Tús curtha le hobair choimisiúin Choiste na Réigiún faoi shainordú nua

Chuir coimisiúin bheartais Choiste Eorpach na Réigiún tús lena gcuid oibre an 21 Feabhra i sainordú nua cúig bliana na hinstitiúide nuair a toghadh cathaoirligh agus leaschathaoirligh nua.       Tháinig na cruinnithe sin sna sála ar thoghchán Kata Tüttő (HU/PSE), comhalta de chomhairle cathrach Bhúdaipeist, mar uachtarán CnaR agus Juan Manuel Moreno Bonilla (ES/PPE), uachtarán réigiún na hAndalúise, mar chéad Leas-Uachtarán CnaR.    Fónfaidh cathaoirligh na gcoimisiún ar feadh dhá bhliain go leith, agus déanfar róil cheannaireachta a rothlú idir sé ghrúpa pholaitiúla Choiste na Réigiún sa mheántéarma.     Is iad seo a leanas cathaoirligh na gcoimisiún beartais go dtí lár 2027:  

• An Coimisiún um Shaoránacht, Rialachas, Gnóthaí Institiúideacha agus Seachtracha (CIVEX): Magali Altounian (Renew), comhairleoir réigiúnach ó Sud-Provence-Alpes-Cote d’Azur. 

• An Coimisiún um Beartas Comhtháthaithe Chríochaigh agus um Buiséad AE (COTER): Vasco Alves Cordeiro (PT/PSE), comhalta de Thionól Réigiúnach na nAsór agus iar-uachtarán CnaR (2022-2025). 

• An Coimisiún um Beartas Eacnamaíoch (ECON): Alberto Cirio (IT/PPE), uachtarán réigiún Piedmont. 

• An Coimisiún um an gComhshaol, Athrú Aeráide agus Fuinneamh (ENVE): Konstantinos Bakoyannis (EL/PPE), comhairleoir bardasach na hAithne, iarmhéara na hAithne (2019-23) 

• An Coimisiún um Acmhainní Nádúrtha (NAT): Piotr Całbecki (PL/PPE), comhairleoir de chuid chúige Kujawsko-Pomorskie. 

• An Coimisiún um Beartas Sóisialta, Oideachas, Fostaíocht, Taighde agus Cultúr (SEDEC): Heike Raab (DE/PSE), Státrúnaí Dhúiche na Réine agus na Palaistíne. 

  Tionólfaidh an seachtú coimisiún in CnaR — an Coimisiún um Ghnóthaí Airgeadais agus Riaracháin (CAFA) — a chéad chruinniú an 19 Márta, faoi chathaoirleacht Friso Douwstra (NL/PPE), aire réigiúnach chúige na Freaslainne.    Rinneadh obair choimisiúin an Choiste a thabhairt cothrom le dáta agus a chuíchóiriú, chun tosaíochtaí polaitiúla i dtimthriall polaitiúil nua an Aontais agus athruithe eagraíochtúla laistigh de na hinstitiúidí a léiriú. Áirítear orthu sin uasghrádú ar obair an Aontais maidir le cosaint agus tithíocht, rud a léirítear i gceapadh na gCoimisinéirí Eorpacha do na sainchomhaid sin. Is é COTER a bheidh i gceannas ar obair Choiste na Réigiún maidir le tithíocht, agus is é ECON a bheidh freagrach as an tionscal cosanta. Déanfaidh COTER comhordú freisin ar obair CnaR maidir le buiséad fadtéarmach an Aontais — an Creat Airgeadais Ilbhliantúil — agus beidh ECON ar thús cadhnaíochta maidir leis an intleacht shaorga agus ENVE maidir le saincheisteanna uisce.