Pléann CnaR agus Parlaimint na hEorpa comhar níos dlúithe maidir le buiséad an Aontais agus ról na réigiún

An 12 Deireadh Fómhair, bhí malartú tuairimí ag Comhdháil na nUachtarán i gCoiste Eorpach na Réigiún (CnaR) le Younous Omarjee, Leas-Uachtarán Pharlaimint na hEorpa atá freagrach as an gcaidreamh le CnaR. Díríodh sa phlé ar an gcomhar idir an dá institiúid a neartú, go háirithe maidir leis an gcéad bhuiséad eile de chuid an Aontais, ról na réigiún agus na gcathracha, agus tionchar críochach reachtaíocht an Aontais.

Leis an gcéad Chreat Airgeadais Ilbhliantúil eile, tugadh deis thábhachtach do CnaR agus do Pharlaimint na hEorpa oibriú i ndlúthchomhar le chéile, agus an dá institiúid ailínithe den chuid is mó lena seasaimh. Chuir na rannpháirtithe i bhfios go láidir go leanfaidh an comhar sin de bheith tábhachtach le linn na caibidlíochta chun an beartas comhtháthaithe, an rialachas il-leibhéil agus ról na réigiún agus na gcathracha a chosaint. Phléigh siad go háirithe na Pleananna Comhpháirtíochta Náisiúnta agus Réigiúnaí atá beartaithe, agus leag siad béim ar an ngá atá le ról a thabhairt do na húdaráis áitiúla agus réigiúnacha agus le hathnáisiúnú bheartais agus chistiú an Aontais a sheachaint. Chuir Younous Omarjee i bhfios go láidir gur cheart do bhuiséad an Aontais a bheidh ann amach anseo tacú leis an dlúthpháirtíocht, leis an iomaíochas agus le slándáil na hEorpa gan íobairt a dhéanamh ar a réigiúin. Dhearbhaigh sé go gcosnódh Parlaimint na hEorpa ról na réigiún le linn na caibidlíochta.

Cuireadh i dtábhacht sa mhalartú freisin tuilleadh dul chun cinn faoin gComhaontú Comhair idir an dá institiúid. Tá an comhar idir rapóirtéirí CnaR agus a gcontrapháirtithe i bParlaimint na hEorpa tar éis éirí níos minice, agus tá rapóirtéirí CnaR ag glacadh páirt níos mó i gcruinnithe ábhartha na gcoistí parlaiminteacha. D’iarr na rannpháirtithe go mbeadh comhar idir rapóirtéirí, coistí parlaiminteacha agus coimisiúin CnaR níos rialta, níos intuartha agus níos substaintiúla, agus go leathnófaí é chuig réimsí beartais breise.

Sainaithníodh comhar níos dlúithe maidir le measúnuithe tionchair chríochaigh ex ante agus measúnuithe cur chun feidhme chríochaigh ex post mar thosaíocht eile. Chuideodh sé sin lena áirithiú go ndéanfaí éifeachtaí reachtaíocht an Aontais ar réigiúin agus ar chathracha a mheas le linn an phróisis ceaptha beartas.

Ba dhíol sásaimh do na rannpháirtithe freisin an dul chun cinn atá déanta maidir le tuairimí reachtacha CnaR a dhéanamh níos feiceálaí laistigh d’uirlisí Pharlaimint na hEorpa. Tá scrúdú á dhéanamh ag Parlaimint na hEorpa ar conas feabhas a chur ar infheictheacht thuairimí neamhreachtacha CnaR, rud a chuideoidh le dearcthaí na n-údarás áitiúil agus réigiúnach a thabhairt isteach i raon níos leithne díospóireachtaí beartais Eorpacha.

Léiríodh sa phlé uaillmhian chomhroinnte CnaR agus Pharlaimint na hEorpa cur leis an dul chun cinn atá déanta cheana agus comhpháirtíocht níos dlúithe agus níos struchtúrtha a fhorbairt, go háirithe i gcomhthéacs an chéad Chreata Airgeadais Ilbhliantúil eile, lena n-áiritheofar go gcloisfear guth na réigiún agus na gcathracha le linn phróiseas ceaptha beartas an Aontais.

Tabhair faoi deara: Bhí Uachtarán CnaR, Kata TÜTTŐ, ina chathaoirleach ar an malartú tuairimí le Leas-Uachtarán Pharlaimint na hEorpa, Younous OMARJEE agus d’fhreastail an Chéad Leas-Uachtarán ar CnaR, Juanma MORENO, Luca MENESINI, Marco MARSILIO, Willy BORSUS, Declan MCDONNELL, agus Niina RATILAINEN air.