Ir-reġjuni u l-bliet jitolbu politiki ġusti u sostenibbli biex jipproteġu l-interessi tal-ġenerazzjonijiet futuri

Fis-7 ta’ Mejju, il-mexxejjalokali u reġjonali appellaw għal politiki ġusti u li jibqgħu validi fil-futur biex jissalvagwardjaw id-drittijiet taż-żgħażagħ u tal-ġenerazzjonijiet futuri u jipproteġuhom mill-konsegwenzi ta’ politiki mhux sostenibbli u li ma jħarsux fit-tul, matul laqgħa tal-Kummissjoni għall-Politika Soċjali, l-Edukazzjoni, l-Impjieg, ir-Riċerka u l-Kultura (SEDEC) fis-7 ta’ Mejju. Huma ddiskutew ukoll ir-rieżami ta’ nofs it-terminu tal-Pjan ta’ Azzjoni dwar l-Ekonomija Soċjali u l-40 anniversarju tal-Kapitali Ewropej tal-Kultura. 

Ġustizzja interġenerazzjonali

F’abbozz ta’ opinjoni adottat fis-7 ta’ Mejju, ir-reġjuni u l-bliet enfasizzaw li l-ġustizzja interġenerazzjonali hija vitali għal soċjetajiet sostenibbli u reżiljenti. Huma ssottolinjaw li l-politiki attwali jridu jikkunsidraw l-impatti fit-tul, speċjalment fl-oqsma tal-ambjent, l-impjiegi, l-akkomodazzjoni, il-protezzjoni soċjali, l-infiq pubbliku u l-governanza. Il-membri tas-SEDEC irrikonoxxew l-inġustizzja li tinħoloq meta grupp wieħed jibbenefika minn politiki u miżuri filwaqt li ieħor iġarrab il-konsegwenzi, speċjalment fost il-ġenerazzjonijiet, u għalhekk ħeġġew lill-UE tinkorpora l-ġustizzja interġenerazzjonali u l-perspettiva taż-żgħażagħ fl-oqsma kollha tat-tfassil tal-politika.

Il-membri tal-KtR enfasizzaw li l-awtoritajiet lokali u reġjonali jaqdu rwol vitali fl-implimentazzjoni ta’ politiki li jħarsu ’l quddiem u fit-trawwim tas-solidarjetà interġenerazzjonali. Huma laqgħu l-inizjattiva tal-Kummissjoni Ewropea għal strateġija Ewropea komprensiva dwar il-ġustizzja interġenerazzjonali li għandha ssir "boxxla morali" għal tfassil aħjar tal-politika. Huma enfasizzaw ir-rwol tal-kultura, is-sostenibbiltà ambjentali, il-mobbiltà interġenerazzjonali, u distribuzzjoni ġusta tal-ġid fl-istabbiliment ta’ qafas għas-solidarjetà bejn il-ġenerazzjonijiet. Barra minn hekk, huma kienu favur proġetti interġenerazzjonali li jrawmu t-tagħlim reċiproku, is-solidarjetà u l-involviment ċiviku. Il-membri enfasizzaw ukoll ir-responsabbiltà politika kemm tal-UE kif ukoll tal-awtoritajiet lokali biex jiżguraw li d-deċiżjonijiet tal-lum ma jsirux piż għall-ġenerazzjonijiet futuri.

Ir-relatur Tine Radinja (SI/Ħodor), Sindku tal-Muniċipalità ta’ Škofja Loka, qalet: “Il-ħtiġijiet ta’ ġenerazzjoni waħda ma jistgħux jiġu a skapitu tal-ġenerazzjoni li jmiss. Il-ġustizzja interġenerazzjonali ssejħilna biex naġixxu b’empatija, previżjoni u responsabbiltà — billi ngħaqqdu l-ġenerazzjonijiet żgħażagħ, attwali u futuri permezz ta’ valuri kondiviżi u politiki inklużivi. Billi nsegwu l-prinċipji tal-Ġustizzja Interġenerazzjonali, aħna nsawru wirt sostenibbli li jonora d-dritt ta’ kull ġenerazzjoni li tirnexxi.”

Rieżami ta’ nofs it-terminu tal-Pjan ta’ Azzjoni dwar l-Ekonomija Soċjali

Il-membri tal-Kummissjoni SEDEC iddiskutew ir-riżultati ta’ nofs it-terminu tal-2025 tal-Pjan ta’ Azzjoni dwar l-Ekonomija Soċjali 2021-2030 (SEAP), adottat mill-Kummissjoni Ewropea fl-2021. Il-pjan iddeskriva 60 miżura biex tingħata spinta lill-aċċess għall-finanzi u s-swieq, il-ħolqien tal-impjiegi u l-appoġġ għat-tranżizzjonijiet ekoloġiċi u diġitali fl-ekonomija soċjali (ta’ kooperattivi, assoċjazzjonijiet, fondazzjonijiet, mutwi, intrapriżi soċjali).

Ir-reġjuni u l-bliet enfasizzaw il-valur miżjud tas-SEAP għal Ewropa aktar inklużiva u aktar sostenibbli. Huma esprimew tħassib, madankollu, dwar l-isfidi persistenti għall-implimentazzjoni effettiva tiegħu, bħall-aċċess limitat għall-finanzi, u l-ħtieġa għall-bini tal-kapaċità u r-rikonoxximent usa' tas-settur. Il-membri appellaw għal miżuri ta' appoġġ imsaħħa u sostnuti u aċċess simplifikat għar-riżorsi, inklużi mekkaniżmi ta' finanzjament pubbliċi u privati mtejba għall-ekonomija soċjali.

KapitaliEwropea tal-Kultura: is-sitwazzjoni attwali u l-perspettivi futuri

Fl-okkażjoni tal-40 anniversarju tal-Azzjoni tal-Kapitali Ewropej tal-Kultura (ECoC), inizjattiva, immarkata fl-4 ta’ April f’Chemnitz, il-membri tal-KtR iddiskutew il-futur tal-inizjattiva tal-Kapitali Ewropej tal-Kultura.  Il-mexxejja lokali u reġjonali enfasizzaw ir-rwol vitali tal-ECoC fil-promozzjoni tal-iżvilupp u l-koeżjoni kulturali u qasmu l-esperjenzi ta’ suċċess tagħhom stess tal-inizjattiva. Huma ddikjaraw li l-preservazzjoni tal-wirt kulturali tal-Ewropa hija investiment strateġiku fl-identità u r-reżiljenza tal-komunità. B’ħarsa ’l quddiem, l-edizzjonijiet futuri tal-ECoC għandhom ikomplu jiċċelebraw id-diversità rikka u l-ispirtu kondiviż tal-kulturi Ewropej, b’enfasi partikolari fuq l-għoti tas-setgħa lil bliet u reġjuni iżgħar.

 Matul il-laqgħa wkoll:

Il-membri tal-Kummissjoni SEDEC kellhom l-ewwel skambju ta’ fehmiet dwar l-Opinjonijiet li ġejjin:

• “Strateġijatal-UE kontra l-faqar”,mir-relatur Yonnec Polet (BE/PSE), Membru tal-Kunsill Muniċipali ta’ Berchem-Sainte-Agathe.
•  “L-Istrateġija tal-Unjoni tal-Ħiliet”, mir-relatur Emil Boc (RO/PPE), Sindku tal-Muniċipalità ta’ Cluj-Napoca, il-Kontea ta’ Cluj.
• "It-tisħiħ tad-drittijiet tan-nisa fl-UE: Perspettiva lokali u reġjonali”, mir-relatur Carina Ohlsson (SE/PSE), Membru tal-Kunsill Muniċipali, Muniċipalità ta’ Lidköping.

Biex terġa' tara l-laqgħa, ikklikkja hawn. Il-laqgħa li jmiss tal-Kummissjoni SEDEC se ssir fis-17 ta’ Ġunju 2025. 

Il-kuntest

•  Rakkomandazzjoni tal-Kunsill dwar l-iżvilupp ta’ kundizzjonijiet qafas tal-ekonomija soċjali, adottata f’Novembru 2023.