Ráiteas maidir le gabháil Ekrem İmamoğlu, Méara Iostanbúl, agus 100 duine eile agus ionadaithe áitiúla eile sa Tuirc

Maidir le gabháil Ekrem İmamoğlu, Méara Iostanbúl, agus Resul Emrah Şahan, Méara Bhardas Şişli, Kata Tüttő,Uachtarán Choiste Eorpach na Réigiún (CnaR), cathaoirligh reatha agus nua Mheitheal an Choiste um an Tuirc, Antje Grotheer (DE/PSE), Uachtarán Pharlaimint Stáit Bremen, agus Jelena Drenjanin (SE/PPE), comhalta de Chomhairle Bardais Huddinge, d’eisigh siad an ráiteas seo a leanas:

‘Lá tubaisteach don Tuirc is ea gabháil Ekrem İmamoğlu, Méara Iostanbúl, in éineacht le 100 duine eile agus ionadaithe áitiúla, agus tá sé ar cheann de na léirsithe is drámatúla le blianta beaga anuas maidir le creimeadh an daonlathais agus an smachta reachta sa Tuirc. Is ionsaí ar an bhfreasúra daonlathach agus ar an daonlathas áitiúil é duine de na polaiteoirí is tábhachtaí sa tír a ghabháil.

“Go deimhin, ní hamháin gur toghadh an Méara İmamoğlu ina cheannaire ar chathair ina bhfuil 16 mhilliún duine. Tá sé ina Uachtarán ar Aontas Bhardais na Tuirce, cumann a dhéanann ionadaíocht ar cheannairí áitiúla ar gach stríoc polaitiúil.

"Cé go bhfuil sé corraitheach, ní iontas ar bith é gabhálacha an Mhéara İmamoğlu agus an Mhéara Şahan. Le roinnt mhaith de na deich mbliana anuas, tá patrún forbartha againn inar cuireadh polaiteoirí tofa áitiúla as oifig agus inar tháinig ceapaithe an rialtais náisiúnta ina n-ionad. Tá sé curtha in iúl go minic ag CnaR gur cúis mhór imní dó an cleachtas sin agus an tionchar atá aige ar an daonlathas sa Tuirc, ar an leibhéal áitiúil agus ar an leibhéal náisiúnta araon. D’athdhearbhaíomar an imní sin go láidir i mí na Nollag seo caite le linn cruinniú de Mheitheal CnaR um an gcaidreamh leis an Tuirc, a d’óstáil an Méara Şahan agus an Méara İmamoğlu in Iostanbúl, inar tugadh le chéile ceannairí áitiúla na Tuirce agus comhaltaí CnaR.

“Tá méadú ag teacht ar an imní atá orainn le déanaí, tar éis iriseoirí, gníomhaithe agus oifigigh bhardasacha a ghabháil agus tar éis bagairtí a bheith déanta air go pearsanta. Cuirimid in iúl ár ndlúthpháirtíocht iomlán leis an Méara İmamoğlu, leis an Méara Şahan agus leis na daoine go léir a gabhadh inniu, agus iarraimid arís ar rialtas na Tuirce meas a léiriú ar thoil na ndaoine.

‘Is é creimeadh an daonlathais agus an smachta reachta sa Tuirc an bac is bunúsaí ar an gcaidreamh idir an tAontas Eorpach agus an Tuirc, caidreamh atá ríthábhachtach don dá thaobh agus dár gcomharsanacht chomhroinnte.’

Cúlra: 

• Cruinniú den Mheitheal um an Tuirc, an 2 Nollaig 2024: Tuarascáilón gcruinniú.
• Dréacht-tuairim ó Choiste Eorpach na Réigiún: ‘Pacáisteum Méadú 2024 — na Balcáin Thiar agus an Tuirc.’