Il-mexxejja lokali jilqgħu miżuri dwar il-kirjiet għal żmien qasir u jappellaw għall-protezzjoni tar-residenzi primarji u żieda fl-investimenti

Il-Kumitat tar-Reġjuni jilqa’ l-Att dwar l-Akkomodazzjoni Affordabbli propost mill-Kummissjoni Ewropea bħala pass importanti biex il-bliet u r-reġjuni jingħataw iċ-ċertezza legali li ilhom jitolbu biex jindirizzaw l-isfidi tal-akkomodazzjoni permezz ta’ miżuri mfassla għaċ-ċirkostanzi lokali, inkluż biex jirregolaw il-kirjiet għal żmien qasir fejn meħtieġ.

Il-President tal-KtR Kata Tüttő qalet: “Dan l-Att dwar l-Akkomodazzjoni Affordabbli huwa l-ewwel pass importanti biex jiġi indirizzat it-tħassib ta’ għadd dejjem akbar ta’ ċittadini li jbatu biex isibu post fejn jgħixu. Napprezzaw ir-rikonoxximent sħiħ tar-rwol tal-bliet u l-awtoritajiet lokali, li kkontribwew għal din il-ħidma mill-bidu nett. Se nkomplu naħdmu biex intejbu l-miżuri proposti u nagħmlu l-appoġġ tal-UE aktar effettiv. Regoli ġodda huma fundamentali, iżda jeħtieġ ukoll li ninvestu aktar u hawnhekk hemm kontradizzjoni miftuħa bejn l-inizjattiva mnedija llum u l-proposta tal-QFP għall-2028-2034, fejn il-Kummissjoni ddgħajjef drastikament ir-rwol tal-bliet u r-reġjuni fit-tmexxija tal-investimenti tal-UE u tnaqqas l-għodod finanzjarji kollha użati s’issa mill-awtoritajiet lokali biex jappoġġjaw u jtejbu l-kwalità tal-istrateġiji tal-akkomodazzjoni tagħhom.”

Ir-relatur tal-KtR dwar “Ir-rwol tal-bliet u r-reġjuni fil-Pjan tal-UE għal Akkomodazzjoni Affordabbli”, Jaume Collboni (ES/PSE), Sindku ta’ Barċellona, qal: “L-akkomodazzjoni hija l-ewwel sors ta’ inugwaljanza soċjali fl-Ewropa. Għalhekk nilqgħu l-ewwel regolament tal-UE dwar l-akkomodazzjoni, peress li jirrikonoxxi li l-akkomodazzjoni hija primarjament li wieħed jgħix fiha, mhux li jagħmel profitt, u juri l-impenn tal-Kummissjoni li tappoġġja lill-bliet biex jindirizzaw il-kriżi tal-akkomodazzjoni. Aħna grati wkoll għar-rwol ewlieni li l-bliet kellhom matul il-proċess kollu ta’ abbozzar, pereżempju billi pproponew l-adozzjoni ta’ oqsma taħt stress fuq l-akkomodazzjoni bħala l-pedament tar-Regolament. Napprezzaw ir-rikonoxximent li l-proliferazzjoni ta’ servizzi ta’ kiri għal żmien qasir fil-bliet taggrava n-nuqqas ta’ akkomodazzjoni affordabbli għar-residenti u l-possibbiltà li aħna nadottaw miżuri dwar il-kwistjoni, kif ukoll fl-akkwiżizzjonijiet tat-tieni residenzi jew użi mhux residenzjali oħra. Nistennew bil-ħerqa li ninvolvu ruħna mal-Parlament Ewropew u mal-Kunsill tal-UE biex intejbu xi aspetti tat-test, b’mod partikolari fir-rigward tar-residenzi primarji.”

Għal diversi snin, il-Kumitat tar-Reġjuni ilu jappella għal rwol aktar b’saħħtu tal-UE fl-indirizzar tal-kriżi tal-akkomodazzjoni, filwaqt li ppromwova soluzzjonijiet ibbażati fuq il-post u rwol aktar b’saħħtu għall-awtoritajiet lokali, u enfasizza li l-politiki dwar l-akkomodazzjoni jridu jiġu adattati għall-ħtiġijiet lokali.

Sfond

• L-Opinjoni tal-KtR dwar “Ir-rwol tal-bliet u r-reġjuni fil-Pjan tal-UE għal Akkomodazzjoni Affordabbli” mir-relatur Jaume Collboni (ES/PSE), Sindku ta’ Barċellona (Mejju 2025). Stqarrija għall-istampa. Skeda informattiva dwar l-akkomodazzjoni b’attenzjoni fuq Barċellona.
• L-Opinjoni tal-KtR dwar “Akkomodazzjoni intelliġenti, sostenibbli u affordabbli bħala għodda għall-awtoritajiet lokali biex jiffaċċjaw diversi sfidi” mir-relatur Andres Jaadla (EE/Renew Europe), kunsillier tal-belt ta’ Rakvere (April 2024).

Kuntatt:

Ângela Machado

Tel: +32 475413158

Angela.machado@cor.europa.eu