Éilíonn dúshláin uisce agus bia cumhachtaí áitiúla níos mó, leagann ceannairí réigiúnacha béim sa Veinéis

Chuir Roberto Ciambetti, Uachtarán Chomhairle Réigiúnach Veneto, fáilte roimh chomhaltaí Choiste Eorpach na Réigiún (CnaR) chuig an Veinéis an 20-21 Bealtaine le haghaidh cruinniú seachtrach den Choimisiún um Acmhainní Nádúrtha, in éineacht le comhdháil agus cuairt allamuigh dírithe ar athléimneacht ó thubaistí. Bhí plé ag an imeacht dhá lá freisin maidir le fís na réigiún agus na gcathracha do thodhchaí na talmhaíochta agus an bhia, chomh maith le straitéisí chun athléimneacht agus inbhuanaitheacht earnáil an fhíona a neartú, rud atá ríthábhachtach d’oidhreacht chultúrtha agus do chobhsaíocht eacnamaíoch na hEorpa.  

D’iarr comhaltaí an Choimisiúin um Acmhainní Nádúrtha (NAT)go mbeadh ról réigiúnach níos láidre ann maidir le todhchaí an bheartais talmhaíochta agus bia san Aontas Eorpach (AE) a mhúnlú. I dtuairim faoi stiúir Joke Schauvliege (BE/PPE), comhalta d’fheidhmeannas cúige Fhlóndras Thoir, leag na comhaltaí béim ar an ngá atá le hailíniú níos fearr idir beartais an Aontais, beartais náisiúnta, beartais réigiúnacha agus beartais áitiúla chun córas agraibhia athléimneach, cothrom agus inbhuanaithe a áirithiú faoi 2040. Cuireadh i dtábhacht sa tuairim nach mór don Chomhbheartas Talmhaíochta (CBT) an éagsúlacht réigiúnach a léiriú ar bhealach níos fearr, ualaí riaracháin a laghdú, agus tosaíocht a thabhairt do thacaíocht d’fheirmeoirí a bhfuil srianta nádúrtha orthu, d’fheirmeoirí óga agus nua, agus do chleachtais inbhuanaithe. 

Earnáil an fhíona a chosaint mar bhunchloch gheilleagar an Aontais

Tá an cur chuige réigiúnach sin thar a bheith práinneach do phríomhearnálacha amhail táirgeadh fíona, a fhostaíonn os cionn 3 mhilliún duine san Aontas agus a chuireann luach margaidh os cionn €100 billiún ar fáil. Tá earnáil an fhíona fós ina bunchloch de gheilleagar an Aontais, go háirithe i gceantair thuaithe, agus ina colún d’oidhreacht chultúrtha an Aontais ach tá dúshláin mhóra roimpi, amhail treochtaí athraitheacha tomhaltóirí, teannas geopholaitiúil idirnáisiúnta agus dálaí adhaimsire atá ag dul i méid. Bhí díospóireacht ag ceannairí réigiúnacha agus áitiúla faoi stiúir Roberto Ciambetti (IT/ECR) maidir le rialacha margaidh agus bearta tacaíochta in earnáil an fhíona, agus d’iarr siad go ndéanfaí gníomhaíochtaí chun táirgeoirí fíona a chosaint ar bhealach níos fearr ar bhagairtí seachtracha.  

An MOSE: scéal ratha Eorpach maidir le hathléimneacht ó thubaistí

De réir mar a leanann an t-athrú aeráide de bheith ag bagairt ar shlite beatha, ar gheilleagair áitiúla agus ar bhonneagar riachtanach, cuireann réitigh réigiúnacha nuálacha treoirphlean ar fáil don athléimneacht fhadtéarmach. Bhí an chomhdháil an 20 Bealtaine ina hardán chun na chéad torthaí ó staidéar ar ‘scéalta ratha áitiúla agus réigiúnacha maidir le hinfheistíocht a dhéanamh in athléimneacht ó thubaistí’ a chur i láthair. I measc na samplaí spreagúla bhí an tionscadal MOSE (Modulo Sperimentale Elettromeccanico), a raibh deis ag na rannpháirtithe cuairt a thabhairt air. Críochnaithe in 2020, cosnaíonn an bonneagar suaitheanta seo an Veinéis ar thuilte trí chóras bacainní soghluaiste a shuiteáiltear ag ionraonta Lagoon na Veinéise, rud a léiríonn réiteach ceannródaíoch ar leibhéil na farraige atá ag ardú agus ar theagmhais adhaimsire. 

Tuilleadh eolais ag an gcruinniú

Ghlac comhaltaí Choimisiún NAT tuairim maidir le cibearshlándáil ospidéal agus soláthraithe cúraim sláinte, faoi stiúir an rapóirtéara Daniela Cîmpean (RO/PPE), Uachtarán Chomhairle Contae Sibiu. Leagtar béim sa tuairim ar an ngéarghá atá le bearta cuimsitheacha chun cur i gcoinne cibearbhagairtí atá ag dul i méid, moltar go mbeadh na húdaráis réigiúnacha agus áitiúla níos rannpháirtí i múnlú straitéisí cibearshlándála agus iarrtar inti go gcuirfí feabhas ar an gcibearshláinteachas agus ar an gcibearoiliúint ar fud na hearnála cúraim sláinte. Tá sé beartaithe an tuairim a ghlacadh le linn an chéad seisiúin iomlánaigh eile de Choiste na Réigiún i mí Iúil.  

Sleachta

Piotr Calbecki (PL/PPE), Cathaoirleach Choimisiún NAT agus comhairleoir Chúige Kujawsko-Pomorskie: ‘Tá réigiún Kujawsko-Pomorskie agus réigiún Veneto nasctha le comhpháirtíocht atá ag éirí níos láidre, ar príomhshampla í dá ríthábhachtaí atá an comhar idir-réigiúnach laistigh den Aontas Eorpach. Táimid ag forbairt tionscnaimh chomhpháirteacha, ag malartú taithí, agus ag spreagadh a chéile – i réimsí an bheartais comhshaoil, na forbartha inbhuanaithe agus an bheartais shóisialta. Tá fíorthorthaí ag baint leis na comhpháirtíochtaí sin agus fágann siad gur féidir tionscadail chomhpháirteacha de chuid an Aontais a chur chun feidhme, geilleagair áitiúla a neartú, agus acmhainneachtaí na n-institiúidí réigiúnacha a fheabhsú.’ 

Roberto Ciambetti (IT/ECR), Céad Leas-Uachtarán NAT agus Uachtarán Chomhairle Réigiúnach Veneto: "Is éard atá i gceist le hobair Choimisiún NAT sa Veinéis ná Veneto a chur i gcomhthéacs idirnáisiúnta agus é a chlaochlú ina shaotharlann ónar féidir físeanna straitéiseacha i réimsí na talmhaíochta agus an chomhshaoil a fhorbairt, a mbeidh iarmhairtí Eorpacha aige agus a fhágfaidh go mbeidh na réigiúin ríthábhachtach do threo nua talmhaíochta an Aontais. Is comhartha é rannpháirtíocht iomlán chomhaltaí an Choimisiúin, arna n-óstáil in Sala Sansoviniana an Biblioteca Marciana, go raibh ár gcuid oibre táirgiúil agus éifeachtach.’ 

Rapóirtéir Joke Schauvliege (BE/PPE), comhalta d’fheidhmeannach cúige Fhlóndras Thoir: “Is tionscnamh tosaíochta í Fís an Choimisiúin Eorpaigh don Talmhaíocht agus don Bhia chun ioncaim chothroma a chinntiú d’fheirmeoirí, chun tacú go láidir le feirmeoirí óga agus chun athbhreithniú a dhéanamh ar an Treoir maidir le Cleachtais Éagóracha Trádála. Tá ról ríthábhachtach ag feirmeoirí maidir le slándáil bia, ceannasacht agus comhtháthú tuaithe a áirithiú ar fud na hEorpa. Dá bhrí sin, is earnáil straitéiseach an-tábhachtach í an talmhaíocht. Is mian le CnaR, sa tuairim seo, béim a leagan ar an ngá atá leis an ngné réigiúnach den Chomhbheartas Talmhaíochta a neartú agus na próisis riaracháin a shimpliú.’ 

Cúlra 

• Video agus grianghraif ón ócáid.  

• D’iarr Magali Altounian (FR/Renew), leasmhéara Nice agus cathaoirleach an Choimisiúin um Shaoránacht, Rialachas, Gnóthaí Institiúideacha agus Seachtracha (CIVEX)in CnaR, ar chomhaltaí CnaR páirt a ghlacadh sa Chomhghuaillíocht um Ardú na nAigéan agus um Athléimneacht Chósta a sheolfar go hoifigiúil le linn Cruinniú Mullaigh speisialta a thionólfar i gcathair Nice an 7 Meitheamh mar chuid de Chomhdháil na Náisiún Aontaithe maidir leis na hAigéin. Tacóidh an Chomhghuaillíocht le cathracha cósta trí na claochluithe is gá a phleanáil agus a chur chun feidhme chun aghaidh a thabhairt ar ardú ar leibhéal na farraige, ar chreimeadh cósta agus ar chóireálacha eile a bhaineann leis an athrú aeráide. 

Teagmháil

Hélène Dressen
Teil: +32 471502795
Helene.dressen@cor.europa.eu