Il-President Cordeiro, ir-rapport ta’ Draghi juri l-ħtieġa għal Politika ta’ Koeżjoni disponibbli għar-reġjuni Ewropej kollha

Ir-riforma futura tal-Politika ta’ Koeżjoni bħala l-pedament tal-politika Ewropea ta’ investiment fl-għaxar snin li ġejjin kienet il-fokus ewlieni tal-iskambju ta’ fehmiet bejn il-President tal-Kumitat Ewropew tar-Reġjuni (KtR), Vasco Alves Cordeiro,u l-membri tal-Kumitat għall-Iżvilupp Reġjonali tal-Parlament Ewropew (REGI). Il-laqgħa saret ftit sigħat wara li Mario Draghi ppreżenta lill-istampa r-rapport  tiegħu dwar il-futur tal-kompetittività Ewropea.

Ir-rapport ta 'Draghi ġie deskritt bħala "kontribut ewlieni għal dibattitu tant meħtieġ" mill-President Cordeiro waqt id-diskors tiegħu lill-membri l-ġodda tal-kumitat REGI, ippresedut minn Adrian-Dragoş Benea. Ir-rapport juri b’mod ċar li l-Politika ta’ Koeżjoni trid tibqa’ u tiġi rinnovata, kif ukoll il-ħtieġa għal aktar investimenti fir-reġjuni kollha biex jiġu indirizzati sfidi ġodda. Il-KtR qed jistenna bil-ħerqa li jinvolvi ruħu dwar din il-kwistjoni", qal il-President Cordeiro.

Huwa żied jgħid: “Il-koeżjonimhijiex kelma vaga, hija fil-qalba ta’ dak li jgħaqqad it-territorji kollha fl-Ewropa flimkien. M’aħniex f’pożizzjoni li nikkunsidraw il-Politika ta’ Koeżjoni, kif inhi llum, bħala waħda li ma tistax tintmess. Għandha aspetti ewlenin li jeħtieġ li jinżammu u oħrajn li jeħtieġ li jiġu riformati. Jeħtieġ li tibqa’ politika li tkopri r-reġjuni kollha u tibqa’ politika ta’ investiment fit-tul, iżda nappellaw għal qafas uniku għall-fondi taħt ġestjoni kondiviża. Jeħtieġ li tibqa’ politika mwassla skont il-prinċipji ta’ ġestjoni kondiviża u sħubija, iżda nappellaw għal rwol aktar b’saħħtu għall-awtoritajiet lokali u reġjonali fit-tfassil u t-twettiq tal-politika. Il-Politika ta' Koeżjoni hija dik li tagħmel l-Ewropa realtà kullimkien. Mhijiex politika ta’ karità, iżda politika li ssaħħaħ il-kapaċità tar-reġjuni li jiffaċċjaw sfidi u opportunitajiet.”

Il-President Cordeiro huwa l-ewwel kelliem estern li indirizza lill-membri l-ġodda tal-Kumitat REGI. L-intervent tiegħu kien segwit minn dak tal-Kummissarju għall-koeżjoni u r-riformi Elisa Ferreira.

Aktar informazzjoni

Erġa' ara d-dibattitu

Fis-7 ta’ Ottubru, matul it-22 Ġimgħa Ewropea tar-Reġjuni u l-Bliet, il-KtR se jippubblika r-Rapport Annwali tal-UE tiegħu dwar l-Istat tar-Reġjuni u l-Bliet. Il-President Cordeiro se jagħmel id-diskors tiegħu dwar l-Istat tar-Reġjuni u l-Bliet, abbażi tar-rapport li jiddeskrivi l-aktar sfidi urġenti li jiffaċċjaw il-komunitajiet lokali u reġjonali madwar l-Ewropa, kif ukoll soluzzjonijiet possibbli li ġejjin mill-esperjenza tal-mexxejja lokali fuq il-post. 

Il-KtR u msieħba fundaturi oħra tal-#CohesionAlliance madwar l-UEkollha, nedew sejħa konġunta lill-istituzzjonijiet Ewropej u lill-gvernijiet nazzjonali biex iżommu l-Politika ta’ Koeżjoni bħala l-pilastru ewlieni tal-mudell ta’ żvilupp tal-UE matul l-għaxar snin li ġejjin. Iffirma s-sejħa konġunta.   

Il-President Cordeiro u l-President tal-Kummissjoni għall-Politika ta’ Koeżjoni Territorjali u l-Baġit tal-UE tal-KtR, u s-Sindku ta’ Cluj-Napoca, Emil Boc (RO/PPE), huma l-korelaturi tal-Opinjoni li se tivvaluta d-9  Rapport dwar il-Koeżjoni u l-konklużjonijiet tal-grupp ta’ speċjalisti ta’ livell għoli dwar il-futur tal-Politika ta’ Koeżjoni. L-adozzjoni finali tal-Opinjoni hija skedata għal Novembru 2024.

Il-President Cordeiro u l-President tal-COTER Boc qabel kienu korelaturi tal-Opinjoni  dwar il-futur tal-Politika ta’ Koeżjoni, adottata b’unanimità fis-sessjoni plenarja f’Novembru 2023. 

Persuna ta' kuntatt:
Monica Tiberi – Kelliema tal-President Cordeiro
Tel: +32 479 51 74 43
Monica.tiberi@cor.europa.eu