Ma nistgħux nieħdu passi lura fil-koeżjoni, iwissi l-Kumitat Ewropew tar-Reġjuni f’Santander

Biex ifakkar it-30 anniversarju tal-Kumitat Ewropew tar-Reġjuni (KtR) u l-40 anniversarju tal-adeżjoni ta’ Spanja mal-Unjoni Ewropea, il-Gvern ta’ Cantabria qed jorganizza seminar f’Santander mit-3 sal-5 ta’ Settembru dwar il-futur tal-politika ta’ koeżjoni u r-rwol trasformattiv tagħha fir-reġjuni Spanjoli. Juanma Moreno, l-Ewwel Viċi President tal-Kumitat Ewropew tar-Reġjuni u President tal-Andalusija, intervjena fis-sessjoni tal-ftuħ biex jesprimi t-tħassib tiegħu dwar il-proposta l-ġdida tal-Kummissjoni Ewropea għall-baġit pluriennali li jmiss tal-UE li fih il-ġestjoni tal-fondi ta’ koeżjoni tkun ċentralizzata fil-livell nazzjonali.

Għall-konferenza attendew diversi membri tad-delegazzjoni Spanjola għall-Kumitat Ewropew tar-Reġjuni, inkluż l-Ewwel Viċi President tal-KtR Juanma Moreno u l-presidenti ta’ Cantabria, María José Sáenz de Buruaga (PPE),Galicia, Alfonso Rueda Valenzuela (PPE), u Castilla-La Mancha, Emiliano García-Page (PSE). Fl-interventi tal-ftuħ tagħhom, l-erba’ presidenti reġjonali enfasizzaw il-kontribut tal-politika ta’ koeżjoni għall-benesseri u l-iżvilupp fi Spanja u r-rwol tal-Kumitat Ewropew tar-Reġjuni bħala l-vuċi tal-awtoritajiet lokali u reġjonali fl-Ewropa: vuċi li jeħtieġ li tinstema’ issa meta jiġi ppjanat il-Qafas Finanzjarju Pluriennali tal-UE li jmiss. 

“Il-konverġenza bejn ir-reġjuni sinjuri u dawk foqra ssaħħaħ il-kompetittività, tnaqqas id-disparitajiet reġjonali, u trawwem tkabbir sostenibbli u inklużiv. Kulħadd irrikonoxxa l-ħtieġa għal politika ta’ koeżjoni serja, iżda l-Kummissjoni Ewropea qed tipproponi baġit pluriennali li jpoġġi ħafna minn dak li nkiseb f’riskju. Il-fużjoni tal-fondi kollha fi pjan nazzjonali uniku u ċ-ċentralizzazzjoni tad-distribuzzjoni fl-Istati Membri jistgħu jirriżultaw fl-abbandun tal-ħtiġijiet tat-territorji, "qal l-Ewwel Viċi President Moreno. 

“Issa aktar minn qatt qabel ir-reġjuni jridu jaħdmu biex jindirizzaw dan it-tfassil ġdid tal-baġit tal-UE, sabiex ma nitilfux il-vuċi li għandna llum fil-ġestjoni tal-fondi Ewropej tar-reġjuni tagħna u nevitaw li nieħdu passi lura fil-koeżjoni. Ninsab fiduċjuż li l-ħidma li se nagħmlu flimkien se tagħti l-frott u li kemm il-Kummissjoni kif ukoll il-Kunsill Ewropew, kif ukoll il-Parlament Ewropew, se jisimgħu r-reġjuni," ikkonkluda l-President tal-Andalusija.