Dhéanfadh tuilleadh ionchuir áitiúil rialacha an Aontais a shimpliú, a deir ceannairí áitiúla

Thug ceannairí áitiúla agus réigiúnacha a dtacaíocht d’iarracht an Choimisiúin Eorpaigh reachtaíocht an Aontais a shimpliú, agus leag siad béim ar a phráinní atá sé an rómhaorlathas a laghdú, borradh a chur faoin iomaíochas, agus freagairtí níos solúbtha ar ghéarchéimeanna a chumasú. 

Ghlac Coiste Eorpach na Réigiún (CnaR) na moltaí beartais maidir leis an tionscnamh ‘Eoraip níos simplí agus níos tapúla’ an 2 Iúil, tar éis próiseas mear.

Leagtar béim sa tuairim, faoi stiúir an rapóirtéara ghinearálta Jelena Drenjanin (SE/PPE), comhalta de Chomhairle Bardais Huddinge, ar a thábhachtaí atá sé ról a thabhairt d’údaráis áitiúla agus réigiúnacha sula nglacfar reachtaíocht agus ina diaidh, mar bhealach chun maorlathas a laghdú agus chun a áirithiú go dtacaíonn reachtaíocht an Aontais leis an bhfiontraíocht, go gcosnaíonn sí saoránaigh, agus go n-oibríonn sí go héifeachtach ar an láthair.

Dúirt an tUasal Drenjanin: “Ní bhaineann simpliú le caighdeáin a ísliú. Is éard atá i gceist leis a chinntiú gur féidir linn an daonlathas, an inbhuanaitheacht agus an rathúnas a bhaint amach gan an rómhaorlathas a bhá. Baineann sé le rialacha an Aontais Eorpaigh a dhéanamh soiléir, praiticiúil agus slán i bhfad na haimsire freisin.”

Dúirt CnaR go bhfuil na leibhéil mhaorlathais atá ann faoi láthair ag cur bac ar infheistíocht áitiúil, ar chruthú post agus ar fhreagairtí ar ghéarchéimeanna, agus áitíonn sé go bhfuil sé ríthábhachtach measúnú tapa éifeachtach a dhéanamh ar thionchair reachtaíocht an Aontais sna hiarrachtaí chun torthaí a fheabhsú.

Le rannpháirtíocht luath na gcathracha agus na réigiún i ngrinnscrúdú ar dhréachtreachtaíocht agus úsáid níos leithne a bhaint as uirlisí rialála níos fearr agus coimhdeachta – lena n-áirítear ionstraimí CnaR amhail measúnuithe tionchair chríochaigh, díonadh tuaithe, fadbhreathnaitheacht straitéiseach, agus a líonra faireacháin réigiúnach (RegHub) – chuideofaí lena áirithiú go mbeadh beartais an Aontais níos simplí, níos praiticiúla agus níos éasca a chur chun feidhme.

Tá clár oibre an Choimisiúin Eorpaigh maidir le simpliú bunaithe ar cheithre cholún: cur chun feidhme a fheabhsú, próisis a shimpliú agus a luathú, ceapadh rialacha a fheabhsú, agus comhpháirtíochtaí a chothú.

Éilíonn formhór reachtaíocht an Aontais gníomhaíocht ó rialtais áitiúla agus réigiúnacha, rud atá mar bhonn agus mar thaca ag éilimh Choiste Eorpach na Réigiún ar an gCoimisiún Eorpach peirspictíochtaí áitiúla agus réigiúnacha a chomhtháthú go córasach ar bhealach níos iomláine agus dlíthe á bhforbairt agus á n-athbhreithniú aige.  

Luaigh:  

Rapóirtéir ginearálta Jelena Drenjanin (SE/PPE), comhalta de Chomhairle Bardais Huddinge: “Seasann an Eoraip ag crosbhóthar. Agus muid ag díospóireacht agus ag moilliú, bogann an domhan ar aghaidh ar luas lasrach — san intleacht shaorga, i margaí domhanda, i dtionchar geopholaitiúil. Mura ngníomhaímid anois, tá an baol ann go mbeimid inár lucht féachana i dtodhchaí a scríobh daoine eile. Sin an fáth a dteastaíonn Eoraip uainn atá níos simplí, níos tapúla agus níos cliste – Eoraip a laghdaíonn trí chastacht, a chumhachtaíonn cathracha agus réigiúin, agus a réitíonn an bealach don nuálaíocht. Ní bhaineann simpliú le caighdeáin a ísliú — baineann sé le torthaí a bhaint amach. Baineann sé le hAontas a thógáil atá solúbtha go leor le bheith i gceannas, ní hamháin coinneáil suas leis. Agus is linne a thosaíonn sé sin — inniu, ní amárach." 

Cúlra:

• Bileog eolais faoin tuairim: ‘Eoraipníos simplí agus níos tapúla’leis an rapóirtéir ginearálta Jelena Drenjanin (SE/PPE), comhalta de Chomhairle Bardais Huddinge.
• Bileog eolais ón gCoimisiún Eorpach: ‘Eoraipníos simplí agus níos tapúla.’
• Teachtaireacht ón gCoimisiún Eorpach: Eoraipníos simplí agus níos tapúla: Teachtaireacht maidir le cur chun feidhme agus simpliú.'