Il-mexxejja lokali jżidu l-ħidma fuq ir-reżiljenza tal-ilma u jiffirmaw Pjan ta’ Azzjoni mal-Kummissjoni Ewropea biex tingħata spinta lill-azzjoni klimatika sottonazzjonali

Il-Kumitat Ewropew tar-Reġjuni (KtR) se jżid il-kollaborazzjoni mad-Direttorat Ġenerali għall-Azzjoni Klimatika (DĠ CLIMA) tal-Kummissjoni Ewropea bi Pjan ta’ Azzjoni Konġunt ġdid iffirmat matul il-laqgħa tal-Kummissjoni għall-Ambjent, it-Tibdil fil-Klima u l-Enerġija (ENVE) tal-KtR fl-24 ta’ Ġunju. Il-pjan għandu l-għan li jagħti spinta lir-rikonoxximent tar-rwol kruċjali tal-bliet u r-reġjuni fid-dekarbonizzazzjoni, it-tranżizzjoni nadifa u r-reżiljenza. Il-membri tal-ENVE ħatru wkoll lill-President tal-KtR Kata Tüttő u lill-Ewwel Viċi President Juanma Moreno bħala korelaturi għal Opinjoni ewlenija dwar it-tisħiħ tar-reżiljenza tal-ilma fir-reġjuni u l-bliet tal-UE. 

Il-pjan ta’ azzjoni ffirmat mill-President tal-ENVE Kostas Bakoyannis u l-Viċi Direttur Ġenerali tad-DĠ CLIMA Jan Dusík jipproponi li jiġi promoss l-iżvilupp ta’ politiki u pjani lokali u reġjonali dwar il-klima allinjati mal-miri klimatiċi tal-UE u inkorporati fil-Pjani Nazzjonali għall-Enerġija u l-Klima (NECPs). Il-pjan jistabbilixxi wkoll l-għan li jittejjeb l-aċċess għall-finanzjament tal-UE għall-awtoritajiet lokali u reġjonali fil-qasam tal-mitigazzjoni, l-adattament u r-reżiljenza għat-tibdil fil-klima.

Il-pjan ta’ azzjoni jinkludi wkoll azzjonijiet biex jissaħħu l-kooperazzjoni u d-diplomazija sottonazzjonali dwar il-klima fil-konferenzi internazzjonali dwar il-klima, li jibdew bil-COP30 ta’ din is-sena, u fil-qafas ta’ inizjattivi minn isfel għal fuq, bħall-Patt  il-Missjoni dwar l-Adattament, il-Missjoni tal-Bliet u l-Patt Klimatiku Ewropew.

Il-President tal-Kummissjoni ENVE, Kostas Bakoyannis (EL/PPE), membru tal-Kunsill tal-Belt ta’ Ateni qal: “Il-Pjan ta’ Azzjoni mad-DĠ CLIMA huwa pass importanti ’l quddiem fit-tisħiħ tal-isforzi kondiviżi tagħna biex l-azzjoni klimatika tibqa’ fuq quddiem fl-aġenda tal-UE u biex titħaffef l-implimentazzjoni fil-prattika. Fis-sitwazzjoni ġeopolitika attwali, huwa saħansitra aktar importanti li nagħmlu l-parti tagħna: l-ambjent, it-tibdil fil-klima u l-enerġija huma konnessi b’mod qawwi ma’ wħud mill-kawżi ewlenin tal-kunflitti attwali u potenzjali. Barra minn hekk, dan ix-xahar l-Ewropa nqabdet fl-ewwel mewġa ta’ sħana fit-tul tal-istaġun – sinjal dirett tal-kriżi klimatika li qed tintensifika. Il-messaġġ huwa ċar: l-azzjoni klimatika trid tingħaqad mal-bini ta’ reżiljenza aħjar tal-ilma.”

Il-perspettiva lokali u reġjonali dwar ir-reżiljenza tal-ilma

Ir-reżiljenza tal-ilma saret kwistjoni kritika fl-Ewropa. L-Istrateġija tal-Kummissjoni Ewropea għar-Reżiljenza tal-Ilma li ġiet ippubblikata fl-4 ta’ Ġunju tiddeskrivi objettivi ewlenin bħar-restawr taċ-ċiklu tal-ilma, il-promozzjoni ta’ ekonomija intelliġenti fl-użu tal-ilma, u l-iżgurar ta’ aċċess għal ilma nadif għal kulħadd.

Meta jitqies li r-reżiljenza tal-ilma hija fost il-prijoritajiet ewlenin tal-mandat attwali tal-Kumitat Ewropew tar-Reġjuni, il-President tal-KtR Kata Tüttő u l-Ewwel Viċi President Juanma Moreno nħatru korelaturi għal Opinjoni li se teżamina l-Istrateġija għar-Reżiljenza tal-Ilma mill-perspettiva lokali u reġjonali. Is-suġġett se jkun ukoll fuq quddiem fl-aġenda tas-sessjoni plenarja tal-KtR tal-ġimgħa d-dieħla bl-intervent ta’ Jessika Roswall, il-Kummissarju Ewropew għall-Ambjent, ir-Reżiljenza tal-Ilma u Ekonomija Ċirkolari Kompetittiva.

Il-President tal-KtR Kata Tüttő qalet: “Kulħadd fit-territorji tagħna huwa affettwat minn kwistjonijiet tal-ilma: Jekk ikollok wisq ilma jew ma jkollokx biżżejjed ilma. Il-KtR għamel ir-reżiljenza tal-ilma parti ewlenija mill-prijoritajiet politiċi tiegħu għall-mandat 2025-2030. Ir-reżiljenza tal-ilma hija kruċjali għall-kompetittività tal-UE u hija kruċjali biex jitwettqu l-adattament għat-tibdil fil-klima, il-protezzjoni tal-bijodiversità, it-tnaqqis tat-tniġġis, is-sigurtà tal-ikel, l-ekonomija ċirkolari u s-saħħa pubblika. Għalhekk għandu jiġi integrat fl-inizjattivi ta’ politika rilevanti l-oħra kollha tal-UE. S’issa l-UE stabbiliet leġiżlazzjoni ambizzjuża dwar l-ilma, u aħna nilqgħu l-fatt li l-istrateġija tiffoka fuq l-implimentazzjoni. Jekk irridu nirnexxu f’dan tal-aħħar, huwa fejn il-bliet u r-reġjuni jeħtieġ li jkunu verament involuti. Is-simplifikazzjoni ċertament se tkun ta’ għajnuna iżda ma tistax tagħmel ħsara lill-prinċipju ta’ min iniġġes iħallas, għad-detriment tal-komunitajiet tagħna.”

Il-Kummissjoni ENVE adottat ukoll żewġ abbozzi ta’ Opinjonijiet dwar il-miri tal-enerġija “Lesti għall-mira ta’ 55 %” u dwar il-krediti tan-natura u kellha l-ewwel skambju ta’ fehmiet dwar l-Opinjoni li jmiss dwar il-Pjan Ewropew ta’ Adattament għall-Klima.

Kwotazzjonijiet mir-rapporteurs:

Rastislav Trnka (SK/PPE), President tar-Reġjun Awtonomu ta’ Košice, relatur ta’ Opinjoni dwar It-tfassil tal-krediti tan-natura: Qafas għall-promozzjoni tal-bijodiversità u s-servizzi tal-ekosistema: “Il-krediti tan-natura huma opportunità biex jiġu involuti dawk li s’issa warrbu – il-gvernijiet lokali u reġjonali, l-investituri u l-industrija – fil-protezzjoni tal-bijodiversità. Jekk ir-reġjuni jingħataw l-għodod u l-fiduċja, jistgħu jsiru atturi attivi fil-kisba tal-għanijiet klimatiċi u ambjentali tal-UE.”

Joško Klisović (HR/PSE), President tal-Assemblea tal-Belt ta’ Zagreb u relatur ta’ Opinjoni dwar L-Istat tal-Unjoni tal-Enerġija: tħejjija għal implimentazzjoni bla xkiel tat-tranżizzjoni tal-enerġija f’konformità mal-miri “Lesti għall-mira ta’ 55 %”: “Il-bliet u r-reġjuni huma l-muturi tat-tranżizzjoni ekoloġika tal-Ewropa, iżda jeħtieġu l-għodod u l-fiduċja biex iwettquha. Din l-Opinjoni tappella għal approċċ konġunt li jindirizza l-faqar enerġetiku, is-sorsi ta’ enerġija rinnovabbli, l-effiċjenza u r-reżiljenza għat-tibdil fil-klima, filwaqt li jindirizza ostakli bħall-permessi kumplessi, il-frammentazzjoni regolatorja u d-diskrepanza fil-ħiliet. Billi nagħtu s-setgħa lill-awtoritajiet lokali u reġjonali b’għarfien, finanzjament u governanza b’saħħitha, nistgħu nagħmlu t-tranżizzjoni ġusta, effettiva u nsaħħu l-kompetittività tal-Ewropa, u ma nħallu l-ebda komunità tibqa’ lura.”

Matteo Lepore (IT/PSE), Sindku ta’ Bolonja u relatur ta’ Opinjoni dwar L-adattament għat-tibdil fil-klima fil-bliet u r-reġjuni: il-bini tal-Pjan Ewropew ta’ Adattament għall-Klima: “L-adattament għall-klima jseħħ fil-bliet u r-reġjuni tagħna, flimkien mal-isforzi tagħna biex nillimitaw kemm jista’ jkun it-tibdil fil-klima. Dan l-aħħar ospitajna ż-żjara ta’ studju tal-ENVE fil-Forum tal-Mediterran tal-Missjoni dwar l-Adattament għat-Tibdil fil-Klima f’Bolonja, li tatna l-opportunità li nitgħallmu dwar eżempji konkreti ta’ attivitajiet ta’ adattament madwar l-Ewropa. Il-pjan ta’ azzjoni futur tal-UE għall-adattament jeħtieġ li jibni fuq l-esperjenza tagħna fil-prattika, biex jipprovdi soluzzjonijiet reali adatti għal kuntesti lokali u reġjonali differenti.”

Kuntatt:

Lauri Ouvinen
Tel. +32473536887
lauri.ouvinen@cor.europa.eu