COR/AD14/30BIS/26

Stiúrthóir Cumarsáide

Oifigeach - riarthóir (nós imeachta roghnúcháin oscailte)

Deadline

Sonraí an fhógra folúntais

  • Stiúrthóireacht: Stiúrthóireacht na Cumarsáide
  • Bainistíocht: tá
  • Aonad/Seirbhís: /
  • Grád: AD14
  • Suíomh: an Bhruiséil 
  • Nós imeachta roghnúcháin: nós imeachta roghnúcháin oscailte - oscailte do gach iarrthóir a chomhlíonann na critéir incháilitheachta a leagtar amach i roinn 3 den fhógra folúntais
  • Spriocdháta: 10 Nollaig 2026 ag meán lae (am na Bruiséile)

Eolas fúinne

Is é Coiste Eorpach na Réigiún (CnaR) tionól polaitiúil na n-ionadaithe áitiúla agus réigiúnacha ar leibhéal an Aontais Eorpaigh agus an guth atá ag 1.2 milliún polaiteoir tofa ar an leibhéal áitiúil agus réigiúnach. Tá 329 gcomhalta agus 329 gcomhalta mhalartacha in CnaR agus sainordú toghchánach acu, nó atá freagrach go polaitiúil do thionól tofa, ar an leibhéal réigiúnach nó áitiúil. Cinntíonn na comhaltaí go gcuirtear dearcadh na n-údarás áitiúil agus réigiúnach san áireamh i bpróiseas cinnteoireachta agus reachtóireachta an Aontais Eorpaigh. Is iad na húdaráis sin bunchloch an daonlathais Eorpaigh agus is iad atá freagrach as thart ar 70 % de bheartais an Aontais a chur chun feidhme, sin agus as aon trian den chaiteachas poiblí agus as leath den infheistíocht phoiblí.

Tá thart ar 60 oifigeach agus ball foirne eile i Stiúrthóireacht na Cumarsáide. Is iad na príomhchúraimí atá ar an Stiúrthóireacht freastal ar riachtanais cumarsáide polaitiúla chomhaltaí CnaR agus, ar bhonn níos ginearálta, na n-ionadaithe áitiúla agus réigiúnacha i gcoitinne, sin agus nasc níos dlúithe a chruthú idir an chumarsáid agus obair pholaitiúil agus reachtach CnaR, agus gníomhaíochtaí cumarsáide comhtháite a fhorbairt agus a chur chun feidhme. Tá na cheithre fhoireann seo a leanas sa Stiúrthóireacht:

  • D.I – an comhordú straitéiseach, an phleanáil, an tionchar agus an fhor-rochtain: is í an fhoireann seo atá i bhfeighil an chomhordaithe straitéisigh, phleanáil na cumarsáide, an mheasúnaithe tionchair, na for-rochtana díláraithe, na cumarsáide inmheánaí agus an chomhair leis na hinstitiúidí Eorpacha agus le comhpháirtithe eile.
  • D.1 – an preas agus na meáin: is í an fhoireann seo a bhíonn i dteagmháil leis an bpreas agus na meáin, a dhéanann faireachán ar na meáin agus a fhorbraíonn insintí soiléire agus ábhar soiléir a léiríonn obair pholaitiúil agus reachtach CnaR agus a thacaíonn leis na comhaltaí.
  • D.2 – eagrú imeachtaí agus idirphlé áitiúil: is í an fhoireann seo a dhéanann comhordú ar imeachtaí, comhdhálacha agus an t-idirphlé áitiúil sa Bhruiséil agus sna réigiúin trí chéile, agus ar ghníomhaíochtaí for-rochtana trí bhíthin líonraí ionadaithe tofa áitiúla agus réigiúnacha CnaR.
  • D.3 – an chumarsáid dhigiteach: is í an fhoireann seo a fhorbraíonn agus a fheabhsaíonn láithreacht CnaR ar na bealaí digiteacha, lena n-áirítear an chumarsáid ghréasáin, na meáin shóisialta agus an chumarsáid amhairc.

Dualgais

Oibríonn an Stiúrthóir faoi údarás díreach an Ardrúnaí. Is é a dhéanann obair Stiúrthóireacht na Cumarsáide a eagrú agus a mhaoirsiú agus a dhéanann faireachán ar an obair sin. Tá an cúram ar an Stiúrthóir, go háirithe, cur le hinfheictheacht phoiblí CnaR agus an tionchar a bhíonn ag CnaR a neartú. Seo mar a dhéantar sin:

  • tógáil ar straitéis chumarsáide CnaR, tuilleadh dul chun cinn a dhéanamh maidir le straitéis chumarsáide chomhtháite a fhorbairt agus a chur chun feidhme ar son na hinstitiúide, d’fhonn tacú le misean CnaR i dtaobh tionchar a imirt ar bheartais agus reachtaíocht an Aontais, riachtanais agus tosaíochtaí na n-údarás áitiúil agus réigiúnach a chur in iúl, aird a tharraingt ar obair Thionól CnaR agus ar choimisiúin chomhairleacha an Choiste agus an breisluach uathúil a bhaineann le CnaR a léiriú go soiléir;
  • an caidreamh déthaobhach laethúil a bhíonn ag CnaR le hiriseoirí na meán cumarsáide Eorpach, náisiúnta agus fonáisiúnta a neartú, d’fhonn deiseanna a aithint chun tionchar a imirt ar na meáin, agus faireachán a dhéanamh ar an gclár oibre polaitiúil agus meán cumarsáide agus ar threochtaí na meán sóisialta agus cur leis an gcumarsáid ghréasáin agus le gníomhaíochtaí na meán sóisialta mar ghnéithe tábhachtacha de straitéis atá dírithe níos mó ar an bpobal agus ar an éileamh;
  • tacaíocht a thabhairt do chomhlachtaí reachtúla CnaR, d’Uachtarán CnaR, do rapóirtéir straitéis chumarsáide CnaR, agus do cheannairí polaitiúla nó comhaltaí eile de chuid CnaR, ionas gur féidir leo clár oibre beartais an Aontais a thuar agus a dtuairimí a nochtadh ina leith de réir mar a athraíonn sé ó sheachtain go seachtain, agus aird a tharraingt ar réimsí beartais CnaR agus ar na tograí uaidh, agus ábhar cumarsáide soiléir simplí atá réidh le húsáid a chur ar fáil do na comhaltaí chun cabhrú leo cumarsáid a dhéanamh le pobail áitiúla agus réigiúnacha;
  • plé rialta a dhéanamh le rúnaíochtaí na ngrúpaí polaitiúla maidir leis na gníomhaíochtaí cumarsáide;
  • feidhmiú mar chomhordaitheoir ghníomhaíochtaí eagarthóireachta CnaR, agus comhleanúnachas, soiléire agus ailíniú straitéiseach an ábhair eagarthóireachta a áirithiú sa Stiúrthóireacht agus ar fud na hinsitiúide, dlúthnaisc a chothú idir na gníomhaíochtaí cumarsáide agus na tosaíochtaí polaitiúla, agus rannchuidiú le cur chun feidhme agus measúnú straitéis chumarsáide CnaR;
  • gníomhaíochtaí cumarsáide agus for-rochtana díláraithe a fhorbairt trí bhíthin imeachtaí áitiúla agus idirphlé áitiúil agus úsáid straitéiseach a bhaint as líonraí CnaR, lena n-áirítear Líonra Chomhairleoirí Áitiúla an Aontais Eorpaigh agus Clár na bPolaiteoirí Tofa Óga, i gcomhar leis na húdaráis áitiúla agus réigiúnacha, na geallsealbhóirí a bhfuil baint acu le príomhréimsí beartais CnaR agus na hinstidiúidí Eorpacha eile;
  • an nuálaíocht agus an nuachóiriú a spreagadh sna modhanna agus sna bealaí cumarsáide, lena n-áirítear úsáid fhreagrach na hintleachta saorga agus teicneolaíochtaí eile atá ag teacht chun cinn;
  • rannchuidiú le próiseas cinnteoireachta an lucht bainistíochta sinsearaí, faoi stiúir an Ardrúnaí;
  • aonaid na Stiúrthóireachta a eagrú, a chomhordú, a bhainistiú agus maoirseacht a dhéanamh ar a gcuid oibre; 
  • acmhainní daonna agus buiséadacha na Stiúrthóireachta a bhainistiú go héifeachtach, leas a bhaint as uirlisí nua-aimseartha chun an leithdháileadh acmhainní a bharrfheabhsú, na baill foirne a dhíriú ar chúraimí a bhfuil breisluach níos airde leo agus sineirgí agus gnóthachain éifeachtúlachta a chur chun cinn;
  • na hacmhainní airgeadais a sannadh don Stiúrthóireacht, lena n-áirítear buiséadú iontaofa tionscadal agus anailís riosca, a phleanáil, a bhainistiú agus a thuairisciú, agus dualgais an oifigigh údarúcháin trí tharmligean a chomhlíonadh de réir na dteorainneacha atá leagtha síos;
  • caidreamh a chothú agus a fhorbairt tuilleadh le hinstitiúidí eile an Aontais agus ionadaíocht a dhéanamh thar ceann CnaR i gcomhlachtaí idirinstitiúideacha.

Doiciméid