Leagann Coiste na Réigiún béim ar ról na réigiún sa bhonneagar taighde agus teicneolaíochta

D’óstáil Coiste Eorpach na Réigiún (CnaR), in éineacht le hArd-Stiúrthóireacht an Taighde agus na Nuálaíochta sa Choimisiún Eorpach, seimineár ardleibhéil sa Bhruiséil an 5 Bealtaine chun plé a dhéanamh ar an gcaoi ar féidir le straitéis nua na hEorpa maidir le bonneagair thaighde agus theicneolaíochta éiceachórais nuálaíochta réigiúnacha a neartú agus iomaíochas domhanda an Aontais a threisiú.

Thug an t-imeacht, a bhí ar siúl in CnaR, lucht ceaptha beartas, ceannairí réigiúnacha agus saineolaithe taighde agus nuálaíochta le chéile chun plé a dhéanamh ar an gcaoi a bhféadfadh tírdhreach bonneagair Eorpach níos comhordaithe agus níos inrochtana barr feabhais áitiúil a nascadh ar bhealach níos fearr le huaillmhianta straitéiseacha níos leithne an Aontais Eorpaigh.

Ag oscailt an tseimineáir, leag Tanya Hristova (BG/PPE), Méara Gabrovo agus Céad Leas-Chathaoirleach Choimisiún COR um Beartas Sóisialta, Oideachas, Fostaíocht, Taighde agus Cultúr (SEDEC), béim ar a thábhachtaí atá sé réigiúin agus cathracha a chur i gcroílár chlár oibre nuálaíochta an Aontais. Chuir sí i bhfios go láidir nach iad na húdaráis áitiúla agus réigiúnacha amháin a chuireann beartais chun feidhme, ach gur gníomhaithe straitéiseacha iad freisin atá in ann éiceachórais nuálaíochta iomaíocha a mhúnlú agus forbairt eacnamaíoch inbhuanaithe a chur chun cinn.

Leag Eszter Lakos (HU/PPE), comhalta de Choiste Pharlaimint na hEorpa um Thionsclaíocht, um Thaighde agus um Fhuinneamh (ITRE), béim ar an ngá atá le hinfheistíochtaí bonneagair a ailíniú le tosaíochtaí tionsclaíocha agus teicneolaíocha an Aontais. Luaigh sí freisin a thábhachtaí atá sé sineirgí níos láidre a chruthú idir ionstraimí cistiúcháin an Aontais agus acmhainneachtaí réigiúnacha chun an tionchar fadtéarmach a uasmhéadú.

Leag ionadaithe ardleibhéil ón gCoimisiún Eorpach béim ar an ngá atá le héiceachóras bonneagair níos comhordaithe agus níos inrochtana ar fud na hEorpa. Chuir siad chun suntais go mbeidh sé ríthábhachtach feabhas a chur ar rochtain trasteorann ar bhonneagair do thaighdeoirí, do nuálaithe agus don tionscal chun iomaíochas agus feidhmíocht nuálaíochta na hEorpa a neartú.

Le linn an phlé, leag na rannpháirtithe béim ar ról lárnach na gcathracha agus na réigiún maidir le bonneagair thaighde agus theicneolaíochta a óstáil agus a chomhtháthú in éiceachórais nuálaíochta áitiúla, lena nasctar ollscoileanna, FBManna, údaráis phoiblí agus an tionsclaíocht.

Le linn dhíospóireacht an phainéil, shainaithin cainteoirí ilroinnt agus rochtain mhíchothrom ar bhonneagair mar phríomhdhúshláin do thírdhreach nuálaíochta na hEorpa. An tráth céanna, tharraing siad aird ar dheiseanna suntasacha chun comhar a mhéadú, luachshocrú eolais a neartú agus comhpháirtíochtaí trasréigiúnacha a fhorbairt.

Sa seisiún deiridh, chuir Markku Markkula (FI/PPE), comhalta de Chomhairle Cathrach Espoo agus rapóirtéir na tuairime ó CnaR maidir le ‘Straitéis Eorpach um Bonneagar Taighde agus Teicneolaíochta’, príomhtheachtaireachtaí agus príomh-mholtaí na hinstitiúide maidir leis an ábhar i láthair. Chuir sé i bhfios go láidir nach mór cur chuige Eorpach rathúil a bheith bunaithe ar rialachas il-leibhéil níos láidre, chun a áirithiú go mbeidh na húdaráis áitiúla agus réigiúnacha rannpháirteach go hiomlán i ndearadh agus i gcur chun feidhme na straitéise. Leag sé béim freisin ar a thábhachtaí atá sé a áirithiú go mbeidh tairbhí nithiúla ag baint le hinfheistíochtaí bonneagair do shaoránaigh agus do chríocha, lena n-áirítear poist nua, forbairt scileanna agus iomaíochas réigiúnach feabhsaithe.

Tháinig an seimineár chun críche agus comhthuiscint ann go mbeidh neart nuálaíochta an Aontais amach anseo ag brath ar a chumas barr feabhais réigiúnach a nascadh le fís straitéiseach choiteann, rud a fhágfaidh go mbeidh tírdhreach bonneagair éagsúil ina líonra Eorpach atá comhtháite agus iomaíoch ar fud an domhain.

Sleachta

Heike Raab (DE/PSE), Státrúnaí Rialtas Stáit Phalaitíneacht Dhúiche na Réine agus cathaoirleach SEDEC: “Is sócmhainní straitéiseacha iad bonneagair thaighde agus theicneolaíochta atá á n-óstáil agus á gcómhaoiniú ag údaráis áitiúla agus réigiúnacha. Tógann na réigiúin agus na cathracha na héiceachórais a thugann beatha dóibh - ag nascadh ollscoileanna, eagraíochtaí taighde, FBManna, gnólachtaí nuathionscanta agus seirbhísí poiblí."

Tanya Hristova (BG/PPE), Méara Gabrovo agus Céad Leas-Chathaoirleach SEDEC: "Tá an aidhm soiléir: bonneagar taighde agus teicneolaíochta na hEorpa a chlaochlú ina líonra nasctha, inrochtana agus iomaíoch, agus a áirithiú ag an am céanna go mbainfidh pobail áitiúla tairbhe ghníomhach as a láithreacht.”

Cúlra

• Video agus grianghraif ón seimineár.
• Is tionscnamh comhpháirteach é an tArdán um Malartú Eolais (KEP) idir Ard-Stiúrthóireacht an Taighde agus na Nuálaíochta sa Choimisiún Eorpach agus Coiste Eorpach na Réigiún, faoin bPlean Comhpháirteach Gníomhaíochta (24 Aibreán 2026) a shínigh na hinstitiúidí le déanaí le haghaidh comhar feabhsaithe sa taighde agus sa nuálaíocht. Tacaíonn ardán KEP le hidirphlé idir institiúidí an Aontais, údaráis réigiúnacha agus áitiúla, agus páirtithe leasmhara maidir le beartais taighde agus nuálaíochta, agus béim ar leith á leagan ar chur chun feidhme ar an leibhéal réigiúnach agus áitiúil.
• Leagtar amach sa Straitéis Eorpach nua maidir le bonneagair thaighde agus theicneolaíochta fís fhadtéarmach le haghaidh éiceachóras bonneagair níos comhordaithe agus níos inrochtana ar fud na hEorpa. Is é is aidhm don straitéis bonneagair a nascadh le líonra comhleanúnach, rannpháirtíocht réigiúnach a neartú agus a áirithiú go nginfidh infheistíochtaí nuálaíochta tairbhí nithiúla eacnamaíocha agus sochaíocha ar fud na gcríoch uile.