Ir-reġjuni u l-bliet jiddiskutu kif tista’ titwettaq trasformazzjoni ekoloġika ġusta fil-kuntest tal-kriżi ġeopolitika attwali

Ir-rwol kritiku tal-kooperazzjoni reġjonali, l-innovazzjoni, u l-investiment strateġiku fl-iżgurar ta’ tranżizzjoni ġusta u effettiva lejn in-newtralità klimatika kien is-suġġett ewlieni fuq l-aġenda tal-laqgħa tal-Kummissjoni għall-Ambjent, it-Tibdil fil-Klima u l-Enerġija (ENVE)fil-5 ta’ Marzu. L-istat tal-unjoni tal-enerġija, l-implimentazzjoni tal-klima fid-dawl tal-COP30 u t-tfassil tal-krediti tan-natura ġew diskussi wkoll matul il-laqgħa.  

Fid-dibattitu dwar il-perspettivi tat-tranżizzjoni ekoloġika fil-mandat istituzzjonali l-ġdid tal-UE, il-membri tal-ENVE affermaw mill-ġdid id-determinazzjoni tal-UE li tmexxi globalment fi kwistjonijiet klimatiċi u ambjentali. Fost il-kompetizzjoni globali li qed tikber u l-isfidi ġeopolitiċi li qed jiżdiedu, il-mexxejja reġjonali u lokali enfasizzaw il-ħtieġa ta’ trasformazzjoni soċjoekonomika profonda biex tiġi żgurata l-azzjoni klimatika, u l-Patt Ekoloġiku Ewropew jibqa’ ċentrali għall-kompetittività u s-sigurtà. Id-dibattitu, li sar ma’ rappreżentant tal-Kummissjoni Ewropea, enfasizza l-ħtieġa għal involviment reġjonali akbar fit-tfassil tal-istrateġija tal-UE dwar il-klima. Ir-reġjuni u l-bliet madwar l-Ewropa wrew tmexxija b’saħħitha fit-tranżizzjoni ekoloġika u huma fl-aħjar pożizzjoni biex ifasslu soluzzjonijiet sostenibbli għar-realtajiet lokali. Il-membri tal-ENVE enfasizzaw li l-iżgurar ta’ politiki ġusti u inklużivi jeħtieġ kooperazzjoni mill-qrib bejn l-istituzzjonijiet tal-UE u l-awtoritajiet lokali u reġjonali. 

Huma enfasizzaw ukoll li l-prontezza teknoloġika għadha qed tiżviluppa f’diversi setturi, li jeħtieġu investimenti pubbliċi u privati sinifikanti. F’dan il-kuntest, l-UE għandha trawwem soluzzjonijiet innovattivi ġodda u timmobilizza sorsi ġodda sabiex timplimenta industriji nodfa fil-livell lokali. Minħabba r-rabta diretta bejn it-telf tal-bijodiversità, it-tibdil fil-klima, u s-saħħa pubblika, is-sensibilizzazzjoni tal-pubbliku dwar dawn il-kwistjonijiet għandha tibqa’ prijorità ewlenija, ħeġġew il-membri tal-ENVE. 

Huma appellaw ukoll għal pjanijiet direzzjonali definiti dwar in-newtralità klimatika, filwaqt li enfasizzaw li huma meħtieġa riżultati ċari u tanġibbli biex jinkisbu l-fiduċja u l-involviment tal-pubbliku. Iċ-ċittadini jridu jaraw progress reali biex jibqgħu impenjati għat-tranżizzjoni ekoloġika, li tirrikjedi li tinżamm komunikazzjoni mill-qrib mal-komunitajiet lokali. 

Fl-aħħar nett, il-membri tal-ENVE enfasizzaw li l-UE għandha żżomm l-impenn tagħha għas-sostenibbiltà billi tiżgura li l-objettivi ekonomiċi u ambjentali jimxu id f’id. Se jkun essenzjali li titħaddan l-innovazzjoni, tissaħħaħ il-kooperazzjoni reġjonali, u jiġu stabbiliti miri ambizzjużi biex jiġi żgurat futur aktar ekoloġiku u aktar reżiljenti għaċ-ċittadini kollha tagħha. 

Kwotazzjoni:  

Konstantinos Bakoyannis (EL/PPE), President tal-Kummissjoni ENVE u Kunsillier Muniċipali ta’ Ateni: “Nibdew il-mandat il-ġdid tagħna tal-KtR bi sfida doppja: l-iżgurar ta’ implimentazzjoni b’suċċess tal-objettivi tal-Patt Ekoloġiku Ewropew u fl-istess ħin is-sejba ta’ modi ġodda kif il-politiki ambjentali, klimatiċi u tal-enerġija jsiru l-ixprunaturi ta’ Ewropa aktar sigura u kompetittiva għan-nies u jsiru man-nies, u mhux kontrihom. Tranżizzjoni ekoloġika effettiva li ġġib impatt soċjoekonomiku pożittiv għall-komunitajiet tagħna tiddependi fuq riżorsi finanzjarji suffiċjenti: aħna, il-mexxejja lokali u reġjonali, nafu direttament il-ħtiġijiet konkreti ta’ riżorsi adegwati għaċ-ċittadini tagħna u għall-amministrazzjonijiet tagħna. Se nsegwu mill-qrib il-proposti għall-Qafas Finanzjarju Pluriennali l-ġdid biex niżguraw li l-baġit fit-tul il-ġdid tal-UE jirrifletti b’mod adegwat il-ħtiġijiet kollha tal-awtoritajiet lokali u reġjonali biex it-territorji tagħna jsiru aktar attraenti biex jgħixu fihom, il-kumpaniji mmexxija mill-familja tagħna jsiru aktar kompetittivi u l-pjaneta tagħna tkun aktar b’saħħitha għat-tfal u n-neputijiet tagħna.” 

Matul il-laqgħa wkoll: 

Il-membri tal-Kummissjoni ENVE komplew jiddiskutu dwar il-Patt dwar l-Oċeani u kellhom l-ewwel skambju ta’ fehmiet dwar l-Opinjonijiet li ġejjin:  

• "L-istattal-unjoni tal-enerġija: tħejjija għal implimentazzjoni bla xkiel tat-tranżizzjoni tal-enerġija f’konformità mal-miri “lesti għall-mirata’ 55 %”, mir-relatur Joško Klisović (HR/PSE), Membru tal-Assemblea tal-Belt ta’ Zagreb 

• “L-implimentazzjonital-Azzjoni Klimatika fid-dawl tal-kontribut tal-UE għall-COP30 tal-UNFCCC”,mir-relatur Nadia Pellefigue (FR/PSE), Viċi President tar-Reġjun ta’ Occitanie 

• “It-tfassilta’ krediti tan-natura: Qafas għall-promozzjoni tal-bijodiversità u s-servizzital-ekosistema”, mir-relatur Rastislav Trnka (SK/PPE), President tar-Reġjun awtonomu ta’ Košice 

Matul il-laqgħa, Hanna Zdanowska (PL/PPE), Sindku tal-Belt ta’ Łódź, inħatret minn qabel bħala relatur għall-Opinjoni dwar “Pjan ta’ Azzjoni għal Enerġija Affordabbli”.