Príomhábhar imní is ea an déimeagrafaíocht maidir le bualadh le polaiteoirí Mhontainéagró

Tháinig comhaltaí Choiste Eorpach na Réigiún (CnaR) agus polaiteoirí áitiúla ó Mhontainéagró le chéile i mBerane, Montainéagró, an 20 Deireadh Fómhair chun plé a dhéanamh ar phróiseas aontachais na tíre leis an Aontas Eorpach ón taobh áitiúil de agus ar na dúshláin dhéimeagrafacha atá os comhair na n-údarás áitiúil.

Ba é an cruinniú an cúigiú huair is fiche a tionóladh an Comhchoiste Comhairliúcháin idir CnaR agus Montainéagró agus bhí an-dóchas ann go bhféadfadh Montainéagró formheas a fháil i mbliana chun bheith ar an ochtú comhalta is fiche den Aontas. Bhí ionchais aontachais na tíre – go háirithe gné áitiúil an phróisis aontachais – ina n-ábhar do sheisiún tiomnaithe inar chuir oifigigh Mhontainéagró agus an Aontais a measúnuithe ar fáil.

Is iad Nikola Dobroslavić (HR/PPE), Cathaoirleach Thionól Contae Dubrovnik-Neretva sa Chróit, agus Radoš Žugić, Méara Žabljak, comhchathaoirligh an Chomhchoiste Comhairliúcháin.

Mhol an tUasal Dobroslavić agus comhaltaí eile de CnaR Montainéagró as an dul chun cinn atá déanta aige i dtreo ballraíocht san Aontas, ach thug sé rabhadh go bhféadfaí a mheas go ndéanann gníomhaíochtaí roinnt polaiteoirí ardchéime i Montainéagró coirpigh chogaidh a ghlóiriú agus, dá bhrí sin, nach bhfuil siad ag luí le huaillmhianta na tíre maidir leis an Aontas.

Ba é an cruinniú i Montainéagró an chéad chruinniú de shraith cúig cinn a thionóil CnaR i réigiúin na mBalcán Thiar ag deireadh an fhómhair. Thug gach ceann acu deis do chomhaltaí CnaR agus do pholaiteoirí áitiúla agus réigiúnacha i dtíortha comhpháirtíochta machnamh a dhéanamh ar athchóirithe a bhaineann leis an Aontas ó thaobh na bpobal áitiúil de, chomh maith le hábhar imní ar leith a phlé do riaracháin áitiúla agus réigiúnacha sa tír óstach.

I Montainéagró, scrúdaigh comhaltaí an Chomhchoiste Comhairliúcháin na himpleachtaí d’údaráis áitiúla a bhaineann leis an laghdú leanúnach ar an daonra in aois oibre. D’aontaigh comhaltaí agus saineolaithe an Chomhchoiste Comhairliúcháin gur cheart aghaidh a thabhairt ar dhúshláin dhéimeagrafacha le cur chuige cuimsitheach, agus chuir siad i bhfios go láidir go mbeadh dreasachtaí airgeadais do thuismitheoirí óga cabhrach ach i bhfad ó bheith leordhóthanach.

Cuireann an Comhchoiste Comhairliúcháin fóram ar fáil don idirphlé agus don chomhar idir CnaR agus Montainéagró maidir le saincheisteanna a bhaineann leis an daonlathas áitiúil agus réigiúnach agus le lánpháirtiú na tíre san Aontas.

Tuilleadh eolais:

• Doiciméid an chruinnithe: Clár oibre.