Dwar
Id-deċentralizzazzjoni istituzzjonali hija kruċjali għas-saħħa tas-soċjetajiet demokratiċi, peress li trawwem tmexxija lokali effettiva u tippermetti li l-kwistjonijiet lokali jiġu indirizzati b’mod effiċjenti billi dawk li jieħdu d-deċiżjonijiet jingħataw l-istrumenti meħtieġa biex jieħdu azzjoni fil-livell l-eqreb taċ-ċittadini.
Il-KtR ilu jappoġġja riċerka li tipprovdi ħarsa ġenerali lejn il-livelli ta’ deċentralizzazzjoni istituzzjonali fl-Istati Membri tal-UE u fil-pajjiżi ġirien. Din il-paġna tinkludi l-aktar informazzjoni aġġornata dwar l-istrutturi ta’ governanza differenti f’diversi pajjiżi u
tippreżenta d-distribuzzjoni tal-kompetenzi f’kull livell ta’ governanza fl-oqsma ta’ politika li ġejjin li huma soġġetti għal konsultazzjoni obbligatorja tal-Kumitat Ewropew tar-Reġjuni (KtR): trasport, impjieg, kwistjonijiet soċjali, edukazzjoni, taħriġ vokazzjonali, żgħażagħ u sport, kultura, saħħa pubblika, networks trans-Ewropej, koeżjoni ekonomika, soċjali u territorjali; ambjent, enerġija u l-ġlieda kontra t-tibdil fil-klima, kif ukoll fl-oqsma ta’ interess partikolari għall-awtoritajiet lokali u reġjonali: agrikoltura, sajd, immigrazzjoni u ażil, turiżmu u protezzjoni ċivili.
Studji
Strutturi ta’ governanza f’diversi livelli fil-pajjiżi tat-tkabbir tal-UE
F’konformità mal-prijoritajiet politiċi tal-KtR, l-aħħar aġġornament (Marzu 2025) ikopri l-pajjiżi tat-tkabbir tal-UE (l-Albanija, il-Bożnija-Ħerzegovina, il-Georgia, il-Kosovo, il-Moldova, il-Montenegro, il-Maċedonja ta’ Fuq, is-Serbja, it-Turkija u l-Ukrajna). Kull kapitolu jiddeskrivi d-diversi strutturi ta’ governanza fil-pajjiżi rispettivi fi 17-il qasam ta’ politika.
Il-ħidma li tikkonċerna pajjiżi oħra (l-Istati Membri tal-UE u l-viċinat) se tiġi aġġornata f’konformità mal-prijoritajiet politiċi tal-KtR u r-riżorsi disponibbli.
Strutturi ta’ governanza f’diversi livelli fil-Bożnija-Ħerzegovina
Dan l-istudju huwa verżjoni estiża tal-istudju tal-każ inkluż fl-istudju dwar l-istrutturi ta’ governanza f’diversi livelli fil-pajjiżi tat-tkabbir tal-UE. Jagħti ħarsa ġenerali sħiħa lejn il-livelli ta’ deċentralizzazzjoni istituzzjonali fil-Bożnija-Ħerzegovina, jiddeskrivi l-kompiti attribwiti fil-livelli kollha ta’ governanza lill-korpi amministrattivi tal-Bożnija-Ħerzegovina, il-Federazzjoni tal-Bożnija-Ħerzegovina, ir-Repubblika Srpska, id-Distrett ta’ Brčko, l-10 cantons tal-Federazzjoni tal-Bożnija-Ħerzegovina, u l-muniċipalitajiet.
Strutturi ta’ governanza f’diversi livelli fl-Armenja u l-Ażerbajġan
L-istudju jipprovdi ħarsa ġenerali tal-livelli ta’ deċentralizzazzjoni istituzzjonali u fiskali, u tal-bażijiet legali għad-diversi strutturi ta’ governanza fl-Armenja u l-Ażerbajġan. Il-kooperazzjoni bejn il-KtR u l-Armenja u l-Ażerbajġan ilha teżisti, b’mod partikolari fil-qafas tal-Konferenza tal-Awtoritajiet Lokali u Reġjonali għas-Sħubija tal-Lvant (CORLEAP). Dan l-istudju jirrappreżenta t-tlestija tar-riċerka mwettqa dwar id-diviżjoni tas-setgħat fil-pajjiżi tas-Sħubija tal-Lvant, peress li l-każijiet tal-Georgia, il-Moldova u l-Ukrajna ġew koperti fl-istudju dwar l-istrutturi ta’ governanza f’diversi livelli fil-pajjiżi tat-tkabbir tal-UE.