Fáiltíonn na réigiúin agus na cathracha roimh an bPáipéar Bán maidir le Cosaint Eorpach

Chuir Uachtarán Choiste Eorpach na Réigiún, Kata Tüttő, agus rapóirtéir CnaR maidir le tionscal cosanta na hEorpa agus Uachtarán Murcia, Fernando Lopez Miras, fáilte roimh an bPáipéar Bán ar Chosaint, a d’fhoilsigh an Coimisiún Eorpach inniu. Leag siad béim ar an ról lárnach atá ag na húdaráis áitiúla agus réigiúnacha maidir le sábháilteacht agus athléimneacht na hEorpa chomh maith leis an méid a chuirtear ar fáil leis an mBeartas Comhtháthaithe chun slándáil a chur ar fáil do na saoránaigh uile, agus chuir siad in iúl go bhfuil acmhainní breise iomchuí ag teastáil chun acmhainneachtaí cosanta na hEorpa a threisiú.

Seo mar a labhair Kata Tüttő (HU/PSE), Uachtarán Choiste Eorpach na Réigiún: “Is díol sásaimh dom an Páipéar Bán ón gCoimisiún Eorpach maidir le Cosaint, ina n-aithnítear, mar is ceart, gur colún de shlándáil na hEorpa é an Beartas Comhtháthaithe cheana féin — i bhfad níos faide ná an chosaint mhíleata. Braitheann fíor-athléimneacht ar réigiúin láidre chomhtháite: go heacnamaíoch, go sóisialta, go comhshaoil agus go hinstitiúideach. Ní mór d’Eoraip láidir a bheith láidir ar an taobh amuigh agus ar an taobh istigh araon, rud a chinnteoidh nach bhféadfaidh comhtháthú críochach agus sóisialta na hEorpa a bheith thíos le slándáil na hEorpa. Tá sé ríthábhachtach anois acmhainní nua a chinntiú don chosaint agus don athléimneacht, seachas na cistí comhtháthaithe atá ann cheana a atreorú.’

Seo mar a labhair Fernando Lopez Miras (ES/PPE), Uachtarán Murcia agus rapóirtéir CnaR maidir leis an tuairim ‘Tionscal Cosanta Eorpach Láidir’: “Tá gá linn go léir chun an leibhéal ullmhachta agus freagartha ar dhúshláin slándála agus cosanta an Aontais a bhaint amach. Agus is féidir le réigiúin cabhrú leat. Faoinár n-inniúlachtaí agus ár gcumais, i ndlúthchomhar leis na Ballstáit agus leis an gCoimisiún Eorpach, is féidir leis na réigiúin rannchuidiú go fóinteach agus ní mór dóibh rannchuidiú go fóinteach, agus ár sciar den fhreagracht straitéiseach sin á ghlacadh againn: éiceachóras na cosanta a leathnú agus a neartú, oibriú le haghaidh scileanna chun freastal ar riachtanais an tionscail, speisialtóireacht chliste a chur chun cinn laistigh de shlabhraí luacha na hEorpa, agus feasacht a mhúscailt leis an tionscal agus leis na saoránaigh. Ní mór do na réigiúin a bheith rannpháirteach sna hiarrachtaí chun éiceachóras thionscal cosanta an Aontais a neartú i gcláir chosanta an Aontais a bheidh ann amach anseo.’

Teagmháil

Theresa Sostmann

Uimhir ghutháin: + 32475999415

Theresa.Sostmann@cor.europa.eu