Il-mexxejja lokali jingħaqdu mal-Presidenza Daniża dwar ir-reżiljenza u s-sigurtà u jħeġġu lill-Kunsill jisma’ t-tħassib tar-reġjuni u l-bliet dwar il-baġit tal-UE li jmiss

Il-bliet u r-reġjuni tal-UE jiddependu fuq l-appoġġ mill-Presidenza Daniża tal-Kunsill tal-UE biex tingħata spinta lir-reżiljenza fil-livell lokali u reġjonali kontra theddid estern, bħal attakki ċibernetiċi jew kampanji ta’ diżinformazzjoni. Fil-laqgħat ta’ din il-ġimgħa mar-rappreżentanti tal-gvern Daniż, il-President Kata Tüttőu membri ewlenin oħra tal-Kumitat Ewropew tar-Reġjuni (KtR) ħeġġew ukoll lill-Presidenza tal-Kunsill biex tisma’ t-tħassib tal-bliet u r-reġjuni dwar il-propostagħall-baġit fit-tul li jmiss tal-UE billi tiżgura li r-reġjuni kollha tal-UE jkunu eliġibbli għall-finanzjament ta’koeżjoni ġestit fi sħubija mal-awtoritajiet lokali u reġjonali.

Il-Konferenzatal-Presidenti tal-KtR iltaqgħet nhar il-Ħamis 18 ta’ Settembru f’Kopenħagen ma’ Torsten Schack Pedersen, Ministru għar-Reżiljenza u t-Tħejjija tad-Danimarka. Il-President tal-KtR Kata Tüttő, Membru tal-Kunsill tal-Belt ta’ Budapest, indikat li l-awtoritajiet lokali u reġjonali huma ċentrali fl-istrateġiji ta’ reżiljenza għall-antiċipazzjoni tar-riskju u t-tfassil ta’ miżuri ta’ tħejjija: “Ir-reżiljenza tas-soċjetajiet li jibnu fuq il-fiduċja, hija kruċjali biex wieħed jiddependi fuq l-ogħla livelli ta’ fiduċja li jgawdu t-tmexxija reġjonali u lokali. Fl-istess ħin, ir-reżiljenza tiġi bi prezz. Dan il-prezz jeħtieġ li jiġi rifless fil-possibbiltà li l-finanzjament ta’ koeżjoni jiffinanzja miżuri ta’ reżiljenza fil-baġit fit-tul li jmiss tal-UE għall-2028-2034”, qalet.

L-għada, il-Bureautal-KtR  magħmul minn rappreżentanti mid-delegazzjonijiet nazzjonali u l-gruppi politiċi kollha ltaqgħu f’Helsingør. Fis-sessjoni tal-ftuħ, il-Ministru għall-Affarijiet Ewropej tad-Danimarka Marie Bjerre ħadet nota tat-tħassib tal-membri tal-Bureau dwar il-pjanijiet biex tiġi ċċentralizzata l-ġestjoni tal-finanzjament ta’ koeżjoni, biex tintemm id-disponibbiltà tal-politika ta’ koeżjoni għall-kategoriji kollha tar-reġjuni u biex jiġu amalgamati l-politiki ta’ koeżjoni u agrikoli. Il-Ministru appella biex jinstab il-bilanċ it-tajjeb bejn it-tisħiħ tal-kompetittività, id-difiża u l-iżvilupp reġjonali tal-Ewropa, b’infiq tal-politika ta’ koeżjoni li jwieġeb għal dawn l-isfidi u li huwa marbut mar-rekwiżiti ta’ riforma u r-rispett tal-istat tad-dritt. Il-Ministru Bjerre kkonfermat il-parteċipazzjoni tagħha fis-sessjoni plenarja tal-KtR fl-14 ta’ Ottubru biex tkompli d-dibattitu mal-mexxejja lokali u reġjonali.

Il-President tal-KtR Tüttő qal: "Il-Presidenza Daniża tal-Kunsill tal-UE ġġorr ir-responsabbiltà ewlenija li tagħti bidu għan-negozjati dwar il-baġit tal-UE li jmiss. Il-proposta mressqa mill-Kummissjoni Ewropea f’Lulju tirriskja li ddgħajjef u tiddestabbilizza l-Unjoni tagħna billi tiċċentralizza b’mod qawwi l-istrateġiji ta’ tkabbir u l-investimenti tagħha. Id-deċiżjoni dwar min jagħmel xiex fil-baġit tal-UE li jmiss hija deċiżiva, daqs kemm ikun hemm qbil dwar iċ-ċifri. Għal din ir-raġuni, ħeġġiġna lill-Presidenza Daniża biex ma tressaqx il-karrettun quddiem iż-żwiemel u tevita li d-diskussjoni li għaddejja fost l-Istati Membri tiffoka biss fuq l-aspetti baġitarji.”

L-enfasi tad-dibattiti tal-Bureau kienet fuq it-tisħiħ tat-tħejjija kontra t-theddid għas-sigurtà u d-demokrazija fil-livell lokali u reġjonali, b’diskors ewlieni minn Věra Jourová,eks Viċi President tal-Kummissjoni Ewropea u bħalissa Viċi Rettur tal-Università Charles fi Praga. Il-kelliema enfasizzaw il-ħtieġa li titqajjem kuxjenza u jiżdiedu l-investimenti fir-reżiljenza diġitali tal-amministrazzjonijiet lokali u reġjonali li jibqgħu fost l-aktar miri vulnerabbli għall-attakki ċibernetiċi u li jissorveljaw l-infrastruttura kritika, inkluża l-kura tas-saħħa. Madankollu, huma jiffaċċjaw sfidi bħall-koordinazzjoni frammentata, baġits limitati, u nuqqas ta’ talent. Il-membri tal-Bureau enfasizzaw ukoll ir-rwol ta’ ktajjen tal-provvista diversi u siguri fit-tisħiħ tat-tħejjija għal xokkijiet futuri.

Il-protezzjoni tar-reżiljenza tad-demokrazija kontra ż-żieda fl-estremiżmu, il-polarizzazzjoni u d-diżinformazzjoni hija sfida kbira oħra għall-awtoritajiet pubbliċi kollha. Il-mexxejja lokali fakkru fir-rwol ewlieni tal-bliet u r-reġjuni fil-bini tal-fiduċja fil-proċessi u l-istituzzjonijiet demokratiċi billi jiżguraw it-trasparenza, ir-responsabbiltà u l-parteċipazzjoni pubblika. 

Il-laqgħat fid-Danimarka ġew ospitati minn Anders Kühnau, President tar-Reġjuni Daniżi, u Erik Flyvholm (DK/Renew Europe), Rappreżentant tal-Gvern Lokali tad-Danimarka.