’mod kostanti, l-iżvilupp tal-IA fl-UE jrid jiżgura t-trasparenza, l-obbligu ta’ rendikont, l-ekwità u jkun allinjat mal-valuri etiċi Ewropej.

Kwotazzjoni: 

Ir-relatur Emil Boc (RO/PPE), Sindku tal-Muniċipalità ta’ Cluj-Napoca: “L-IAqed titjieb b’rata inkredibbilment mgħaġġla u għandha l-potenzjal li tbiddel ħajjitna fl-oqsma tal-edukazzjoni dwar is-saħħa u ħafna oħrajn iżda ġġorr ukoll riskji potenzjali u theddid eżistenzjali. L-IA ssawwar l-industriji, tixpruna l-innovazzjoni u tbiddel il-mod kif naħsbu dwar il-futur. Jeħtieġ li nċaqalqu l-enfasi tagħna fuq it-tfassil tal-politika milli nippruvaw nillimitawha biex nitgħallmu kif nibbenefikaw minnha. L-UE għandha l-opportunità unika li tnaqqas il-kost tal-iżvilupp tal-IA billi tagħmel in-network uniku tagħha ta’ kompjuters ta’ prestazzjoni għolja disponibbli għal pubbliku usa’.  Irridu noħolqu l-kundizzjonijiet biex l-IA taqdi lill-umanità kollha u mhux biss lill-ftit privileġġjati. L-AI mhix biss dwar il-magni tal-bini, hija dwar it-tisħiħ tal-umanità u t-titjib tal-ħajja. Il-futur jiddependi fuq kif nersqu lejh.”

 Informazzjoni ta' sfond:

Approċċ Ewropew għall-Intelliġenza Artifiċjali – Att dwar l-Intelliġenza Artifiċjali (Opinjoni tal-KtR, 2021).