Athléimneacht i bhfócas ag cruinniú de bhiúró CnaR sa Chipir

Tháinig ceannaireacht Choiste Eorpach na Réigiún (CnaR) le chéile sa Chipir an 10 Feabhra le haghaidh cruinniú a bhí dírithe ar conas borradh a chur faoi athléimneacht oileáin, phobail chósta, chathracha agus réigiúin an Aontais.

Léirítear sa phlé, inar breithníodh ullmhacht le haghaidh géarchéimeanna, an bhéim a leag Uachtaránacht na Cipire ar Chomhairle an Aontais Eorpaigh ar neamhspleáchas, slándáil agus cuimsitheacht an Aontais a fhorbairt. Thug Constantinos Ioannou, Aire Gnóthaí Baile Phoblacht na Cipire, agus Andreas Vyras, Uachtarán Aontas Bhardais na Cipire, aitheasc do bhiúró CnaR.

Sa chéad díospóireacht, maidir leis an nuálaíocht dhigiteach agus taighde le haghaidh cathracha agus réigiúin ullmhaithe athléimneacha, díríodh ar cheapadh beartas sonraíbhunaithe chun é a chur ar a gcumas do riaracháin bhardasacha agus réigiúnacha teacht roimh éigeandálaí poiblí, faireachán a dhéanamh orthu, iad a bhainistiú agus iad a leigheas. Bhí an plé dírithe ar shamhlacha ionsamhlúcháin lena gcuirtear macasamhla fíorúla de chórais bhardasacha agus réigiúnacha ar fáil – ar a dtugtar ‘cúplaí digiteacha’ – agus go háirithe an acmhainneacht a bhaineann le ‘huirlis measúnaithe aibíochta digití’ arna comhdhearadh ag CnaR, LordIMAS, arb é is aidhm di cabhrú le rialtais áitiúla, chathrach agus réigiúnacha tuiscint a fháil ar an áit a bhfuil siad ina n-aistear aistrithe dhigitigh.

Sa dara díospóireacht – maidir le ‘nuálaíocht ghorm’ – rinneadh breithniú ar an gcleachtas agus ar na nuálaíochtaí atá ann cheana a theastaíonn ó oileáin agus ó réigiúin chósta chun ullmhú d’imeachtaí foircneacha, chun oiriúnú don athrú aeráide, chun pobail áitiúla agus an earnáil phríobháideach a rannpháirtiú, agus chun comhar trasteorann a bhainistiú. I mbliana, molfaidh an Coimisiún Eorpach Straitéis Forbartha agus Athléimneachta na gComhphobal Cósta, lena gcuirfear leis an gComhshocrú Eorpach maidir leis na hAigéin a glacadh in 2025.

Tionóladh cruinniú seachtrach bhiúró Choiste Eorpach na Réigiún sa Niocóis ar chuireadh ó Eleni Loucaidou (CY/PPE), ceann thoscaireacht na Cipire in CnaR agus comhalta de chomhairle bhardasach Lefkosia.

Tá trí tharchur shonracha leagtha amach ag Uachtaránacht na Cipire do CnaR chun cabhrú leis an Uachtaránacht ina cuid oibre: folláine agus sochair leanaí a fheabhsú; timpeallacht dhigiteach níos sábháilte agus níos cuimsithí a chruthú do leanaí agus do dhaoine óga; agus béim a leagan ar chomhar díláraithe i gcabhair um fhorbairt.

Mar fhreagairt air sin, tá trí thuairim á ndréachtú ag CnaR faoi láthair, atá le glacadh le linn na chéad trí sheisiún iomlánacha eile. I dtuairim atá le glacadh i mí an Mhárta, ‘Folláine agus Sochair Leanaí - córais sochair leanaí a mhapáil ar fud Bhallstáit an Aontais’, cuirfidh an rapóirtéir Fauzaya Talhaoui (BE/PSE) léargais áitiúla agus réigiúnacha i láthair maidir le conas an Ráthaíocht Eorpach do Leanaí a threisiú, straitéisí frithbhochtaineachta a chur chun cinn, agus tacú le cur chun feidhme chearta dlíthiúla agus sóisialta na hEorpa atá beartaithe chun aghaidh a thabhairt ar riachtanais luath-óige. I mí na Bealtaine, tá CnaR le vóta a chaitheamh ar thuairim maidir le ‘Cosaint na hÓige agus na Mionaoiseach sa tSféar Digiteach’ – leis an rapóirtéir Heike Raab (DE/PSE) – lena dtugtar aghaidh ar shaincheisteanna amhail dearadh agus forfheidhmiú beart sábháilteachta ar líne, caighdeáin atá bunaithe ar chearta, agus comhordú idir na húdaráis náisiúnta. An 1-2 Iúil, leagfaidh CnaR amach conas is féidir leis an gcomhar leis na húdaráis áitiúla agus réigiúnacha tacú le gníomhaíochtaí seachtracha an Aontais, tríd an gcobhsaíocht agus an athléimneacht a neartú. Is é Magali Althounian (FR/RE), cathaoirleach an Choimisiúin um Shaoránacht, Rialachas, Gnóthaí Institiúideacha agus Seachtracha (CIVEX) in CnaR, an rapóirtéir.

Tagann biúró CnaR le chéile lasmuigh den Bhruiséil dhá uair sa bhliain, sa tír ag a bhfuil Uachtaránacht rothlach Chomhairle an Aontais Eorpaigh de ghnáth.

Tuilleadh eolais: 

• Doiciméid an chruinnithe: Clár oibre agus doiciméid chúlra.
• Ráitis ón gcruinniú: An Eoraip trí shatailít (12h CET).
• Féach ar an imeacht arís (le nasc chuig an sruthú gréasáin).