Guthanna óga a chumhachtú: Phléigh Coimisiún SEDEC fostaíocht, rannpháirtíocht agus nuálaíocht don aos óg i Sóifia

D’eagraigh an Coimisiún um Beartas Sóisialta, Oideachas, Fostaíocht, Taighde agus Cultúr (SEDEC) i gCoiste Eorpach na Réigiún, in éineacht le Comhairle Bhardasach Shóifia, seimineár i Sóifia na Bulgáire, an 7 Samhain, chun ról rannpháirtíocht na hóige sa tsochaí agus sa gheilleagar a phlé.

Ag an seimineár, tugadh le chéile ionadaithe ó institiúidí Eorpacha, ó údaráis áitiúla agus náisiúnta, ó eagraíochtaí don óige agus ó mhoil nuálaíochta chun plé a dhéanamh ar an ról ríthábhachtach atá ag Eorpaigh óga mar chomhpháirtithe gníomhacha maidir le hathléimneacht shóisialta agus eacnamaíoch cathracha agus réigiún a neartú agus maidir le todhchaí na hEorpa a mhúnlú.

Le linn an chéad phainéil, ‘The Youth Guarantee on the Ground – Local Solutions for Real Inclusion’ [An Ráthaíocht don Aos Óg ar an Talamh – Réitigh Áitiúla le haghaidh Fíorchuimsiú], phléigh na rannpháirtithe conas straitéisí ar leibhéal an Aontais a ailíniú ar bhealach níos fearr, amhail Straitéis Óige na hEorpa agus an Ráthaíocht don Aos Óg, le tionscnaimh áitiúla agus réigiúnacha chun rannpháirtíocht na hóige a fhíorú ar an láthair, lena n-áirithítear ní hamháin go spreagtar í i bprionsabal ach go gcuirtear chun feidhme go héifeachtach í sa chleachtas ar fud chríocha na hEorpa.

Sa dara painéal, ‘Ó Scileanna Áitiúla go Gnólachtaí Nuathionscanta Áitiúla – Nuálaíocht na hÓige a Chothú’, léiríodh samplaí d’fhiontraíocht na hóige agus d’éiceachórais nuálaíochta. Leag na rannpháirtithe béim ar a thábhachtaí atá an fhiontraíocht faoi stiúir na hóige, forbairt scileanna agus an claochlú digiteach mar phríomhspreagthaí don fhás inbhuanaithe agus don nuálaíocht i gcathracha agus i réigiúin na hEorpa. 

An 5-6 Samhain, ghlac comhaltaí SEDEC páirt sa cheardlann ‘Fothú Acmhainneachta don Nuálaíocht le haghaidh Claochlú Áitbhunaithe’ ag Toplocentrala, an tIonad um Ealaíona Comhaimseartha i Sóifia a d’eagraigh an tAirmheán Comhpháirteach Taighde. Leis an imeacht dhá lá, cuireadh comhar, piarfhoghlaim agus foghlaim phraiticiúil chun cinn maidir le príomhthéamaí amhail digitiú, oiriúnú don athrú aeráide, an geilleagar ciorclach agus rannpháirtíocht na hóige.

 Sleachta:

Heike Raab (DE/PSE), Státrúnaí, Rialtas Stáit Phalaitíneacht Dhúiche na Réine agus Cathaoirleach Choimisiún SEDEC: “Tá ceannairí áitiúla agus réigiúnacha ar an líne thosaigh maidir le daoine óga a chumhachtú trí spásanna a chruthú inar féidir leo a bheith ag obair, a bheith nuálach agus éisteacht a fháil. Tá a fhios againn go gcuirtear tús le rannpháirtíocht na hóige inár gcathracha agus inár réigiúin. Is ionann infheistíocht a dhéanamh i ndaoine óga go háitiúil agus an daonlathas, an comhtháthú agus todhchaí inbhuanaithe na hEorpa a neartú.’

Tsvetelina Simeonova-Zarkin (BG/Renew E), Comhairleoir Bardais i gComhairle Bhardasach Shóifia: “I Sóifia, creidimid nach é an todhchaí amháin atá i ndán do dhaoine óga — tá ár gcathracha á múnlú acu cheana féin sa lá atá inniu ann. Chun iad a chumhachtú, ní mór muinín, meantóireacht agus fíordheiseanna ceannaireachta a thabhairt dóibh.’

Cúlra

 Físeán ón ócáid.