Ir-reġjuni u l-bliet jeħtieġu aktar riżorsi biex jilħqu l-objettivi ambjentali tal-UE

Il-mexxejja lokali u reġjonali fakkru li d-distakk persistenti bejn l-ambizzjonijiet meħtieġa u l-implimentazzjoni fid-dinja reali tal-leġiżlazzjoni ambjentali tal-UE jista’ jingħalaq biss jekk il-bliet u r-reġjuni jiksbu appoġġ finanzjarju u amministrattiv aktar immirat. Ir-rakkomandazzjonijiet huma parti minn Opinjoni mħejjija mill-President tar-Reġjun tal-Umbria Stefania Proietti (IT/PSE) u adottata mill-Kumitat Ewropew tar-Reġjuni (KtR) fl-14 ta’ Ottubru.

Skont ir-raba’ Rieżami tal-Implimentazzjoni Ambjentali ppreżentat mill-Kummissjoni Ewropea fl-2025, il-kost annwali tan-nuqqas ta’ implimentazzjoni tar-regoli ambjentali huwa stmat għal madwar EUR 180 biljun fil-livell tal-UE, minħabba l-kostijiet tal-kura tas-saħħa, l-imwiet prematuri, il-ħtieġa għal miżuri urġenti, u t-telf tas-servizzi tal-ekosistema.

L-Opinjoni tal-KtR tenfasizza li l-konformità mal-leġislazzjoni ambjentali mhijiex piż iżda strateġija ekonomika kosteffettiva biex jiġu evitati spejjeż ogħla fil-futur: id-distakk fl-implimentazzjoni jista’ jitnaqqas b’investiment annwali ta’ EUR 122 biljun. Madankollu, il-membri tal-Kummissjoni ENVE tal-KtR u l-Parlament Ewropew wissew aktar kmieni din il-ġimgħa li t-tnaqqis propost għall-baġit fit-tul li jmiss tal-UE jirriskja li jdgħajjef il-kapaċità tal-awtoritajiet lokali u reġjonali li jaġixxu.

Il-mexxejja lokali u reġjonali laqgħu l-isforzi mmirati lejn is-semplifikazzjoni amministrattiva iżda enfasizzaw li dawn qatt ma għandhom iwasslu għal deregolamentazzjoni moħbija jew standards ta’ protezzjoni aktar baxxi. Peress li l-awtoritajiet lokali u reġjonali jimplimentaw parti kbira mil-leġislazzjoni ambjentali tal-UE, il-Kummissjoni Ewropea għandha tisfrutta aktar l-esperjenza tagħhom dwar l-effiċjenza prattika u d-diffikultajiet possibbli fl-implimentazzjoni li jistgħu jiffaċċjaw fil-prattika.

Il-KtR qed jappella wkoll biex il-valutazzjoni tal-impatti soċjali u territorjali ssir pilastru tar-Rieżamijiet futuri tal-Implimentazzjoni Ambjentali, sabiex jitkejlu l-ispejjeż u l-benefiċċji għall-popolazzjoni, b’mod partikolari l-gruppi f’riskju ta’ faqar enerġetiku, tal-ilma jew tal-mobbiltà.

Bħalissa, hemm aktar minn 300 proċedura attiva ta’ ksur tal-UE dwar il-leġiżlazzjoni ambjentali, li minnhom 45 % huma marbuta mat-tniġġis, li juru d-diffikultajiet biex tiġi żgurata l-implimentazzjoni fl-UE kollha. Il-KtR qed jitlob li l-proċeduri ta’ monitoraġġ u ksur jiġu kkomplementati b’“assistenza proattiva għall-implimentazzjoni” aktar b’saħħitha għall-awtoritajiet lokali u reġjonali, li tipprovdi għodod operazzjonali effettivi, aċċess għall-informazzjoni, appoġġ tekniku mmirat u riżorsi finanzjarji aċċessibbli. Huma jirrakkomandaw ukoll l-iżvilupp ta’ mekkaniżmi innovattivi sabiex ir-rikavat minn penali ambjentali u sistemi ta’ tassazzjoni fuq it-tniġġis ikun jista’ jgħin il-ħtiġijiet ta’ implimentazzjoni fil-prattika, b’mod partikolari fir-reġjuni affettwati.

Il-KtR jiffoka wkoll fuq l-ekonomija ċirkolari bħala l-lieva strateġika għall-kompetittività, ir-reżiljenza u l-awtonomija strateġika tal-Ewropa u r-reġjuni tagħha u jistieden lill-UE tappoġġja s-suq tal-materja prima sekondarja, billi tagħmilhom ekonomikament kompetittivi mar-riżorsi verġni primarji u tiżgura prezzijiet ġusti li jippremjaw territorji bi prestazzjoni tajba.

Barra minn hekk, l-Opinjoni tissottolinja l-importanza li l-prinċipju “la tagħmilx ħsara sinifikanti” jiġi applikat orizzontalment b’mod proporzjonat fil-politiki u l-investimenti kollha tal-UE, filwaqt li jiġi skoraġġut l-investiment f’teknoloġiji li jfixklu u jnaqqsu r-ritmu tad-dekarbonizzazzjoni u l-ilħuq tal-miri ambjentali.

Kwotazzjoni

Rappourteur Stefania Proietti (IT/PSE), President tar-Reġjun tal-Umbria: “Il-politika ambjentali tal-UE taħdem biss jekk tkun tista’ tiġi implimentata f’kull belt u reġjun, u b’mod ekwu u ġust. Ir-Rieżami tal-Implimentazzjoni Ambjentali huwa mument ewlieni tal-verità: x’jaħdem, x’ma jaħdimx, x’inhu l-impatt soċjali u territorjali tal-leġiżlazzjoni tal-UE u fejn huwa meħtieġ l-appoġġ. It-tranżizzjoni mhux se tirnexxi, jekk isserraħ biss fuq dawk l-aktar dgħajfa fis-soċjetà. Il-bliet u r-reġjuni jeħtieġu regoli stabbli, finanzjament adegwat u għarfien espert tekniku. Is-semplifikazzjoni trid tagħmel l-implimentazzjoni aktar faċli, speċjalment għal awtoritajiet lokali u reġjonali iżgħar u gruppi vulnerabbli fis-soċjetà, u ma ddgħajjifx il-protezzjoni ambjentali.”

L-isfond

• Ritratti u filmati mis-Sessjoni Plenarja.
• Segwi l-kont tas-Servizz tal-Istampa fuq X.