Duais Eorpach Carlos V le bronnadh ar Choiste Eorpach na Réigiún

Gheobhaidh Coiste Eorpach na Réigiún (CnaR) Duais Eorpach Carlos V, a bhronnfaidh Fondúireacht Acadamh Eorpach agus Ibéir-Mheiriceánach Yuste, ina n-aithnítear an ról ríthábhachtach atá aige maidir le rannpháirtíocht na gcathracha agus na réigiún i bpróiseas cinnteoireachta an Aontais Eorpaigh a áirithiú.

Bhronn an giúiré, faoi chathaoirleacht María Guardiola, Uachtarán Bhord Iontaobhaithe Fhondúireacht Yuste agus Rialtas Réigiúnach Extremadura, an duais ar an gCoiste i bhfianaise a mhéid a rannchuidíonn sé le cathracha agus réigiúin na hEorpa a chomhtháthú sa chomhthionscadal, rud a chuireann ar chumas na saoránach a bhfadhbanna agus a n-ábhair imní laethúla le hinstitiúidí an Aontais a ardú, agus ar an gcaoi sin a áirithiú go n-ionchorpraítear an ghné chríochach i reachtaíocht an Aontais Eorpaigh agus go n-urramaítear prionsabal na coimhdeachta léi. De réir chomhaltaí an ghiúiré, ‘in aimsir chastachta agus pholaraithe, chuir Coiste na Réigiún cothromaíocht, éisteacht agus comhar il-leibhéil agus trasteorann chun cinn. Tá sé léirithe aige freisin gur neart iad an comhar agus an éagsúlacht chríochach a fhágann go bhfuil an Eoraip níos cothroime, níos réadúla agus níos athléimní. Léiríonn a cuid oibre an aontacht san éagsúlacht atá mar bhonn agus mar thaca ag lánpháirtiú na hEorpa agus ráthaíonn sé go dtógfar an Eoraip óna réigiúin agus óna cathracha freisin".

Tá buíochas curtha in iúl ag an Uachtarán, Kata Tüttő, "Is mór an onóir dom an gradam seo a fháil. Thar ceann Choiste Eorpach na Réigiún, déanaimid ionadaíocht ar ghuth na gcathracha agus na réigiún i gcinnteoireacht na hEorpa. Tráth a bhfuil an iliomad dúshlán ann — dúshláin gheopholaitiúla, aeráide, fuinnimh agus dhigiteacha — tá sé ríthábhachtach an nasc idir beartais agus réaltachtaí daoine a neartú chun Aontas Eorpach láidir a bhaint amach. Aithnítear leis an ngradam sin an ról ríthábhachtach atá ag ceannairí áitiúla sa mhisean sin.’

Thar ceann Choiste Eorpach na Réigiún, gheobhaidh an tUachtarán Kata Tüttő an duais ag an searmanas bronnta ag Mainistir San Jerónimo de Yuste (Extremadura, an Spáinn), an 25 Bealtaine i láthair a Shoilse Rí Felipe VI na Spáinne.