Leagtar béim i seimineár COTER ar an gcaoi a bhfuil an Beartas Comhtháthaithe ag tacú leis an iomaíochas agus leis an nuálaíocht ar an leibhéal réigiúnach

Díríodh sa seimineár a d’eagraigh Coimisiún COTER in Trieste na hIodáile an 29 Deireadh Fómhair ar ghné an rialachais il-leibhéil den Bheartas Comhtháthaithe mar bheartas infheistíochta díláraithe, agus ar an méid a chuireann sé le tacú leis an iomaíochas agus leis an nuálaíocht i gcríocha an Aontais.

Tháinig thart ar 30 ceannaire áitiúil agus réigiúnach ó gach cearn den Eoraip le chéile in Trieste an 29 Deireadh Fómhair chun freastal ar an seimineár a d’eagraigh Coimisiún CnaR um Beartas Comhtháthaithe Chríochaigh agus um Buiséad AE (COTER), arna óstáil ag Réigiún Féinrialaitheach Friuli Venezia Giulia.

D’oscail Emil Boc (RO/PPE), leaschathaoirleach COTER agus Méara chathair Cluj-Napoca na Rómáine, in éineacht le hUachtarán an Réigiúin Fhéinrialaithigh, Massimiliano Fedriga (IT/ECR), an t-imeacht a bhí dírithe ar léiriú a thabhairt ar an gcaoi a bhfuil iomaíochas an Aontais agus nuálaíocht áitbhunaithe á neartú ag tionscadail nuálacha arna gcómhaoiniú ag an mBeartas Comhtháthaithe.

Ag tosú le samplaí nithiúla de thionscadail lena gcothaítear an t-aistriú tionsclaíoch agus an nuálaíocht ar an leibhéal áitiúil, bhí malartú tuairimí ag comhaltaí COTER freisin maidir leis an gcaoi a leanfaidh an Beartas Comhtháthaithe de thacaíocht a thabhairt don nuálaíocht sa tréimhse 2028-2034, mar chuid de na pleananna nua Comhpháirtíochta Náisiúnta agus Réigiúnaí atá á n-ullmhú faoi láthair.

Rinne ceannairí áitiúla agus réigiúnacha iniúchadh freisin le hAire Airgeadais Friuli Venezia Giulia, Barbara Zilli, samplaí praiticiúla de straitéisí críochacha comhtháite, lena n-áirítear iad siúd a thacaíonn le comhar trasteorann, lena léirítear rannchuidiú uathúil an Bheartais Chomhtháthaithe leis an bhforbairt réigiúnach.

Cheadaigh an seimineár do rannpháirtithe dul níos faide ná plé institiúideach chun taithí a fháil agus aird a tharraingt ar a bhfuil á bhaint amach go hiarbhír ag an mBeartas Comhtháthaithe ar an láthair, do ghnólachtaí, do phobail agus do shaoránaigh.

Eagraíodh an t-imeacht ag tráth an-tábhachtach do thodhchaí an Bheartais Comhtháthaithe, ós rud é go bhfuil an chaibidlíocht maidir leis an gcéad bhuiséad fadtéarmach eile de chuid an Aontais do 2028-2034 faoi lán seoil. Chuir Uachtaránacht na hÉireann ar Chomhairle an Aontais Eorpaigh togra nuashonraithe i láthair le déanaí, an "bosca caibidlíochta", le haghaidh comhaontú a bhfuil sé mar aidhm ag na Ballstáit é a bhaint amach faoi dheireadh na bliana.

Leis an struchtúr nua atá beartaithe do bhuiséad an Aontais, atá bunaithe ar Phlean Comhpháirtíochta Náisiúnta agus Réigiúnaí aonair do gach Ballstát, déanfar cistí comhtháthaithe agus talmhaíochta a chumasc in aon bhuiséad amháin, rud a léiríonn athrú bunúsach ar an gcaoi a ndéanfar an Beartas Comhtháthaithe a phleanáil agus a chur i gcrích. ‘Ní hé an teachtaireacht atá againn nár cheart athrú a dhéanamh ar an mBeartas Comhtháthaithe, ach nach mór don nuachóiriú a dhéanfar air cur leis an méid a oibríonn’, a dúirt Leas-Chathaoirleach COTER, Emil Boc.

Cuireadh deireadh leis an imeacht le cuairt staidéir ar PiazzaTransalpina, arna roinnt ag Gorizia (an Iodáil) agus Nova Gorica (an tSlóivéin), a athchóiríodh le tacaíocht ón mBeartas Comhtháthaithe mar chuid d’infheistíocht chríochach chomhtháite trasteorann. Ghlac méaraí an dá chathair, Rodolfo Ziberna agus Samu Turel, páirt i seimineár COTER le haghaidh díospóireacht leis na comhaltaí.

Déanfaidh Coiste Eorpach na Réigiún a mhachnamh ar na ceachtanna agus ar an taithí a roinneadh in Trieste, rud a chuirfidh go mór leis an obair leanúnach atá á déanamh ar thodhchaí an Bheartais Comhtháthaithe.

Tuilleadh eolais

• Físeáin agus pictiúir den seimineár seachtrach.

• Chun míniú soiléir agus inrochtana a thabhairt ar a bhfuil na réigiúin agus na cathracha ag súil leis ón gcéad bhuiséad eile de chuid an Aontais, agus leas á bhaint as tuairimí a glacadh agus as doiciméid ghaolmhara, sheol an Coiste an t-ardán ‘Ask Jacques’ faoi thiomáint IS. Bain triail as agus cuir do cheist!