It-tiswir ta’ futur tal-IA ċċentrat fuq il-bniedem: Konferenza f’Malta tgħaqqad il-Mexxejja Lokali, Reġjonali u tal-UE flimkien

Illum il-Kummissjoni SEDEC tal-Kumitat tar-Reġjuni organizzat konferenza ta’ livell għoli f’Malta. Ir-Reġjun tal-Lvant ospita l-avveniment b'kollaborazzjoni mal-Assoċjazzjoni tal-Kunsilli Lokali (Malta). L-avveniment laqqa’ flimkien mexxejja ewlenin tal-UE, nazzjonali u lokali biex jiddiskutu l-potenzjal trasformattiv tal-Intelliġenza Artifiċjali (IA) għar-reġjuni u l-bliet tal-Ewropa.

Fost il-kelliema ewlenin kien hemm il-Ministru għall-Intern u l-Impjiegi ta’ Malta, Byron Camilleri, u l-Ministru għall-Finanzi, Clyde Caruana, li enfasizzaw il-viżjoni strateġika tal-gvern nazzjonali għal trasformazzjoni diġitali responsabbli u l-integrazzjoni tal-IA f’setturi bħall-amministrazzjoni pubblika, is-sigurtà, u l-iżvilupp tal-forza tax-xogħol.

Il-konferenza inkludiet ukoll il-parteċipazzjoni attiva tas-Sindki Lokali u l-membri tad-Delegazzjoni Maltija tal-Kumitat Ewropew tar-Reġjuni, u rappreżentanti ewlenin tal-Kummissjoni SEDEC tal-KtR, inkluż il-President Heike Raab. Il-mexxejja lokali u reġjonali enfasizzaw l-importanza li l-innovazzjoni diġitali tiġi allinjata mal-inklużjoni soċjali u l-valuri demokratiċi.

Anthony Chircop (MT/PPE), President tar-Reġjun tal-Lvant: “F’isem il-Kunsill Reġjonali tal-Lvant, ninsab umli u onorat li nista’ nospita konferenza dwar kwistjoni rilevanti u importanti bħal din mal-kollegi Ewropej tagħna. L-użu tal-IA fuq il-post tax-xogħol, fl-iskola, fid-dar u b’mod pjuttost litterali fil-ħajja tagħna ta’ kuljum dejjem qed jiżdied. Mingħajr kura u edukazzjoni xierqa, ċerti partijiet tal-komunitajiet tagħna jirriskjaw li jitħallew lura hekk kif il-progress tal-IA ġenerattiva jiżdied b’pass dejjem akbar. Għalhekk, konferenzi bħal din huma vitali biex jiġi żgurat li l-politika żżomm il-pass mal-progress tat-teknoloġija”. 

Heike Raab, President tas-SEDEC u Segretarju tal-Istat, Gvern tal-Istat ta’ Rhineland Palatinate, qalet: “Bħala awtoritajiet lokali u reġjonali, ninsabu f’pożizzjoni unika biex nifhmu r-realtajiet ta’ kuljum tal-impatt tal-IA fuq iċ-ċittadini — mill-bidliet fl-impjiegi għall-governanza tad-data. Il-Kummissjoni SEDEC qed tippromovi approċċ għat-tranżizzjoni diġitali ċċentrat fuq in-nies u bbażat fuq id-drittijiet. L-għan tagħna huwa li niżguraw li l-IA tintuża b’mod responsabbli, inklużiv u trasparenti — qatt bħala għodda għall-esklużjoni jew għas-sorveljanza, iżda bħala forza għal tkabbir sostenibbli u politika pubblika aktar intelliġenti.”

Glenn Micallef, il-Kummissarju tal-UE għall-Ġustizzja Interġenerazzjonali, iż-Żgħażagħ, il-Kultura u l-Isport, indirizza l-konferenza permezz ta’ messaġġ bil-vidjo u ddikjara: “Illum diġà qed naraw l-IA tgħinna nidentifikaw u nneħħu kontenut dannuż online-minn deepfakes għal materjal u sfruttament ta’ abbuż sesswali tat-tfal. U l-potenzjal tagħha li tagħmel dan aktar malajr, b'mod aktar preċiż u fuq skala akbar minn qatt qabel, qed jikber kuljum. Dawn it-teknoloġiji għandhom jintużaw biex jipproteġu lit-tfal u liż-żgħażagħ – mhux biex jipperswaduhom.” 

Id-diskussjonijiet tal-konferenza koprew firxa ta’ sfidi u opportunitajiet relatati mal-IA, b’mod partikolari fil-qafas leġiżlattiv tal-UE li qed jevolvi, l-Att dwar l-Intelliġenza Artifiċjali, u d-diskrepanza fil-ħiliet diġitali. L-awtoritajiet lokali u reġjonali qasmu eżempji ta’ kif l-IA diġà qed tintuża biex timmodernizza s-servizzi pubbliċi, bħal sistemi ta’ mobbiltà intelliġenti, analitika mħaddma bl-IA għas-sikurezza tal-komunità, u chatbots tal-gvern lokali biex jittejjeb l-aċċess taċ-ċittadini.

Hekk kif il-Kummissjoni Ewropea tħejji biex tippreżenta l-baġit fit-tul li jmiss tal-UE wara l-2027 f’Lulju, huma mistennija li jiġu definiti strumenti finanzjarji ġodda biex l-Unjoni tkun tista’ twettaq prijoritajiet ewlenin bħas-sigurtà, il-kompetittività, u t-tranżizzjonijiet diġitali u ekoloġiċi. F’dan il-kuntest, il-mexxejja lokali u reġjonali enfasizzaw li l-investiment diġitali fil-livell reġjonali huwa kruċjali biex jitnaqqas id-distakk fl-innovazzjoni u jiġi żgurat li l-ebda territorju ma jitħalla jibqa’ lura.

L-avveniment afferma mill-ġdid ir-rwol kritiku tal-gvernijiet sottonazzjonali fl-iżgurar li l-iżvilupp u l-użu tal-IA jibqgħu msejsa fuq is-sorveljanza demokratika, il-prinċipji etiċi, u l-ħtiġijiet ta’ kuljum taċ-ċittadini tal-Ewropa.

L-Assoċjazzjoni tal-Kunsilli Lokali u r-Reġjun tal-Lvant affermaw mill-ġdid l-impenn tagħhom li jkomplu dan id-djalogu u jibnu strateġiji konġunti għal tranżizzjoni diġitali aktar intelliġenti u ġusta fit-territorji Ewropej kollha.

Sfond 

Vidjow mill-avveniment.