Ráiteas maidir le himeachtaí cúirte i gcoinne Mhéara Iostanbúl Ekrem İmamoğlu

Is í Jelena Drenjanin, Cathaoirleach Mheitheal Türkiye de Choiste Eorpach na Réigiún, Nacho Sanchez Amor, Buanrapóirtéir Pharlaimint na hEorpa maidir leis an Tuirc, agus Magdalena Adamowicz, Feisire de Pharlaimint na hEorpa, a eisíonn an ráiteas comhpháirteach seo a leanas maidir le héisteacht chúirte Mhéara Iostanbúl Ekrem İmamoğlu an 6-8 Iúil.

‘Agus an Tuirc ina hóstach ar a dara Cruinniú Mullaigh ECAT riamh in Ankara an tseachtain seo, agus béim á leagan aici ar thábhacht gheopholaitiúil mhéadaitheach na tíre agus ar a ról sa réigiún máguaird, tá imeacht eile a bhfuil tábhacht mhór ag baint leis do dhaonlathas na Tuirce agus don chobhsaíocht réigiúnach ar siúl in Iostanbúl.

‘An 6 Iúil, cuirtear tús le príomhéisteacht chosanta Mhéara Iostanbúl atá i bpríosún agus le príomhphearsa an fhreasúra, Ekrem İmamoğlu, níos mó ná bliain amháin tar éis a ghabhála ar chúiseanna a bhfuil údar polaitiúil leo i mí an Mhárta 2025. An lá céanna, beidh air freastal agus é féin a chosaint in dhá éisteacht eile a bhaineann le cásanna eile ina choinne – as an iliomad atá os a chomhair, rud a ardaíonn ceisteanna tromchúiseacha faoi chothroime na nósanna imeachta sin.

‘Mar chomhaltaí de Choiste Eorpach na Réigiún (CnaR) agus de Pharlaimint na hEorpa, tá súil ghéar á coinneáil againn ar na himeachtaí. Athdhearbhaímid ár ndlúthpháirtíocht leis an Méara Ekrem İmamoğlu, buaiteoir Ghradam an Mhéara Paweł Adamowicz 2026 a thug CnaR, Cathair Gdańsk agus ICORN, mar aitheantas ar a chosaint ar an daonlathas, ar an dlúthpháirtíocht agus ar neamhspleáchas an rialtais áitiúil i gcomhthéacs brú leanúnach polaitiúil, feachtais fuatha agus iarrachtaí ar dhícháiliú polaitiúil. Ós rud é go bhfuil sé ag cosaint é féin sa seomra cúirte inniu, agus ionchas os cionn dhá mhíle bliain i bpríosún aige, ní mór dúinn cuimhneamh nach bhfuil sé ina aonar toisc go seasann daonlathaigh ón Aontas Eorpach leis.

‘Tá an daonlathas áitiúil sa Tuirc ag dul in olcas de réir a chéile, agus tá thart ar 45 mhéara freasúra a toghadh go daonlathach agus oifigigh áitiúla á gcoinneáil, á ngabháil nó á gcur ar fionraí ó bhuaigh an freasúra toghcháin áitiúla 2024. Is ceist leanúnach í seo, le sé ghabháil nua an mhí seo caite amháin. Ina theannta sin, tá tionchar ag cleachtas na méaraí atá ag athrú páirtí faoi bhrú polaitiúil ar líon méadaitheach bardas agus ar na milliúin vótálaithe Turcacha. Tá dlúthbhaint ag na hionsaithe ar an daonlathas áitiúil sa Tuirc le cúlú daonlathach níos leithne agus le héagobhsaíocht réigiúnach. Ní bheidh an Eoraip dall agus ní fhágfar aon mhéara ar lár.

“Leanann CnaR agus Parlaimint na hEorpa de bheith ag iarraidh ar chúirt na Tuirce Ekrem İmamoğlu agus méaraí gafa eile a scaoileadh saor agus tathantaíonn siad ar rialtas na Tuirce seasamh lena dhualgas polaiteoirí a toghadh go daonlathach a chosaint ar ionchúiseamh arb í an pholaitíocht is cúis leis.”

Jelena Drenjanin (SE/PPE), Cathaoirleach Mheitheal CnaR um an gcaidreamh leis an Tuirc

Nacho Sánchez Amor (ES/S&D), Feisire de Pharlaimint na hEorpa, Buanrapóirtéir Pharlaimint na hEorpa maidir leis an Tuirc

Magdalena Adamowicz (PL/PPE), Feisire de Pharlaimint na hEorpa, comhalta de Ghiúiré Ghradam an Mhéara Paweł Adamowicz