I dtreochlár nua na meithle um an gComhaontú Glas ar an Leibhéal Áitiúil, iarrtar athrú claochlaitheach

Thionóil an mheitheal um an gComhaontú Glas ar an Leibhéal Áitiúil de Choiste Eorpach na Réigiún an cruinniú deireanach a bhí aici in 2025 an 2 Nollaig. Phléigh na comhaltaí treochlár na meithle do 2026-2027, ina ndírítear ar ról na réigiún agus na gcathracha maidir le claochlú sistéamach aeráide a stiúradh ón mbun aníos. Agus an chaibidlíocht maidir leis an gcéad bhuiséad ilbhliantúil eile de chuid an Aontais ag dul isteach i gcéim ríthábhachtach, leag an grúpa béim ar an ngá atá le tacaíocht airgeadais fhadtéarmach a áirithiú don aistriú glan iomaíoch.

Cuirtear i dtábhacht sa treochlár go bhfuil na hiarrachtaí chun foinsí fuinnimh níos saoire agus níos inbhuanaithe a áirithiú ag éirí ina bpríomhghnéithe chun iomaíochas eacnamaíoch na hEorpa a chaomhnú. Díríodh i ndíospóireacht a eagraíodh leis an nGníomhaireacht Eorpach Chomhshaoil (EEA) ar na naisc idir uaillmhianta an Chomhaontaithe Ghlais don Eoraip agus clár oibre rathúnais an Aontais. Leag na cainteoirí béim ar na tairbhí a bhaineann le coincheap na hathléimneachta comhshaoil agus an chomhtháthaithe shochaíoch a chur i bhfeidhm ar an leibhéal áitiúil agus réigiúnach.

Seo mar a labhair cathaoirleach na meithle um an gComhaontú Glas ar an Leibhéal Áitiúil, Markku Markkula (FI/PPE), Comhalta de Chomhairle Cathrach Espoo: “Is infheistíocht straitéiseach i rathúnas agus athléimneacht fhadtéarmach an Aontais é aghaidh a thabhairt ar na dúshláin leanúnacha chomhshaoil. Teastaíonn athrú claochlaitheach uainn, cur chun feidhme níos fearr na mbeartas atá ann cheana, agus comhtháthú níos láidre ar bhreithnithe comhshaoil sa chinnteoireacht eacnamaíoch agus shóisialta. Díreofar i dtreochlár 2026-27 na meithle um an gComhaontú Glas ar an Leibhéal Áitiúil ar chomhar leanúnach agus níos dlúithe leis an Airmheán Comhpháirteach Taighde (JRC), le EEA, le AS RTD an Choimisiúin Eorpaigh, leis an mBanc Eorpach Infheistíochta, le ICLEI, agus le comhpháirtithe eile, agus é mar aidhm simpliú, tacaíocht d’infheistíochtaí, comhroinnt eolais agus macasamhlú a cheadú trí Chomhaontuithe Glasa Áitiúla.’  

Phléigh an mheitheal freisin ról an chomhair idir cathracha agus tionscail maidir le dlús a chur leis an aistriú chuig an aeráidneodracht agus borradh a chur faoi gheilleagair áitiúla, agus an taithí nithiúil a fuarthas ó Mhisean na gCathracha agus ó ghníomhaíochtaí an Limistéir Eorpaigh Taighde á cur san áireamh. Ina theannta sin, bhí malartú tuairimí ag na comhaltaí maidir le cothroime idirghlúine i gcomhthéacs na mbeartas glas le rapóirtéir CnaR, Tine Radinja (SI/Na Glasaigh), Méara Škofja Loka.

• Féach arís ar an gcruinniú
• Tuilleadh eolais faoin Meitheal um an gComhaontú Glas ar an Leibhéal Áitiúil
• Foláireamh Cistiúcháin maidir leis an gComhaontú Glas – Samhain 2025