Sprioc aeráide 2040: Teipfidh ar an Aontas má bhaineann an buiséad a bheidh ann amach anseo an bonn de ghníomhaíocht na réigiún agus na gcathracha, arsa ceannairí CnaR

Mhol an Coimisiún Eorpach sprioc aeráide 2040 an Aontais chun laghdú 90% a dhéanamh ar ghlanastaíochtaí gás ceaptha teasa (GCT) i gcomparáid le leibhéil 1990. Tugann ceannaireacht Choiste Eorpach na Réigiún rabhadh nach mbainfear an sprioc amach gan buiséad de chuid an Aontais lena dtacaítear le hiarrachtaí ar an leibhéal áitiúil agus réigiúnach.

Seo mar a labhair Kata Tüttő, Uachtarán Choiste Eorpach na Réigiún: “Ba iad na réigiúin agus na cathracha a spreag dul chun cinn ollmhór na hEorpa maidir le héifeachtúlacht fuinnimh agus táirgeadh in-athnuaite, iompar inbhuanaithe, glasú uirbeach agus nuálaíocht ghlas thionsclaíoch, maidir leis na dúshláin aeráide uile. Tharla sé sin freisin a bhuí leis na deicheanna de bhlianta de thacaíocht mhéadaithe ón mbeartas comhtháthaithe don ghníomhú áitiúil ar son na haeráide. Táimid tiomanta i gcónaí glanastaíochtaí gás ceaptha teasa an Aontais a laghdú 90 % faoi 2040, ach ní féidir a shamhlú é sin má chuireann buiséad an Aontais tar éis 2027 deireadh leis an mbeartas réigiúnach agus má chuireann sé bac ar na húdaráis réigiúnacha agus áitiúla príomhinfheistíochtaí a mhúnlú agus a chur i gcrích. Cé gur díol sásaimh do CnaR gur breithníodh bearta solúbthachta i gceapadh na reachtaíochta a bheidh ann amach anseo chun an sprioc a bhaint amach, creidimid nár cheart do sholúbthachtaí den sórt sin an bonn a bhaint d’iarrachtaí dícharbónaithe an Aontais.

Bheadh contrárthacht shoiléir ann idir sprioc aeráide thromchúiseach a mholadh do 2040 agus buiséad fadtéarmach AE atá ró-lárnaithe agus níos boichte, idir an obair luachmhar laethúil a dhéanann réigiúin agus cathracha leis na Coimisinéirí Eorpacha agus le stiúrthóireachtaí an Choimisiúin atá i gceannas ar an aeráid, ar bheartas réigiúnach, ar an gcomhshaol, ar fhuinneamh, ar iompar agus ar an smaoineamh an comhar a theorannú do rialtais náisiúnta. Mura gcuirfear na réigiúin agus na cathracha i gcroílár an chéad Chreata Airgeadais Ilbhliantúil eile, ní chaillfear sprioc aeráide 2040 an Aontais – ní thiocfaidh deireadh léi. Is sna réigiúin agus sna cathracha a bhainfear amach an gníomhú ar son na haeráide. Gan iad a chumhachtú, iompaíonn an uaillmhian ina seachmall. Tacaímid go hiomlán leis an sprioc atá beartaithe, ach ní bheidh siad inchreidte ach amháin más rud é, an 16 Iúil, go gcuirfidh an togra nua buiséid na hacmhainní ar fáil do réigiúin agus do chathracha chun iad a chur i gcrích.

Táimid ag súil freisin go múnlóidh an sprioc Rannchuidiú uaillmhianach an Aontais arna Chinneadh go Náisiúnta roimh COP30 UNFCCC, agus go mbeidh na cathracha agus na réigiúin ina bpríomhfheidhmeoirí.”

Seo mar a labhair an Chéad Leas-Uachtarán ar Choiste Eorpach na Réigiún, Juanma Moreno, a bhí ina rapóirtéir ar an Dlí Aeráide Eorpach freisin: “Tá sé ríthábhachtach go gcuirfidh an chéad Chreat Airgeadais Ilbhliantúil eile na réigiúin agus na cathracha i gcroílár ghníomhú Eorpach ar son na haeráide. San Andalucía, tá iarracht shuntasach déanta againn: tá ár n-astaíochtaí laghdaithe againn, táimid tiomanta don gheilleagar ciorclach, agus tá an inbhuanaitheacht ina treoirphrionsabal dár n-aistear i dtreo pobal níos glaise, níos athléimní agus níos ullmhaithe don todhchaí. Leis an tiomantas sin, táimid ar an gconair i dtreo Sprioc Aeráide 2040 a bhaint amach cheana féin.

Mar sin féin, ní bheifear in ann an sprioc sin a bhaint amach mura gcuirfear na hacmhainní is gá ar fáil do na réigiúin agus mura n-aithneofar go hiomlán an ról lárnach atá acu. Is iad na réigiúin a spreagann an claochlú; is sinne an talamh ina múnlaítear beartais Eorpacha. Agus más mian leis an Eoraip go mbeadh na beartais sin éifeachtach, cothrom agus inláimhsithe, ní mór di a muinín a chur ionainn.”

Teagmháil:
Lauri Ouvinen
Teil: +32 473 536 887
lauri.ouvinen@cor.europa.eu