Is é an Beartas Comhtháthaithe ‘gliú’ an Aontais

Cháin Uachtarán Choiste Eorpach na Réigiún (CnaR), Kata Tüttő, tograí ón gCoimisiún Eorpach chun an chaoi a mbainistítear cistí forbartha réigiúnaí an Aontais a athrú, ag áitiú go bhfuil éifeacht ‘chobhsaitheach’ ag an gcomhpháirtíocht atá ann cheana idir údaráis an Aontais, údaráis náisiúnta agus údaráis réigiúnacha ar an Aontas Eorpach.

Is é an Beartas Comhtháthaithe ‘an uirlis chobhsaíochta is tábhachtaí atá ag an Aontas’ agus ‘an uirlis infheistíochta is tábhachtaí atá aige’, a dúirt sí le lucht féachana de pholaiteoirí réigiúnacha na hÍsiltíre, agus thug sí rabhadh go lagódh tograí ón gCoimisiún Eorpach, a thiocfadh i bhfeidhm in 2028 dá nglacfaí leo, ‘gliú cobhsaíochta an Aontais’.

Bhí an tUachtarán Tüttő ag labhairt ag comhdháil bhliantúil Chumann Chúigí na hÍsiltíre (IPO), a chinn i mbliana teacht le chéile sa Bhruiséil seachas san Ísiltír chun ceiliúradh a dhéanamh ar chomóradh 25 bliana Theach Chúigí na hÍsiltíre, a fheidhmíonn mar chomhoifig thosaigh de 12 chúige na hÍsiltíre agus de IPO chuig an Aontas.

Labhair an tUachtarán Tüttő in éineacht le Wopke Hoekstra, an Coimisinéir Eorpach um an Aeráid, Glan-nialasacht agus Fás Glan, agus Cánachas.

Tá Uachtarán IPO, Arthur Van Dijk (NL/Renew Europe), Coimisinéir an Rí do Chúige Noord-Holland, i gceannas freisin ar thoscaireacht 12 chomhalta na hÍsiltíre chuig CnaR.

Luaigh:

Kata Tüttő, Uachtarán Choiste Eorpach na Réigiún: “Cuireann an t-imeacht seo i gcuimhne dom gurb é neart na hEorpa fanacht bunaithe ar réaltachtaí áitiúla. Idir aghaidh a thabhairt ar athléimneacht uisce agus dul i ngleic le brúnna buiséadacha, cuireann bardais na hÍsiltíre i gcuimhne dúinn cén fáth nach mór an beartas comhtháthaithe a bheith faoi stiúir áitiúil i gcónaí, seachas é a bheith láraithe. Agus muid ag féachaint chun cinn ar an CAI a bheidh ann amach anseo, tá sé ríthábhachtach an comhtháthú a chosaint mar ghliú cobhsaíochta an Aontais, agus tógáil ar fhíor-chomhpháirtíocht i measc údaráis an Aontais, na n-údarás náisiúnta agus na n-údarás réigiúnach.’