Todhchaí IS atá dírithe ar an duine a mhúnlú: Tugann Comhdháil i Málta Ceannairí Áitiúla, Réigiúnacha agus AE le chéile

Reáchtáil Coimisiún SEDEC Choiste na Réigiún comhdháil ardleibhéil i Málta inniu. D'óstáil Réigiún an Oirthir an t-imeacht i gcomhar le Cumann na gComhairlí Áitiúla (Málta). Ag an imeacht, tugadh le chéile príomhcheannairí an Aontais, ceannairí náisiúnta agus ceannairí áitiúla chun plé a dhéanamh ar acmhainneacht chlaochlaitheach na hIntleachta Saorga (IS) do réigiúin agus do chathracha na hEorpa.

I measc na bpríomhchainteoirí bhí Aire Gnóthaí Baile agus Fostaíochta Mhálta, Byron Camilleri, agus an tAire Airgeadais, Clyde Caruana, a leag béim ar fhís straitéiseach an rialtais náisiúnta maidir le claochlú digiteach freagrach agus comhtháthú IS ar fud earnálacha amhail riarachán poiblí, slándáil agus forbairt an lucht saothair.

Bhí na Méaraí Áitiúla agus comhaltaí Thoscaireacht Mhálta de Choiste Eorpach na Réigiún, agus príomhionadaithe Choimisiún SEDEC CnaR, lena n-áirítear an Cathaoirleach Heike Raab, rannpháirteach go gníomhach sa chomhdháil freisin. Leag na ceannairí áitiúla agus réigiúnacha béim ar a thábhachtaí atá sé an nuálaíocht dhigiteach a ailíniú leis an gcuimsiú sóisialta agus le luachanna daonlathacha.

Anthony Chircop (MT/PPE), Uachtarán Réigiún an Oirthir: “Thar ceann Chomhairle Réigiúnach an Oirthir, is mór an onóir dom a bheith in ann comhdháil a óstáil lenár gcomhghleacaithe Eorpacha maidir le saincheist chomh hábhartha agus chomh tábhachtach sin. Tá méadú ag teacht i gcónaí ar úsáid IS san ionad oibre, ar scoil, sa bhaile agus go litriúil inár saol laethúil. Gan cúram agus oideachas cuí, tá an baol ann go bhfágfar codanna áirithe dár bpobail ar lár de réir mar a théann dul chun cinn na hintleachta saorga giniúnaí chun cinn ar luas atá ag dul i méid i gcónaí. Dá bhrí sin, tá comhdhálacha mar seo ríthábhachtach chun a chinntiú go gcoinníonn beartas suas le dul chun cinn na teicneolaíochta". 

Seo mar a labhair Heike Raab, Cathaoirleach agus Státrúnaí SEDEC, Rialtas Stáit Phalaitíneacht Dhúiche na Réine: “Mar údaráis áitiúla agus réigiúnacha, táimid in ann tuiscint a fháil ar réaltachtaí laethúla thionchar IS ar shaoránaigh — ó aistrithe fostaíochta go rialachas sonraí. Tá SEDEC ag tacú le cur chuige duinelárnach atá bunaithe ar chearta i leith an aistrithe dhigitigh. Tá sé mar aidhm againn a áirithiú go n-úsáidfear an intleacht shaorga go freagrach, go cuimsitheach agus go trédhearcach – ní mar uirlis eisiaimh ná faireachais riamh, ach mar fhórsa don fhás inbhuanaithe agus do bheartas poiblí níos cliste.’

Dúirt Glenn Micallef, an Coimisinéir Eorpach um Chothroime Idirghlúine, um an Óige, um Chultúr agus um Spórt, an méid seo a leanas ag an gcomhdháil: "Sa lá atá inniu ann, feicimid IS ag cabhrú linn ábhar díobhálach ar líne a bhrath agus a bhaint - ó dhomhainbhrionnuithe go hábhar mí-úsáide gnéasaí leanaí agus teacht i dtír gnéasach ar leanaí. Agus tá a chumas é seo a dhéanamh níos tapúla, níos cruinne agus ar scála níos mó ná riamh, ag fás faoin lá. Ní mór na teicneolaíochtaí sin a úsáid chun leanaí agus daoine óga a chosaint – seachas iad a chreachadh.’ 

Cumhdaíodh i bplé na comhdhála raon dúshlán agus deiseanna a bhaineann leis an intleacht shaorga, go háirithe i gcreat reachtach an Aontais atá ag teacht chun cinn, sa Ghníomh um an Intleacht Shaorga, agus sa bhearna scileanna digiteacha. Roinn na húdaráis áitiúla agus réigiúnacha samplaí den chaoi a bhfuil an intleacht shaorga á húsáid cheana féin chun seirbhísí poiblí a nuachóiriú, amhail córais soghluaisteachta chliste, anailísíocht atá cumhachtaithe ag an intleacht shaorga ar mhaithe le sábháilteacht an phobail, agus botaí comhrá rialtais áitiúil chun rochtain na saoránach a fheabhsú.

Agus an Coimisiún Eorpach ag ullmhú chun an chéad bhuiséad fadtéarmach eile de chuid an Aontais tar éis 2027 a chur i láthair i mí Iúil, meastar go saineofar ionstraimí airgeadais nua chun é a chur ar a chumas don Aontas príomhthosaíochtaí amhail an tslándáil, an t-iomaíochas, agus an t-aistriú digiteach agus an t-aistriú glas a bhaint amach. Sa chomhthéacs sin, chuir na ceannairí áitiúla agus réigiúnacha i bhfios go láidir go bhfuil infheistíocht dhigiteach ar an leibhéal réigiúnach ríthábhachtach chun an bhearna nuálaíochta a dhúnadh agus chun a áirithiú nach bhfágfar aon chríoch ar lár.

Athdhearbhaíodh ag an imeacht an ról ríthábhachtach atá ag rialtais fhonáisiúnta chun a áirithiú go mbeidh forbairt agus imscaradh IS fréamhaithe i maoirseacht dhaonlathach, i bprionsabail eiticiúla, agus i riachtanais laethúla shaoránaigh na hEorpa.

D’athdhearbhaigh Comhlachas na gComhairlí Áitiúla agus Réigiún an Oirthir a dtiomantas leanúint den idirphlé sin agus straitéisí comhpháirteacha a fhorbairt le haghaidh aistriú digiteach níos cliste agus níos cothroime ar fud chríocha uile na hEorpa.

Cúlra 

Físeán ón ócáid.