Is-semplifikazzjoni m’għandhiex tipperikola l-protezzjoni ambjentali jew iċċaqlaq il-piż fuq il-bliet u r-reġjuni

Ir-reġjuni u l-bliet jikkritikaw l-approċċ “omnibus” tal-Kummissjoni Ewropea li jipproponi li jerġgħu jinfetħu d-direttivi riveduti reċentement, u jħeġġu lill-UE tibqa’ fit-triq it-tajba għal ambizzjoni ta’ tniġġis żero.

Ir-reġjuni u l-bliet enfasizzaw li l-intenzjoni tal-Kummissjoni Ewropea li tissemplifika l-leġiżlazzjoni ambjentali u tnaqqas il-piżijiet amministrattivi għan-negozji m’għandhiex tittrasferixxi r-responsabbiltajiet amministrattivi, finanzjarji jew ta’ infurzar lill-awtoritajiet lokali u reġjonali mingħajr miżuri ta’ appoġġ adegwati.

F’Opinjoni adottata fis-sessjoni plenarja tiegħu tas-7 ta’ Mejju, il-Kumitat Ewropew tar-Reġjuni (KtR) esprima wkoll tħassib li xi wħud mill-bidliet proposti fl-hekk imsejjaħ pakkett Omnibus Ambjentali jirriskjaw li jnaqqsu l-istandards ambjentali. Huma ssottolinjaw li l-UE trid tibqa’ impenjata lejn l-ambizzjoni tagħha ta’ tniġġis żero.

Fl-Opinjoni tiegħu – abbozzata minn Nadia Pellefigue (FR/PSE), Viċi President tar-Reġjun ta’ Occitanie – il-KtR laqa’ l-għan li jissaħħu l-kompetittività u r-reżiljenza tal-industrija tal-UE filwaqt li enfasizza li l-isforzi ta’ semplifikazzjoni m’għandhomx ifixklu l-kisba tal-objettivi ambjentali tal-UE, jew iwasslu għal piżijiet jew spejjeż addizzjonali għall-awtoritajiet lokali u reġjonali. Kwalunkwe responsabbiltà ġdida, bħall-introduzzjoni ta’ punti uniċi ta’ kuntatt, jenħtieġ li titqabbel ma’ appoġġ finanzjarju, tekniku u amministrattiv suffiċjenti, speċjalment għal muniċipalitajiet iżgħar li jiffaċċjaw restrizzjonijiet ta’ kapaċità u ta’ riżorsi.

Il-KtR jenfasizza li l-UE għandha żżomm standards għoljin f’oqsma bħall-politika dwar is-sustanzi kimiċi, il-kontroll tat-tniġġis, il-protezzjoni tal-bijodiversità, il-ġestjoni tal-iskart u l-emissjonijiet industrijali. Huwa jissottolinja li kwalunkwe miżura ta' simplifikazzjoni trid tirrispetta bis-sħiħ il-prinċipju "la tagħmilx ħsara sinifikanti" u tikkonforma mal-prinċipji ta' prekawzjoni, azzjoni preventiva, rettifika fis-sors u min iniġġes iħallas.

Ir-reġjuni u l-bliet jikkritikaw ukoll l-approċċ omnibus tal-Kummissjoni Ewropea, li jiġbor flimkien ħafna bidliet leġiżlattivi ma’ – fil-fehma tagħhom – koerenza limitata, mingħajr valutazzjonijiet tal-impatt iddedikati u bi proċessi ta’ konsultazzjoni limitati ħafna. Filwaqt li jindika li ċ-ċertezza legali u l-kredibbiltà ambjentali huma prekundizzjonijiet għall-kompetittività, il-KtR iwissi kontra l-ftuħ mill-ġdid prematur ta’ direttivi riveduti reċentement mingħajr żmien biex jiġu vvalutati l-effetti tagħhom.

L-Opinjoni tesprimi tħassib dwar il-konformità tal-proposti mal-prinċipju tal-proporzjonalità, b’mod partikolari fejn il-miżuri ta’ semplifikazzjoni jirriskjaw li jittrasferixxu l-piżijiet amministrattivi, finanzjarji jew ta’ infurzar lill-awtoritajiet lokali u reġjonali.

Filwaqt li l-KtR jappoġġja l-isforzi biex jiġu stabbiliti proċeduri ta’ għoti ta’ permessi aktar rapidi, aktar prevedibbli u kkoordinati, huwa jenfasizza li l-ħeffa m’għandhiex iddgħajjef il-kwalità u li skadenzi uniformi tal-UE għall-iskrinjar u l-valutazzjonijiet ambjentali ma jirriflettux b’mod adegwat id-diversità tal-kapaċitajiet territorjali u l-istrutturi amministrattivi. Minflok, għandu jkun f’idejn l-Istati Membri li jistabbilixxu proċeduri nazzjonali u limiti ta’ żmien realistiċi u prevedibbli iżda flessibbli li huma adattati għall-kundizzjonijiet lokali. Barra minn hekk, il-KtR jopponi kwalunkwe restrizzjoni proposta dwar l-aċċess għall-ġustizzja u jqis li r-reviżjonijiet li jikkonċernaw l-ispeċijiet protetti m’għandhomx jiġu introdotti permezz ta’ dan it-tip ta’ proċedura omnibus.

Il-KtR iwissi wkoll kontra t-tħabbira li tiġi revokata jew sospiża l-bażi tad-data tal-SCIP jew l-obbligi assoċjati ta’ informazzjoni dwar sustanzi perikolużi, sakemm sistema diġitali tal-passaport tal-prodotti kompletament funzjonali u interoperabbli li tipprovdi mill-inqas l-istess livell ta’ traċċabbiltà, aċċessibbiltà u kapaċità ta’ infurzar tkun operattiva madwar l-UE.

Kwotazzjoni:

Ir-relatur Nadia Pellefigue (FR/PSE), Viċi President tar-Reġjun ta’ Occitanie: "Is-simplifikazzjoni hija meħtieġa, iżda ma tistax issir għad-detriment tal-protezzjoni ambjentali jew taċ-ċertezza legali. Jekk tittrasferixxi l-ispejjeż u r-responsabbiltajiet fuq il-bliet u r-reġjuni, din mhijiex simplifikazzjoni. Neħtieġu leġiżlazzjoni mħejjija sew u bbażata fuq l-evidenza li tappoġġa lil dawk li jimplimentaw ir-regoli tal-UE u ssaħħaħ il-kredibbiltà u l-kompetittività ambjentali tal-Ewropa.”

Aktar informazzjoni:

• Ritratti u filmati mis-sessjoni plenarja.
• Segwi l-kont tas-Servizz tal-Istampa fuq X.
• Il-Kummissjoni Ewropea ppreżentat l-hekk imsejjaħ pakkett Omnibus Ambjentali f’Diċembru 2025 bil-għan li jitnaqqas il-piż amministrattiv għan-negozji billi tiġi ssimplifikata l-leġiżlazzjoni ambjentali fl-oqsma tal-emissjonijiet industrijali, l-ekonomija ċirkolari, il-valutazzjonijiet ambjentali u d-data ġeospazjali. Il-Kummissjoni trid taċċellera u tissimplifika l-proċessi tal-għoti ta’ permessi għall-proġetti kollha, b’mod partikolari f’setturi strateġiċi, bħal proġetti diġitali strateġiċi, proġetti tal-materja prima kritika u akkomodazzjoni affordabbli. Il-pakkett, magħmul minn sitt proposti leġiżlattivi, huwa parti minn sforz usa’ allinjat mal-Kumpass tal-Kompetittività tal-UE.

Kuntatt:

Lauri Ouvinen
Tel. +32 473536887
lauri.ouvinen@cor.europa.eu