Ir-reġjuni u l-bliet tal-UE jingħaqdu mal-UNEP biex jaċċelleraw l-azzjoni klimatika u ambjentali f’diversi livelli

Il-Kumitat Ewropew tar-Reġjuni (KtR) u l-Programm tan-Nazzjonijiet Uniti għall-Ambjent (UNEP) iffirmaw Pjan ta’ Azzjoni Konġunt biex isaħħu l-kapaċitajiet u jagħtu spinta lill-kooperazzjoni internazzjonali tal-awtoritajiet lokali u reġjonali taħt il-KtR ma’ gvernijiet sottonazzjonali madwar id-dinja biex jindirizzaw il-kriżi planetarja tripla.

Fit-28 ta’ Marzu, il-President tal-KtR Kata Tüttő iltaqgħet mad-Direttur Eżekuttiv tal-UNEP lnger Andersen biex tiddiskuti l-passi li jmiss fl-implimentazzjoni tal-Pjan ta’ Azzjoni Konġunt, li għandu l-għan li jagħti spinta lill-kooperazzjoni taż-żewġ partijiet fl-oqsma tal-mitigazzjoni tat-tibdil fil-klima u l-adattament għalih, it-tniġġis ambjentali, ir-restawr tan-natura u l-protezzjoni tal-bijodiversità. 

Il-pjan ta’ azzjoni jappoġġja l-involviment tal-gvernijiet lokali u reġjonali fl-implimentazzjoni ta’ ftehimiet, konvenzjonijiet u oqfsa internazzjonali dwar il-klima u l-ambjent, fil-lokalizzazzjoni tal-Għanijiet ta’ Żvilupp Sostenibbli u fil-proċessi tat-teħid tad-deċiżjonijiet tal-UNEP. Huwa jipprevedi avvenimenti koorganizzati u azzjonijiet konġunti li ser jippermettu wkoll it-tixrid u d-diskussjoni ta’ inizjattivi rilevanti tal-UNEP mal-politiċi lokali u reġjonali fl-UE. 

Kata Tüttő, il-President tal-Kumitat Ewropew tar-Reġjuni, qalet: “L-Ewropa hija l-kontinent li qed isaħħan l-aktar malajr fid-dinja, u l-bliet u r-reġjuni jinsabu fuq quddiem nett kontra l-impatti diretti tat-tibdil fil-klima, it-telfien tal-bijodiversità, u t-tniġġis. Fl-UE, l-awtoritajiet lokali u reġjonali huma responsabbli għall-implimentazzjoni ta’ 70 % tal-miżuri ta’ mitigazzjoni tat-tibdil fil-klima, u 90 % tal-politiki ta’ adattament għat-tibdil fil-klima. Billi naħdmu flimkien mal-UNEP, l-għan tagħna huwa li navvanzaw ir-rikonoxximent sħiħ tal-kontribut tagħhom fil-livell Ewropew u fix-xena internazzjonali, speċjalment fid-dawl taċ-ċiklu li jmiss ta’ Kontributi Stabbiliti fil-Livell Nazzjonali (NDCs) li għandhom jiġu ppreżentati għall-COP30 fil-Brażil.”

Inger Andersen, id-Direttur Eżekuttiv tal-Programm tan-Nazzjonijiet Uniti għall-Ambjent (UNEP), qal: “Ir-reġjuni u l-bliet madwar l-Ewropa diġà qed juru tmexxija ambjentali b’saħħitha u qed ifasslu soluzzjonijiet sostenibbli għar-realtajiet lokali. Il-Kumitat tar-Reġjuni huwa kruċjali fl-involviment mal-gvernijiet lokali, fil-lokalizzazzjoni tal-Għanijiet ta’ Żvilupp Sostenibbli u fl-integrazzjoni tal-għanijiet ambjentali Ewropej u globali fil-ħajja ta’ kuljum tal-bliet.”

Għal aktar informazzjoni:

Il-Pjan ta’ Azzjoni Konġunt bejn il-KtR u l-UNEP ġie ffirmat f’Jannar 2025. Dan jistabbilixxi l-qafas ta’ kooperazzjoni għall-perjodu 2025-2030, ibbażat fuq il-Memorandum ta’ Qbil bejn il-KtR u l-UNEP iffirmat fl-2012. Bil-għan li tissaħħaħ il-kooperazzjoni bejn il-gvernijiet sottonazzjonali, il-KtR għandu wkoll pjani ta’ azzjoni konġunti mal-ICLEI,  Regions4, Under2 Coalition u Climate-KIC.