Ir-reġjuni u l-bliet jappellaw għal trasformazzjoni sistematika biex tintlaħaq in-newtralità klimatika u jistennew li l-COP29 tavvanza l-azzjoni f’diversi livelli

Ir-reġjuni u l-bliet jissuġġerixxu li l-politika tal-UE dwar il-klima teħtieġ bidla fil-mentalità biex tippromovi l-innovazzjoni, timmobilizza l-investiment privat u pubbliku u tinvolvi liċ-ċittadini fit-triq lejn in-newtralità klimatika. Il-mexxejja lokali u reġjonali llum adottaw f’Espoo, il-Finlandja, sett ġdid ta’ rakkomandazzjonijiet ta’ politika abbozzati minn Markku Markkula (FI/PPE), President tar-Reġjun ta’ Ħelsinki, u approvaw il-pożizzjoni konġunta tal-gvernijiet sottonazzjonali dinjija għall-konferenza dwar il-klima COP29.

 L-abbozz ta’ opinjonital-Kumitat Ewropew tar-Reġjuni (KtR) jiddispjaċih li l-implimentazzjoni tal-Patt Ekoloġiku Ewropew għadha insuffiċjenti u frammentata wisq, u tonqos milli tisfrutta b’mod effettiv l-aħjar għarfien xjentifiku u prattiku globali. Huwa jappella lill-Kummissjoni Ewropea l-ġdida biex tmexxi trasformazzjoni sistematika fejn il-bliet u r-reġjuni jkollhom rwol ewlieni fl-aċċellerazzjoni tal-innovazzjoni, l-involviment taċ-ċittadini għall-bidla u l-promozzjoni ta’ drawwiet ta’ produzzjoni u konsum sostenibbli.

F’konformità mar-rapporttal-KtRdwar il-PattEkoloġiku 2.0, l-abbozz ta’ opinjoni ppreżentat mis-Sur Markkula jenfasizza l-ħtieġa li jiġu stabbiliti mekkaniżmi ġodda biex jiġi mobilizzat investiment privat sostanzjali u biex tissaħħaħ l-effettività tal-fondi ta’ koeżjoni u ta’ Orizzont tal-UE fl-appoġġ tal-inizjattivi klimatiċi. Ir-reġjuni u l-bliet jenfasizzaw ukoll li ż-żieda fil-finanzjament tar-riċerka, l-iżvilupp u l-innovazzjoni u l-kollaborazzjoni pubblika-privata huma meħtieġa biex jiżdied l-użu tat-teknoloġiji eżistenti u jiġu żviluppati oħrajn ġodda biex tinkiseb in-newtralità klimatika. L-Opinjoni għandha tiġi adottata b’mod finali fis-sessjoni plenarja ta’ Novembru.

Il-membri tal-Kummissjoni għall-Ambjent, it-Tibdil fil-Klima u l-Enerġija (ENVE) tal-KtR approvaw ukoll il-pożizzjoni komunital-gvernijiet sottonazzjonali dinjija għall-konferenza dwar il-klima COP29, li ser issir f’Baku, l-Ażerbajġan, f’Novembru. Il-KtR kien minn ta’ quddiem fl-abbozzar tat-talbiet ta’ politika li ġew miftiehma bejn networks internazzjonali ewlenin u ġew ippubblikati uffiċjalment fi New York din il-ġimgħa.

Il-kostitwenza tal-Gvernijiet Lokali u l-Awtoritajiet Muniċipali (LGMA), li tirrappreżenta l-bliet u r-reġjuni fin-negozjati internazzjonali dwar il-klima, tistenna li l-COP29 tavvanza l-azzjoni f’diversi livelli u taqbel dwar Għan Kollettiv Kwantifikat Ġdid ambizzjuż dwar il-finanzjament għall-klima li jippermetti tranżizzjoni ġusta, ekwa u ffinanzjata tajjeb fil-livelli kollha tal-gvern inkluż aċċess dirett għall-gvernijiet lokali u gvernijiet sottonazzjonali oħra. Il-gvernijiet sottonazzjonali qed jappellaw ukoll biex jallinjaw l-aġendi dwar il-klima, in-natura, it-tniġġis u l-iżvilupp sostenibbli u biex jiżguraw l-inklużjoni tal-bliet u r-reġjuni fir-reviżjoni tal-Kontributi Stabbiliti fil-Livell Nazzjonali, mistennija sal-COP30 fl-2025.

Il-mexxejja lokali u reġjonali laqgħu l-fatt li l-Finlandja ngħaqdet mal-Koalizzjoni għal Sħubijiet f’Diversi Livelli ta’ Ambizzjoni Għolja (CHAMP), kif enfasizzat mill-Ministru Finlandiż għall-Klima u l-Ambjent Kai Mykkänen f’Espoo llum. Bħalissa 12-il Stat Membru tal-UE u 73 pajjiż iffirmaw l-inizjattiva, li tnediet fil-COP28 is-sena l-oħra u tinkludi impenn biex tissaħħaħ il-kooperazzjoni mal-gvernijiet sottonazzjonali fl-ippjanar, il-finanzjament, l-implimentazzjoni u l-monitoraġġ tal-istrateġiji klimatiċi.

Kwotazzjonijiet:

Kata Tüttő (HU/PSE), l-Ewwel Viċi President tal-Kummissjoni ENVE u Viċi Sindku ta’ Budapest: “L-għargħar reċenti fl-Ewropa Ċentrali u tal-Lvant, iżda wkoll fit-Tramuntana tal-Italja, u n-nirien fil-Portugall huma allarm ieħor li jfakkar li l-UE trid issegwi b’politiki ambizzjużi tal-Patt Ekoloġiku. It-tkabbir ekonomiku u s-sostenibbiltà ambjentali jistgħu u għandhom jimxu id f’id. Nistennew li l-Kummissjoni Ewropea l-ġdida tpoġġi fil-prattika l-ambizzjoni tagħha li taħdem mill-qrib mal-bliet u r-reġjuni. Nistennew bil-ħerqa programm tal-Kummissjoni li jappoġġa l-isforzi tagħna u jgħammarna bl-għodod meħtieġa biex nimplimentaw proġetti fuq il-post.”

Markku Markkula (FI/PPE), President tar-Reġjun ta’ Ħelsinki u relatur tal-Opinjoni dwar Il-Futurtal-Politika tal-UE dwar il-Klima: l-allinjament tal-miri ta’ mitigazzjoni u l-isfidi ta’adattament: “L-azzjonijiet klimatiċi attwali tal-UE huma tajbin iżda frammentati wisq. Mhijiex biss kwistjoni ta’ dak li huwa meħtieġ għan-natura u l-pjaneta, iżda wkoll tal-futur tal-industrija, il-kompetittività, ir-riċerka u l-prosperità tal-UE. Dak li huwa meħtieġ issa huwa bidla sistemika madwar l-Ewropa kollha bbażata fuq tmexxija innovattiva u f’diversi livelli li timmotiva lil kulħadd biex jagħmel il-parti tiegħu mill-punti tat-tluq tiegħu stess. Hemm ħtieġa urġenti li jiġu żviluppati teknoloġiji u soluzzjonijiet ġodda tan-newtralità klimatika permezz ta’ kooperazzjoni pubblika-privata fir-riċerka, l-iżvilupp u l-innovazzjoni.”

Kai Mykkänen,Ministru għall-Ambjentu l-Klima tal-Finlandja: “Il-ġimgħa li għaddiet il-Finlandja ngħaqdet mal-inizjattiva CHAMP biex tagħti spinta lill-azzjoni klimatika fil-bliet u r-reġjuni. Il-ħidma li saret fil-muniċipalitajiet globalment hija kruċjali biex jintlaħqu l-miri klimatiċi. Fil-Finlandja nistgħu nnaqqsu l-emissjonijiet filwaqt li nieħdu ħsieb ukoll it-tkabbir tal-ekonomija. Il-gvern tagħna jkompli jappoġġa impenji u azzjonijiet klimatiċi aktar b’saħħithom biex jitnaqqsu l-emissjonijiet fl-UE u globalment.”

Għal aktar informazzjoni:

 Il-konferenza COP29 dwar il-klima ser issir f'Baku, l-Ażerbajġan, mill-11 sat-22 ta' Novembru. Il-KtR ser jirrappreżenta l-vuċi tal-bliet u r-reġjuni fid-delegazzjoni tal-UE. Aqra aktar dwar il-parteċipazzjoni tal-KtR: Il-bliet u r-reġjuni tal-UE fil-COP29 tal-UNFCCC 

Janez Potočnik, kopresident tal-Panel Internazzjonali dwar ir-Riżorsi tal-UNEP, u Leena Ylä-Mononen, Direttur tal-Aġenzija Ewropea għall-Ambjent, ħadu sehem fid-dibattitu fil-laqgħa tal-Kummissjoni ENVE. Fl-intervent mill-bogħod tiegħu, is-Sur Potočnik enfasizza li l-mixja lejn tkabbir li huwa soċjalment ġust u ambjentalment sostenibbli teħtieġ trasformazzjoni sistematika b’approċċ olistiku, li jindirizza kemm in-naħa tas-suq kif ukoll dik tad-domanda.

L-avvenimenti tal-Kummissjoni ENVE f’Espoo se jkomplu nhar il-Ġimgħa b’konferenza fejn se jiġu ppreżentati prattiki innovattivi dwar l-avvanz tal-azzjoni klimatika u t-tranżizzjoni ekoloġika mill-Finlandja u lil hinn minnha. Anna-Kaisa Ikonen, Ministru għall-Gvern Lokali u Reġjonali tal-Finlandja, ser titkellem fil-ftuħ.

Persuna ta' kuntatt:

Lauri Ouvinen
Tel: +32 473 536 887
lauri.ouvinen@cor.europa.eu