Fóram an Aistrithe Ghlais i Sóifia: Tá fuinneamh faoi stiúir áitiúil agus gníomhú ar son na haeráide ríthábhachtach d’athléimneacht na hEorpa

Ghlac Coiste Eorpach na Réigiún páirt ghníomhach i bhFóram an Aistrithe Ghlais 6.0 i Sóifia an tseachtain seo. Labhair an tUachtarán Kata Tüttő i seisiún ardleibhéil an 4 Meitheamh in éineacht leis an gCoimisinéir Eorpach um an gComhshaol Jessica Roswall agus le hAire Comhshaoil na Bulgáire Rositsa Karamfi. Thionóil meitheal CnaR um an gComhaontú Glas ar an Leibhéal Áitiúil a cruinniú freisin mar chuid de chlár an Fhóraim an lá céanna. 

Ag labhairt dó ag an seisiún ardleibhéil maidir le ‘An Tionscal Ciorclach, Gníomhú ar son na hAeráide agus Athléimneacht Uisce – Aistriú Iomaíoch na hEorpa a chur chun cinn’, dúirt an tUachtarán Tüttő: “Ní éireoidh le claochlú na hEorpa ach amháin más féidir le daoine agus gnólachtaí áitiúla iad féin a fheiceáil ann. Ní raibh neart na hEorpa aonfhoirmeach riamh. Bhí sé i gcónaí ar a éagsúlacht de réitigh. Tá ár ndúshláin aeráide ag fás níos tapúla ná na hacmhainní atá ar fáil chun aghaidh a thabhairt orthu. Sa timpeallacht sin, is riachtanas daonlathach é gach glúin, go háirithe daoine óga, a bheith rannpháirteach.” 

‘Tógtar athléimneacht trí mhuinín, infheistíocht fhadtéarmach, pobail láidre agus an cumas oiriúnú. Sin é an fáth ar spreagadh mé go háirithe éisteacht leis an mBulgáir agus a tiomantas don Bheartas Comhtháthaithe á athdhearbhú aici sa chéad bhuiséad eile de chuid an Aontais. Tráth a bhfuil an éiginnteacht ag dul i méid, tá gá ag an Eoraip le beartas infheistíochta atá láidir, Eorpach agus díláraithe i ndáiríre – beartas lena neartaítear an t-iomaíochas agus an athléimneacht, lena dtacaítear leis an Margadh Aonair, agus lena mbaintear leas as acmhainneacht gach críche’, a leag Uachtarán CnaR béim air.

Tháinig comhaltaí Mheitheal CnaR um an gComhaontú Glas ar an Leibhéal Áitiúil le chéile i Sóifia an tráthnóna céanna. Trí dhea-chleachtais ón mBulgáir agus ó gach cearn den Eoraip a chur i láthair, leag an mheitheal béim ar ról an fhuinnimh in-athnuaite a tháirgtear go háitiúil maidir le dlús a chur le haistriú glan na hEorpa, borradh a chur faoin athléimneacht i gcoinne suaití seachtracha agus luaineacht praghsanna a laghdú.

Seo mar a labhair cathaoirleach na meithle um an gComhaontú Glas ar an Leibhéal Áitiúil, Markku Markkula (FI/PPE), Comhalta de Chomhairle Cathrach Espoo: “Is saincheist straitéiseach é an fuinneamh — saincheist lena gcinntear cumas na hEorpa gníomhú go neamhspleách agus freagairt go héifeachtach do bhrúnna domhanda. Sa chomhthéacs sin, tá na húdaráis áitiúla agus réigiúnacha ar an líne thosaigh. Ar fud na hEorpa, tá sé de chumas acu fuinneamh dúchasach a fhorbairt — cumhacht in-athnuaite a tháirgeadh go háitiúil, áit a n-ídítear é. Trí leas a bhaint as acmhainní áitiúla, is féidir linn córais fuinnimh a thógáil atá níos iontaofa, níos inacmhainne agus níos athléimní, agus a chinntiú ag an am céanna go bhfanfaidh tairbhí an aistrithe laistigh dár bpobail áitiúla.’

• Féach arís ar chruinniú na meithle um an gComhaontú Glas ar an Leibhéal Áitiúil
• Grianghraif ón bhFóram um an Aistriú Glas