Opinjonijiet

Bħala korp konsultattiv tal-istituzzjonijiet Ewropej, il-Kumitat Ewropew tar-Reġjuni (KtR) joħroġ Opinjonijiet u Riżoluzzjonijiet biex jiżgura li l-awtoritajiet lokali u reġjonali jkollhom vuċi formali fit-tfassil tal-politika tal-UE. 

Il-Kummissjoni Ewropea, il-Parlament Ewropew, u l-Kunsill tal-Unjoni Ewropea jeħtiġilhom jikkonsultaw lill-KtR dwar il-leġiżlazzjoni li taffettwa oqsma bħas-saħħa, il-politika ekonomika, l-edukazzjoni, l-impjiegi, il-politika soċjali, il-koeżjoni territorjali, ekonomika u soċjali, it-trasport, l-enerġija u l-klima. Il-KtR joħroġ ukoll Opinjonijiet fuq inizjattiva proprja u Opinjonijiet mitluba mill-Presidenza b’rotazzjoni tal-Kunsill tal-UE.

Il-proċess għall-ħruġ ta’ opinjoni huwa demokratiku: il-President tal-KtR jassenja l-kompitu lil kummissjoni, li tagħżel relatur biex jabbozza l-opinjoni. L-abbozz jiġi diskuss u approvat kemm fil-laqgħat tal-kummissjonijiet kif ukoll fil-plenarja tal-KtR qabel ma jintbagħat lill-istituzzjonijiet tal-UE. 

Kull sena, il-KtR jorganizza sa sitt sessjonijiet plenarji, u joħroġ bejn 50 u 70 opinjoni u riżoluzzjoni. Il-Kumitat jinvolvi ruħu maċ-ċittadini, il-politiċi żgħażagħ, u msieħba esterni, u żviluppa għodod bħan-Network RegHub u l-valutazzjonijiet tal-impatt territorjali biex jappoġġja pariri bbażati fuq l-evidenza. Il-ftehimiet ta’ kooperazzjoni mal-KE u l-PE jsaħħu r-rwol tiegħu fil-fażijiet kollha tat-teħid ta’ deċiżjonijiet tal-UE.