Éilíonn ullmhacht cosanta, iomaíochas tionsclaíoch agus aeráidneodracht réigiúin chumhachtaithe a bhfuil acmhainní maithe acu

Tháinig ionadaithe ó réigiúin agus ó chathracha an Aontais le chéile in Klagenfurt chun nuálaíocht réigiúnach níos láidre agus ullmhacht fheabhsaithe cosanta a phlé

Tháinig Coimisiún um Beartas Eacnamaíoch Choiste Eorpach na Réigiún (CnaR) lechéilein Klagenfurt na hOstaire an 19 agus an 20 Meitheamh chun infheistíocht níos láidre ón Aontas a spreagadh i réigiúin, chun spriocanna nuálaíochta agus inbhuanaitheachta a ailíniú ar bhealach níos fearr, agus chun comhar il-leibhéil a fheabhsú ar mhaithe le hEoraip athléimneach shlán.  

Ag an gcruinniú agus ag an gcomhdháil dhá lá, a d’óstáil comhalta CnaR agus Gobharnóir Carinthia, Peter Kaiser, tugadh le chéile ceannairí réigiúnacha, lucht ceaptha beartas, acadóirí agus saineolaithe nuálaíochta chun féachaint ar an gcaoi ar féidir le réigiúin an Aontais an t-aistriú i dtreo todhchaí ghlas, chuimsitheach agus athléimneach ó thaobh an gheilleagair de a stiúradh. Leag na ceannairí áitiúla agus réigiúnacha béim ar an gcaoi a bhfuil straitéisí áitiúla atá bunaithe ar an gcuimsiú sóisialta, ar an tsláine chomhshaoil agus ar an athléimneacht eacnamaíoch éifeachtach cheana féin – go háirithe in Carinthia, a chuir a shamhail chomhtháite forbartha i láthair mar theimpléad le haghaidh macasamhlú Eorpach níos leithne. D’éirigh leis an réigiún beartais comhtháthaithe shóisialta a chomhcheangal le hardtaighde teicneolaíoch agus comhar tionsclaíoch.  

D’éiligh na rannpháirtithe go ndéanfaí uirlisí cistiúcháin an Aontais – go háirithe iad siúd a bhaineann leis an inbhuanaitheacht, leis an iomaíochas agus leis an gcosaint – a athdhearadh chun riachtanais, acmhainneachtaí agus róil straitéiseacha réigiúnacha a léiriú ar bhealach níos fearr. Chuir siad i bhfios go láidir go mbeidh baint amach spriocanna na hEorpa maidir le haeráidneodracht, iomaíochas tionsclaíoch agus ullmhacht cosanta ag brath ar réigiúin chumhachtaithe a bhfuil acmhainní maithe acu. D’iarr siad freisin go dtabharfaí tacaíocht do bhraislí nuálaíochta réigiúnacha, lena n-áirítear iad siúd i réigiúin teorann agus i réigiúin atá níos laige ó thaobh struchtúir de, agus leag siad béim ar an ngá atá leis an bhforbairt eacnamaíoch a ailíniú le Spriocanna Forbartha Inbhuanaithe na Náisiún Aontaithe.  

Le linn an chruinnithe, ghlac comhaltaí ECON dréacht-tuairim freisin maidir le ‘Ullmhacht Eorpach um Chosaint 2030’, ina leagtar béim ar a thábhachtaí atá sé réigiúin a chumhachtú chun rannchuidiú go díreach le slándáil, athléimneacht thionsclaíoch agus cobhsaíocht eacnamaíoch na hEorpa.  D’éiligh comhaltaí ECON tacaíocht bhreise ón Aontas trí thionscnamh an Aontais maidir le Gníomhaíocht Slándála don Eoraip (SAFE)chun tairbhe Bhallstáit an Aontais agus na hÚcráine ar an gcéad dul síos, chun ilroinnt sa mhargadh cosanta a laghdú go héifeachtach, áit ar cheart dhá Bhallstát de chuid an Aontais ar a laghad a bheith rannpháirteach i soláthairtí comhoibríocha. D’iarr siad go mbeadh rochtain chothrom agus ceanglais níos láidre ann maidir le hábhar an Aontais – agus chuir siad i bhfios go láidir nach mór 70 % ar a laghad de chomhpháirteanna de thionscnamh an Aontais a bheith i dtáirge de chuid an Aontais – rud a sháraíonn an ghnáththairseach 65 % a leag an Coimisiún agus an Chomhairle síos. I ndáil leis an méid sin, chuir comhaltaí ECON i bhfios go láidir gur cheart tionscnamh an Aontais a shainiú mar tháirgeadh ó Bhallstáit an Aontais agus ón Úcráin, agus gur cheart do thíortha sa Limistéar Eorpach Eacnamaíoch nó i gComhlachas Saorthrádála na hEorpa a bheith fós in ann páirt a ghlacadh i soláthairtí comhoibríocha SAFE. Agus iad ag tacú le buiséad uaillmhianach cosanta de chuid an Aontais, chuir siad i bhfios go láidir freisin nach mór comhtháthú agus cobhsaíocht a chosaint i réigiúin a bhfuil príomhacmhainneachtaí tionsclaíocha acu.  

Cuireadh deireadh leis an gcomhdháil le cuairteanna ar ionaid ladrann agus róbataice Pháirc Eolaíochta agus Teicneolaíochta Locha, agus ina dhiaidh sin tugadh cuairt ar ghléasra leathsheoltóra Infineon in Villach – saoráid a tháirgeann príomh-chomhpháirteanna do theicneolaíochtaí digiteacha agus is sampla í de nuálaíocht thionsclaíoch atá freagrach ó thaobh an chomhshaoil de san Aontas. 

Sleachta

Alberto Cirio (IT/PPE), Cathaoirleach Choimisiún ECON agus Uachtarán réigiún Piedmont: ‘Is deiseanna ollmhóra iad deiseanna na hIntleachta Saorga — sa chúram sláinte, sa cheartas, san iompar poiblí, i rannpháirtíocht na saoránach, agus i seirbhísí poiblí níos éifeachtúla. Ach tá dúshláin mhóra romhainn. Ní mór dúinn an bhearna dhigiteach a dhúnadh trí rochtain ar uirlisí digiteacha a áirithiú i ngach réimse, lena n-áirítear ceantair thuaithe, trí bhonneagair láidre IS agus trí Mhoil IS. Ní mór dúinn scileanna agus tallann a fhorbairt trí éiceachóras dinimiciúil de chuid an Aontais a chruthú lena gcuirfear oiliúint ar oifigigh agus ar bhainisteoirí chun IS a láimhseáil, le tacaíocht ó Phlean Gníomhaíochta an Choimisiúin um an Ilchríoch IS. Agus ní mór dúinn comhroinnt sonraí a chumasú agus príobháideachas úsáideoirí a chosaint ag an am céanna. Is iad sin dúshláin agus treoirphrionsabail na tuairime seo.’ 

Peter Kaiser (AT/PSE), Gobharnóir réigiún Carinthia: “Leis an gcomhdháil seo, táimid ag tabhairt an Eoraip go Carinthia - agus Carinthia níos gaire fós don Eoraip. Ní hamháin gur mór an onóir dúinn gur tugadh an deis dúinn coimisiún ECON a óstáil, ach is comhartha láidir é freisin do Carinthia mar réigiún atá dírithe go heacnamaíoch ar an todhchaí agus a bhfuil líonraí láidre Eorpacha aige.” 

Ricardo Rio (PT/PPE), Méara Braga agus rapóirtéir ar an tuairim maidir le hullmhacht cosanta: “Tá an ullmhacht, an chosaint agus an tslándáil fite fuaite ina chéile. Agus tá go leor le rá ag na réigiúin agus na cathracha maidir leis an todhchaí a mhúnlú i bhfianaise a gcóngaraí atá siad do shaoránaigh, don tionscal, don saol acadúil agus don chosaint shibhialta. Ciallaíonn infheistíocht i gcosaint braislí a chumasú ar bhealach níos fearr i dtreo idir-inoibritheacht níos fearr agus níos mó cobhsaíochta réigiúnaí. Leis an tuairim seo, cuireann CnaR príomh-mholtaí i láthair. Tá éifeachtaí iarmharta tionscail, lena n-áirítear dé-úsáid, le gníomhaithe níos lú agus a gcomhtháthú i mBonn Tionsclaíoch agus Teicneolaíoch na Cosanta Eorpaí ríthábhachtach. Iarraimid go mbeadh an soláthar comhoibríoch ina inneall don chomhar cosanta — ach go mbeadh dhá Bhallstát de chuid an Aontais ar a laghad rannpháirteach ann.” 

Le linn an chruinnithe freisin

Bhí an chéad mhalartú tuairimí ag comhaltaí ECON maidir leis na tuairimí seo a leanas: 

• ‘Plean Gníomhaíochta Ilchríochach IS’, le rapóirtéir Alberto Cirio (IT/PPE), Cathaoirleach choimisiún ECON agus Uachtarán réigiún Piedmont 

• ‘Plean Gníomhaíochta Eorpach maidir le Cruach agus Miotail’, leis an rapóirtéir Guillermo Peláez Álvarez (ES/PSE), Aire Airgeadais Réigiúnach agus Cistí Eorpacha Phrionsacht Asturias 

Tuilleadh eolais

• Féach ar an gcruinniú anseo. 

• Grianghraif ón ócáid. 

• An 19 Márta, thíolaic an Coimisiún an Páipéar Bán maidir le Cosaint na hEorpa – Ullmhacht 2030 agus mar chuid de Phlean/Ullmhacht ReArm na hEorpa 2030, pacáiste uaillmhianach cosanta lena gcuirtear luamháin airgeadais ar fáil do Bhallstáit an Aontais chun borradh infheistíochta i gcumais chosanta a spreagadh. Cé go bhfuil sé d’aidhm ag Plean/Ullmhacht ReArm na hEorpa 2030 cumais chosanta uile-Eorpacha a neartú le hacmhainní airgeadais, leagtar amach sa Pháipéar Bán cur chuige nua i leith na cosanta agus sainaithnítear riachtanais infheistíochta ann.    

Teagmháil

Theresa Sostmann
Teil: +32475999415 
Theresa.Sostmann@cor.europa.eu