Ir-reġjuni u l-bliet jilqgħu l-ewwel Pjan tal-UE għal Akkomodazzjoni Affordabbli

Il-Kumitat Ewropew tar-Reġjuni jgħid li se jkunu meħtieġa appoġġ aktar b’saħħtu u investiment fit-tul tal-UE

Il-President tal-Kumitat Ewropew tar-Reġjuni (KtR), Kata Tüttő, u r-relatur tal-KtR dwar il-Pjan tal-Akkomodazzjoni, Jaume Collboni, Sindku ta’ Barċellona, laqgħu l-pubblikazzjoni llum tal-Pjan tal-Akkomodazzjoni Affordabbli mill-Kummissjoni Ewropea. 

Il-President tal-KtR Kata Tüttő qalet: “Wara snin ta’ mobilizzazzjoni, nilqgħu dan l-ewwel Pjan tal-UE għal Akkomodazzjoni Affordabbli. L-inizjattiva qed tindirizza tħassib kbir għaċ-ċittadini tal-UE. Il-prezzijiet żdiedu madwar l-Ewropa, u dan għamilha diffiċli għal ħafna biex isibu dar. Madankollu, il-medja taħbi wkoll disparitajiet kbar u stress lokali fuq l-akkomodazzjoni marbut mal-ispekulazzjoni jew mat-turiżmu tal-massa. Bil-Pjan għal Akkomodazzjoni Affordabbli, l-UE tieħu l-ewwel pass, b’rispett sħiħ tal-prinċipju tas-sussidjarjetà. Regoli aktar intelliġenti dwar l-għajnuna mill-Istat u mobilizzazzjoni akbar tal-fondi tal-UE jistgħu verament jgħinu lill-mexxejja reġjonali u lokali fuq il-post tax-xogħol biex jagħmlu disponibbli akkomodazzjoni affordabbli għaċ-ċittadini tagħhom. Il-Pjattaforma ta’ Investiment pan-Ewropea mħabbra, il-promozzjoni ulterjuri tal-approċċ “L-Akkomodazzjoni l-Ewwel” għall-kundizzjoni ta’ persuni mingħajr dar, u regolamentazzjoni aħjar tal-kirjiet għal żmien qasir huma kruċjali wkoll biex jitwasslu malajr aktar soluzzjonijiet ta’ akkomodazzjoni fil-livell lokali.”

“Iżda biex din il-ħidma tkompli matul id-deċennju li ġej, il-baġit fit-tul li jmiss tal-UE jrid jippermetti lir-reġjuni u lill-bliet isawru u jwettqu interventi li jindirizzaw il-kriżi tal-akkomodazzjoni kemm fuq terminu qasir kif ukoll fuq terminu itwal, filwaqt li jtaffu l-pressjoni fuq żoni urbani kbar u jippromovu r-rwol strateġiku ta’ bliet iżgħar u ta’ daqs medju.”

Ir-relatur tal-KtR dwar “Ir-rwoltal-bliet u r-reġjuni fil-Pjan tal-UE għal Akkomodazzjoni Affordabbli”, Jaume Collboni (ES/PSE), Sindku ta’ Barċellona, qal: “Nilqgħu l-ewwel Pjan Ewropew għal Akkomodazzjoni Affordabbli li qatt ġie ppubblikat illum mill-Kummissjoni Ewropea. Dan jirrappreżenta pass fundamentali lejn l-indirizzar tal-kriżi tal-akkomodazzjoni fil-livell tal-UE, peress li l-akkomodazzjoni tikkostitwixxi s-sors prinċipali tal-inugwaljanza soċjali. Napprezzaw b’mod partikolari l-enfasi fuq oqsma ta’ stress fuq l-akkomodazzjoni u nistennew bil-ħerqa l-Att dwar l-Akkomodazzjoni Affordabbli biex inkomplu nimxu lejn il-protezzjoni tad-dritt għall-akkomodazzjoni fil-bliet tagħna.”

Ir-relatur tal-KtR dwar “Akkomodazzjoniintelliġenti, sostenibbli u affordabbli bħala għodda għall-awtoritajiet lokali biex jiffaċċjaw diversi sfidi”,Andres Jaadla (EE/Renew Europe), il-kunsillier tal-belt ta’ Rakvere qal: “Nilqgħu l-Pjan tal-UE għal Akkomodazzjoni Affordabbli. L-innovazzjoni fl-akkomodazzjoni qed isseħħ fi bwiet madwar l-Ewropa, iżda ħafna drabi l-muniċipalitajiet jivvintaw mill-ġdid ir-rota minflok jitgħallmu minn xulxin. Neħtieġu Aġenda tal-UE dwar l-Akkomodazzjoni, b’summits annwali u pjattaformi ddedikati għall-kondiviżjoni ta’ soluzzjonijiet — minn modifiki modulari fl-Estonja għal mudelli kooperattivi fl-Iskandinavja. Billi nikkollegaw dawn l-esperimenti, nistgħu naċċelleraw l-innovazzjoni u nevitaw duplikazzjoni għalja.

Fl-aħħar mill-aħħar, din il-kriżi ma tistax tiġi solvuta minn fuq għal isfel. Din se tiġi solvuta mil-livell lokali, fis-swali muniċipali u fil-kunsilli muniċipali, mis-sindki u mill-gvernijiet reġjonali. Jekk jingħataw l-għodod u l-libertà li jaġixxu, l-Ewropa tista’ tabilħaqq tibdel il-kriżi tal-akkomodazzjoni f’opportunità: biex timmodernizza l-istokk tal-bini tagħha, toħloq komunitajiet inklużivi, u tavvanza lejn futur sostenibbli."

Il-KtR kien fost l-ewwel istituzzjonijiet tal-UE li talbu azzjoni aktar b’saħħitha u aktar deċiżiva fil-livell Ewropew biex tiġi indirizzata l-kriżi tal-akkomodazzjoni, li taffettwa miljuni ta’ ċittadini Ewropej. Din il-pożizzjoni ġiet stabbilita b’mod ċar f’żewġ Opinjonijiet reċenti tal-KtR li fihom il-mexxejja lokali u reġjonali appellaw għal azzjoni urġenti biex tiġi indirizzata din l-isfida, li min-naħa tagħha tenniet il-messaġġi stabbiliti f’Opinjoni preċedenti adottata fl-2017. L-akkomodazzjoni hija wkoll waħda mill-prijoritajiet tal-KtR għall-mandat 2025–2030.    

Sfond

•  F’Ottubru, il-President tal-KtR iltaqa’ mal-President tal-Kunsill Ewropew, António Costa, qabel l-ewwel laqgħa tal-Kunsill Ewropew biex jinkludi l-kriżi tal-akkomodazzjoni fuq l-aġenda tiegħu. Il-President Tüttő enfasizza l-ħtieġa urġenti għal azzjoni koordinata biex tiġi promossa akkomodazzjoni affordabbli u aċċessibbli madwar l-UE.
• Bħala l-pass li jmiss biex jiġu identifikati l-isfidi u s-soluzzjonijiet ibbażati fuq l-esperjenza lokali u reġjonali, bħala l-livell ta’ governanza li huwa meħtieġ biex jiġu indirizzati direttament l-isfidi ta’ din il-kriżi, l-awtoritajiet lokali u reġjonali rrappreżentati fil-KtR se jaħdmu fuq il-firxa ta’ suġġetti indirizzati mill-Pjan tal-UE għal Akkomodazzjoni Affordabbli u l-inizjattivi assoċjati tal-UE mill-bidu tal-2026 ’il quddiem.
• L-Opinjoni tal-KtR dwar “Ir-rwoltal-bliet u r-reġjuni fil-Pjan tal-UE għal Akkomodazzjoni Affordabbli” mir-relatur Jaume Collboni (ES/PSE), Sindku ta’ Barċellona (Mejju 2025). Stqarrija għall-istampa. Skeda informattiva dwar l-akkomodazzjoni b’attenzjoni fuq Barċellona.
• L-Opinjoni tal-KtR dwar “Akkomodazzjoniintelliġenti, sostenibbli u affordabbli bħala għodda għall-awtoritajiet lokali biex jiffaċċjaw diversi sfidi” mir-relatur Andres Jaadla (EE/Renew Europe), kunsillier tal-belt ta’ Rakvere (April 2024).