Téann réigiúin agus cathracha an Aontais i gcomhar le Clár Comhshaoil na Náisiún Aontaithe chun dlús a chur le gníomhaíocht il-leibhéil ar son na haeráide agus an chomhshaoil

Shínigh Coiste Eorpach na Réigiún (CnaR) agus Clár Comhshaoil na Náisiún Aontaithe (UNEP) Plean Comhpháirteach Gníomhaíochta chun acmhainneachtaí na n-údarás áitiúil agus réigiúnach a neartú agus chun borradh a chur faoin gcomhar idirnáisiúnta idir na húdaráis sin faoi CnaR agus rialtais fhonáisiúnta ar fud an domhain chun aghaidh a thabhairt ar an ngéarchéim phláinéadach thriarach.

An 28 Márta, bhuail Uachtarán CnaR, Kata Tüttő, le Stiúrthóir Feidhmiúcháin Chlár Comhshaoil na Náisiún Aontaithe, lnger Andersen, chun plé a dhéanamh ar na chéad chéimeanna eile i gcur chun feidhme an Phlean Gníomhaíochta Chomhpháirtigh, arb é is aidhm dó borradh a chur faoin gcomhar idir an dá pháirtí i réimsí an mhaolaithe ar an athrú aeráide agus an oiriúnaithe don athrú sin, an truaillithe comhshaoil, athbhunú an dúlra agus chosaint na bithéagsúlachta. 

Tacaíonn an plean gníomhaíochta le rannpháirtíocht na rialtas áitiúil agus réigiúnach i gcur chun feidhme comhaontuithe, coinbhinsiún agus creataí idirnáisiúnta maidir leis an aeráid agus leis an gcomhshaol, i logánú na Spriocanna Forbartha Inbhuanaithe agus i bpróisis chinnteoireachta Chlár Comhshaoil na Náisiún Aontaithe. Beartaítear leis imeachtaí comheagraithe agus gníomhaíochtaí comhpháirteacha lena bhféadfar tionscnaimh ábhartha Chlár Comhshaoil na Náisiún Aontaithe a scaipeadh agus a phlé le polaiteoirí áitiúla agus réigiúnacha san Aontas. 

Seo mar a labhair Kata Tüttő, Uachtarán Choiste Eorpach na Réigiún: “Is í an Eoraip an mhór-roinn is mó téamh ar domhan, agus tá cathracha agus réigiúin ar an líne thosaigh i gcoinne thionchair dhíreacha an athraithe aeráide, chailliúint na bithéagsúlachta agus an truaillithe. San Aontas Eorpach, is iad na húdaráis áitiúla agus réigiúnacha atá freagrach as 70 % de na bearta maidir le maolú ar an athrú aeráide agus 90 % de na beartais maidir le hoiriúnú don athrú aeráide a chur chun feidhme. Trí oibriú i gcomhar le Clár Comhshaoil na Náisiún Aontaithe (UNEP), tá sé mar aidhm againn aitheantas iomlán a rannchuidithe a chur chun cinn ar an leibhéal Eorpach agus ar an leibhéal idirnáisiúnta, go háirithe i bhfianaise an chéad bhabhta eile de Rannchuidithe arna gCinneadh go Náisiúnta (NDCanna) atá le cur isteach do COP30 sa Bhrasaíl.’

Seo mar a labhair Inger Andersen, Stiúrthóir Feidhmiúcháin Chlár Comhshaoil na Náisiún Aontaithe (UNEP): “Tá ceannaireacht láidir chomhshaoil á léiriú cheana féin ag réigiúin agus cathracha ar fud na hEorpa agus tá réitigh inbhuanaithe á gcur in oiriúint acu do réaltachtaí áitiúla. Tá Coiste na Réigiún ríthábhachtach chun dul i dteagmháil leis na rialtais áitiúla, chun na Spriocanna Forbartha Inbhuanaithe a logánú agus chun spriocanna comhshaoil Eorpacha agus domhanda a chomhtháthú i saol laethúil na cathrach.”

Tuilleadh eolais:

Síníodh an Plean Comhpháirteach Gníomhaíochta idir CnaR agus Clár Comhshaoil na Náisiún Aontaithe i mí Eanáir 2025. Leagtar amach ann an creat comhair don tréimhse 2025-2030, bunaithe ar an Meabhrán Tuisceana idir Coiste na Réigiún agus Clár Comhshaoil na Náisiún Aontaithe a síníodh in 2012. D’fhonn an comhar idir rialtais fhonáisiúnta a neartú, tá pleananna gníomhaíochta comhpháirteacha ag CnaR freisin le ICLEI, Réigiúin4, Comhghuaillíocht Faoi2 agus PEN-Aeráide.