Is díol sásaimh iad tograí an Aontais maidir leis an imirce dhleathach
Ar an leathanach seo
- Imirce, tearmann agus imeascadh eachtrannach
Sna moltaí ó Choiste Eorpach na Réigiún, sainaithnítear bealaí inar féidir le cathracha rochtain ar phoist a éascú, dlús a chur lena lánpháirtiú, agus iad a spreagadh chun gnólachtaí a thosú.
Ba cheart tiomantas an Aontais Eorpaigh oibrithe oilte a mhealladh ó lasmuigh dá theorainneacha a bheith soiléir ag gach céim den phróiseas imirce, a deir Coiste Eorpach na Réigiún i dtuairim ina maítear gur féidir le cathracha cabhrú leis an Aontas agus lena Bhallstáit feabhas a chur ar an mbainistiú a dhéanann siad ar an imirce dhleathach. Áitíonn na moltaí freisin gur leag an cogadh san Úcráin béim ar an ngá atá le dlús a chur leis an aitheantas a thugtar do scileanna dídeanaithe – saincheist atá ríthábhachtach dá lánpháirtiú agus do gheilleagair áitiúla.
Moltaí a mhol Coiste Eorpach na Réigiún sa tuairim An imirce dhleathach – Scileanna agus tallanna a mhealladh chuig an Aontas Eorpach, tá siad ceaptha rochtain ar phoist a éascú do dhídeanaithe agus d’imircigh oilte, dlús a chur lena lánpháirtiú, agus iad a spreagadh chun gnólachtaí a thosú. Tugtar le fios sna moltaí, chun feabhas a chur ar earcaíocht, gur cheart go mbeadh imircigh in ann iarratais a thaisceadh ó thríú tíortha agus, chun feabhas a chur ar lánpháirtiú inimirceach agus ar chumas gnólachtaí a chur ar bun, gur cheart go bhfaigheadh údaráis áitiúla agus réigiúnacha tacaíocht níos mó do chláir lánpháirtíochta agus fiontraíochta. Tacaíonn an tuairim freisin le smaointe chun cur ar chumas imirceach dleathach dul ar aghaidh chun a ngairmeacha beatha a fhorbairt i dtíortha eile san Aontas.
Ba dhíol sásaimh do rapóirtéir na tuairime – Giuseppe Varacalli (IT/Renew Europe), comhalta de Chomhairle Bhardasach Gerace – an cur chuige níos straitéisí i leith na himirce dleathaí atá á mholadh ag an gCoimisiún Eorpach, ach thathantaigh sé air comhar níos fearr a spreagadh leis na húdaráis áitiúla agus réigiúnacha agus leis an tsochaí shibhialta áitiúil. Is féidir leo, a dúirt sé, cuidiú le léargas níos fearr a thabhairt ar riachtanais na bpobal agus na ngeilleagar áitiúil agus ar riachtanais na n-imirceach dleathach iad féin.
Dúirt an tUasal Varacalli: “Aithnímid go bhfuil ról lárnach ag imircigh cheana féin i ngeilleagar agus i sochaí na hEorpa. Ní mór dúinn a bheith go maith chun imircigh a mhealladh go dlíthiúil – go háirithe iad siúd a bhfuil scileanna agus tallann acu – chun fás a spreagadh san Eoraip, atá ag éirí níos mó agus níos mó ina ‘sean-ilchríoch de sheandaoine’. Ba cheart dóibh a bheith in ann fanacht le cead fadtéarmach arna dheonú ar theacht isteach dóibh agus a bheith in ann bogadh idir na Ballstáit agus, ar ndóigh, na cearta céanna a bheith acu. Smaoiníonn go leor daoine ar an imirce mar fhadhb. I ndáiríre, is deis iontach é, má dhéantar é a bhainistiú go maith.’
Áitítear sa tuairim go ndéanfaí iarracht níos comhbheartaithe chun a áirithiú go mbeidh cóir chomhionann ag náisiúnaigh tríú tír san ionad oibre agus ó thaobh rochtain ar shochair slándála sóisialta de. Tugann sé dá aire go raibh inimircigh ríthábhachtach chun soláthar seirbhísí poiblí a áirithiú le linn phaindéim COVID-19, agus leagann sé béim ar an tábhacht a d’fhéadfadh a bheith leo in aistriú an Aontais chuig geilleagar glas.
Tá sé d’aidhm ag an Aontas Eorpach pacáiste mór tograí a ghlacadh faoi mhí Feabhra 2024 laistigh den Chomhshocrú Nua maidir le hImirce agus Tearmann, arb é is aidhm dó feabhas a chur ar nósanna imeachta imirce, lena n-áirítear cumas an Aontais tallann a mhealladh agus tacú le lánpháirtiú iarrthóirí tearmainn agus imirceach i bpobail áitiúla.
Is díol sásaimh don tuairim ó CnaR na hiarrachtaí atá á ndéanamh ag an gCoimisiún Eorpach nósanna imeachta a chuíchóiriú chun cabhrú le himircigh dhleathacha ceadanna oibre agus cónaithe a fháil, agus chun é a dhéanamh níos éasca dóibh cónaí fadtéarmach a fháil. Chuir CnaR in iúl freisin go dtacaíonn sé leis na hiarrachtaí chun deiseanna staidéir, taistil agus oibre san Aontas a chur ar fáil do dhaoine óga ó lasmuigh den Aontas, trí – mar shampla – na comhpháirtíochtaí tallainne leis an Afraic Thuaidh a seoladh le déanaí.
Cuirtear i dtábhacht sna moltaí ó CnaR, áfach, go bhfuil gá le freagairt níos solúbtha ar shaintréithe cineálacha áirithe imirceach agus ar riachtanais eacnamaíocha. Is díol sásaimh don tuairim tionscadal píolótach de chuid an Aontais – Linn Tallainne an Aontais Eorpaigh – lena gcuirtear ar chumas dídeanaithe agus imirceach dleathach fostóirí a bhfuil suim acu ina gcuid scileanna a aimsiú, ach cuireann sí in iúl freisin gur gá níos mó beartas de chuid an Aontais a bheith inrochtana do dhídeanaithe. Leagtar béim ann freisin ar a thábhachtaí atá sé aitheantas a thabhairt do na cineálacha scileanna gairme is gá – mar shampla – in earnálacha amhail earnáil an fhuinnimh a bheidh ríthábhachtach don aistriú chuig geilleagar glas. Ag an am céanna, tá an tuairim "gur cheart go mbeadh na daoine sin a bhfuil a mbuanna sna healaíona mar chuid den chothromóid", agus go bhféadfaí oibriú go dlíthiúil san AE.
Teagmháil:
Andrew Gardner
Teil. +32 473 843 981