Grupp ta’ Tmexxija ta’ Regolamentazzjoni Aħjar u Sussidjarjetà Attiva (Grupp BRASS)

Is-sussidjarjetà attiva u l-governanza f’diversi livelli huma prinċipji ewlenin u karatteristiċi fundamentali għall-funzjonament tal-UE u r-responsabbiltà demokratika. L-awtoritajiet lokali u reġjonali jaqdu rwol essenzjali fit-tfassil u l-implimentazzjoni tal-politiki tal-UE. Għalhekk, l-UE trid tinvolvi l-bliet u r-reġjuni aħjar u b’mod aktar strateġiku fit-teħid tad-deċiżjonijiet u fl-istadji kollha taċ-ċiklu leġiżlattiv, biex tfassal u timplimenta aktar politiki bbażati fuq l-evidenza u fuq il-post li jkunu ta’ benefiċċju għaċ-ċittadini kollha tal-UE.

F’din il-paġna

Missjoni

Il-Grupp ta’ Tmexxija ta’ Regolamentazzjoni Aħjar u Sussidjarjetà Attiva (Grupp BRASS) inħoloq permezz ta’ deċiżjoni tal-Bureau tal-KtR f’Ġunju 2022. Waqt li jibni fuq il-Grupp ta’ Tmexxija dwar is-Sussidjarjetà preċedenti, il-mandat tal-Grupp BRASS huwa li jissemplifika l-governanza tal-KtR fir-rigward ta’ Regolamentazzjoni Aħjar u li jmexxi u jikkoordina b’mod strateġiku l-attivitajiet tal-istrumenti għal Regolamentazzjoni Aħjar tal-KtR. 

Il-politika u l-attivitajiet tal-KtR dwar Regolamentazzjoni Aħjar jikkomplementaw ir-rwol tiegħu skont it-Trattat bħala l-gwardjan tas-sussidjarjetà u jistinkaw biex jippromovu approċċ ibbażat fuq “sussidjarjetà attiva”. Dan ifisser il-promozzjoni ta’ involviment aktar b’saħħtu tal-awtoritajiet lokali u reġjonali fit-teħid tad-deċiżjonijiet u t-tfassil tal-politika tal-UE, u b’hekk jikkontribwixxi għal politiki aktar effettivi, ibbażati fuq l-evidenza u bbażati fuq il-post li jirriflettu l-aspettattivi u l-ħtiġijiet taċ-ċittadini tal-UE. 

Sett ta’ għodod tal-KtR għal Regolamentazzjoni Aħjar

Waqt li poġġa fil-prattika l-approċċ tas-sussidjarjetà attiva, fuq medda ta’ snin il-KtR żviluppa għadd ta’ għodod biex jikkontribwixxi għall-fażijiet kollha tat-tfassil tal-liġijiet u tal-politika. Tali sett ta’ għodod għandu l-għan li jtejjeb il-kwalità tal-leġiżlazzjoni permezz ta’ valutazzjonijiet tal-impatt aħjar, tfassil ta’ politika bbażat fuq l-evidenza, aktar trasparenza u involviment tal-partijiet ikkonċernati, u approċċ ċirkolari għal-leġiżlazzjoni tal-UE.

Ħarsa ġenerali lejn l-għodod tal-KtR għal Regolamentazzjoni Aħjar u l-kontribut tagħhom għall-aġenda tal-UE għal regolamentazzjoni aħjar tista’ tinstab fl-istudju “Charting the course to better EU law-making: optimisation of EU Treaties through inter-institutional cooperation with the European Committee of the Regions” [mhux disponibbli bil-Malti], (Settembru 2024). Ara l-link fil-qiegħ tal-paġna fit-taqsima Dokumenti.

Membri tal-Grupp BRASS għall-mandat tal-KtR 2025-2030

  • Karin Müller (DE/PPE), President u membru għall-komponent tas-Sussidjarjetà
  • Luca Menesini (IT/PSE), għall-komponent tas-Sussidjarjetà
  • Pär Löfstrand (SE/Renew Europe), għall-komponent tas-Sussidjarjetà
  • Dagmar Škodová Parmová (CS/KRE)/Matteo Luigi Bianchi (IT/KRE), għall-komponent tas-Sussidjarjetà
  • René Jansen (NL/AE)/Kieran McCarthy (IE/AE), għall-komponent tas-Sussidjarjetà
  • Niina Ratilainen (FI/Ħodor)/Dan Boyle (IE/Ħodor), għall-komponent tas-Sussidjarjetà
  • Anne Karjalainen (FI/PSE), għall-komponent Fit4Future (preċedenti)
  • Vasco Alves Cordeiro (PT/PSE), President tal-COTER, għall-komponent tal-valutazzjoni tal-impatt territorjali 
  • Piotr Całbecki (PL/PPE), President tal-Kummissjoni NAT, għall-komponent tal-verifika rurali 
  • Jelena Drenjanin (SE/PPE), għall-komponent ta’ prospettiva strateġika

Dokumenti