Gradam an Réigiúin Fiontraíochta Eorpaigh: iarratais ar oscailt do chathracha agus do réigiúin a chuireann cruthú, nuálaíocht agus fás FBManna chun cinn

Is féidir le cathracha, réigiúin agus bardais na hEorpa ar mian leo a straitéis agus a dtaithí a thaispeáint, a roinnt agus a shaibhriú maidir le fás Fiontar Beag agus Meánmhéide (FBManna) a chur chun cinn trí rialáil chliste, éiceachórais láidre agus seirbhísí tacaíochta saincheaptha iarratas a dhéanamh anois ar eagrán 2027 de ghradam an Réigiúin Fiontraíochta Eorpaigh (RFE), arna eagrú ag Coiste Eorpach na Réigiún (CnaR) i gcomhpháirtíocht le AS GROW an Choimisiúin Eorpaigh.

Faoin téama uileghabhálach ‘Borradh a chur faoi spreagthaí áitiúla fáis d’iomaíochas an Aontais’, leagfar béim in RFE 2027 ar ghníomhaíochtaí áitiúla agus réigiúnacha atá dírithe ar rialáil chliste, éiceachórais láidre agus seirbhísí tacaíochta saincheaptha do FBManna a fhorbairt, agus ar an gcaoi sin iomaíochas agus athléimneacht fhadtéarmach a ngeilleagar áitiúil a mhéadú. Is féidir leis na húdaráis áitiúla agus réigiúnacha a straitéisí a chur isteach go dtí an 19 Márta 2026. 

Fógraíodh an glao ar iarratais do RFE 2027 le linn Thionól na FBManna i gCóbanhávan, an t-imeacht is suntasaí do FBManna san Eoraip, a d’eagraigh an Coimisiún Eorpach in éineacht le hUachtaránacht na Danmhairge ar Chomhairle an Aontais Eorpaigh. 

Seo mar a labhair Uachtarán choimisiún ECON CnaR agus Uachtarán réigiún Piedmont, Alberto Cirio (IT/PPE): “Is iad fiontair bheaga agus mheánmhéide cnámh droma na hEorpa, agus is iad ár réigiúin an áit a dtógtar a dtodhchaí. Déanann gradam an Réigiúin Fiontraíochta Eorpaigh ceiliúradh ar na pobail sin a chuireann an nuálaíocht, an athléimneacht agus an fás chun cinn toisc go ndéanann réigiúin láidre Eoraip níos láidre. Táimid ag tnúth le haitheantas a thabhairt do réigiúin atá ar thús cadhnaíochta do FBManna.” 

Ghlac Emma Blain (IE/PPE), rapóirtéir CnaR don Chlár um an Margadh Aonair agus um Chustam, páirt i dTionól na bhFiontar Beag agus Meánmhéide agus roinn sí na dúshláin agus na dea-chleachtais atá roimh FBManna in Éirinn agus iad ag méadú agus ag leathnú a ngnó thar theorainneacha. Dúirt sí: “Más mian linn go mbeadh an Eoraip ar thús cadhnaíochta ó thaobh deiseanna agus nuálaíochta de do FBManna, tá gá le gníomhaíocht chomhordaithe ar an leibhéal Eorpach maidir le hairgeadas, scileanna agus rialáil chliste, mar aon le comhpháirtíocht athnuaite leis na húdaráis áitiúla agus réigiúnacha, le hóstaigh na mol nuathionscanta, na gceantar nuálaíochta, na n-institiúidí gairmoideachais agus na líonraí fiontraíochta. Má dhéanaimid é sin, is féidir linn an Eoraip a thógáil, áit nach bhfuil FBManna ag maireachtáil sa domhan casta amháin, ach go bhfuil rath orthu - nasctha, muiníneach agus iomaíoch." 

Tá sonraí agus faisnéis maidir le conas iarratas a dhéanamh ar dhámhachtain RFE 2027 le fáil ar an leathanach gréasáin tiomnaithe. 

Tuilleadh eolais: 

• Is tionscadal é gradam an Réigiúin Fiontraíochta Eorpaigh (RFE) lena sainaithnítear agus lena dtugtar luach saothair do chríocha an Aontais a bhfuil straitéis beartais fiontraíochta nuálach réamhbhreathnaitheach den scoth á saothrú acu. Déantar na glaonna ar iarratas dhá bhliain agus tugtar an lipéad ‘Réigiún Fiontraíochta Eorpach’ do suas le trí chríoch rathúla arna roghnú ag giúiré RFE ar feadh bliain amháin. 

• Bunaíodh an lipéad RFE i gcomhpháirtíocht leis an gCoimisiún Eorpach agus tacaíonn páirtithe leasmhara ar leibhéal an Aontais leis amhail SME United, Eurochambres, Social Economy Europe agus EURADA. 

• Buaiteoirí ghradaim RFE 2025: An Ghailís (an Spáinn), Krapina Zagorje (an Chróit) agus Mazowieckie (an Pholainn). 

• Fógrófar buaiteoirí eagrán 2027 le linn sheisiún iomlánach CnaR i mí Iúil 2026. 

• Tuilleadh eolais faoi ghradam an Réigiúin Fiontraíochta Eorpaigh 

Teagmháil

Piotr Zajaczkowski 
Teil. +32 (0) 22822401 
eer-cdr@cor.europa.eu  

Theresa Sostmann 
Teil. +32 (0) 475999415 
Theresa.Sostmann@cor.europa.eu