Ir-reġjuni u l-bliet jappellaw għall-irduppjar tal-finanzjament għall-kooperazzjoni transfruntiera

Ir-relaturPetersen (assemblea reġjonali tan-Nofsinhar tad-Danimarka): tirrappreżenta l-ogħla eżempju ta’ valur miżjud Ewropew 

Il-politika ta’ koeżjoni u l-kooperazzjoni territorjali Ewropea (KTE) juru perfettament il-valur miżjud Ewropew fl-indirizzar tal-problemi li jaqsmu l-fruntieri nazzjonali, il-promozzjoni tal-integrazzjoni u s-solidarjetà. Għalhekk, dawn għandhom jissaħħu fil-futur u l-baġit tagħhom għandu jiżdied. Dan huwa l-messaġġ ewlieni tal-Opinjoni adottata fil-plenarja tal-Kumitat Ewropew tar-Reġjuni fil-21 ta’ Novembru, li tfasslet minn Karsten Uno Petersen, membru tal-assemblea reġjonali tan-Nofsinhar tad-Danimarka. 

Ir-reġjuni tal-fruntiera jirrappreżentaw 40 % tat-territorju tal-UE u jospitaw 30 % tal-popolazzjoni tal-UE. Kriżijiet reċenti bħall-pandemija tal-COVID-19 u l-gwerra tar-Russja kontra l-Ukrajna enfasizzaw kemm dawk ir-reġjuni huma esposti u vulnerabbli għal sfidi mhux mistennija. Kemm il-pandemija kif ukoll il-gwerra kkawżaw tnaqqis fir-ritmu tal-kooperazzjoni transfruntiera, li minflok għandu jingħata spinta.   

Għalhekk, il-mexxejja lokali u reġjonali ħeġġew lill-mexxejja nazzjonali u tal-UE biex jgħammru l-Politika ta’ Koeżjoni ta’ wara l-2027 b’baġit li jissodisfa l-isfidi l-ġodda li qed tiffaċċja l-Ewropa, mill-inqas ekwivalenti għal dak tal-2021-2027 (inkluż iż-żieda ta’ EUR 50.6 biljun ta’ REACT-EU) f’termini reali. L-objettiv tal-KTE tal-Politika ta’ Koeżjoni, iffinanzjat permezz tal-hekk imsejħa programmi Interreg, għandu jiżdied meta mqabbel mal-perjodu attwali 2021-2027, biex jirrappreżenta mhux inqas minn 8 % tal-ammont totali, talab il-membru tal-KtR.  

Il-membri tal-KtR qalu li l-kooperazzjoni territorjali għandha tissaħħaħ fil-fergħat differenti kollha tagħha. Kważi 90 programm transfruntier, transnazzjonali, interreġjonali u ultraperiferiku Interreg joperaw madwar il-fruntieri interni u esterni tal-UE, u juru li huma waħda mill-għodod ta’ politika ewlenin tal-UE għall-promozzjoni tal-koeżjoni, il-paċi u l-prosperità. Il-KTE ssaħħaħ ukoll is-suq uniku billi tneħħi l-ostakli fil-fruntieri. Għalhekk, il-baġit tal-komponent tal-kooperazzjoni transfruntiera tiegħu għandu tal-anqas jirdoppja fil-baġit fit-tul li jmiss tal-UE. 

Barra minn hekk, il-membri tal-KtR appellaw lill-Kummissjoni Ewropea biex tkompli bl-isforzi tagħha biex tissemplifika r-regoli ta’ implimentazzjoni għall-KTE u ħeġġew lill-Istati Membri biex jevitaw li jistabbilixxu rekwiżiti addizzjonali li potenzjalment ifixklu l-implimentazzjoni lil hinn minn dawk stabbiliti fil-livell tal-UE. 

Kwotazzjoni

Ir-relatur Karsten Uno PETERSEN (DK/PSE), membru tal-assemblea reġjonali tan-Nofsinhar tad-Danimarka: “Il-Politika ta’ Koeżjoni u l-Kooperazzjoni Territorjali Ewropea bejn il-fruntieri tal-UE huma eżempju tal-valur miżjud Ewropew. Dawn għandhom jissaħħu finanzjarjament fil-futur. Ir-reġjuni tal-fruntiera jammontaw għal 40 % tat-territorju tal-UE, u 30 % tal-popolazzjoni tal-UE tgħix f’reġjuni tal-fruntiera. Għalhekk, il-finanzjament għall-kooperazzjoni transfruntiera għandu jiġi rduppjat fil-baġit fit-tul tal-UE li jmiss.” 

Aktar informazzjoni

• Il-Kooperazzjoni Territorjali Ewropea (KTE)hija l-objettiv politiku segwit mill-Unjoni Ewropea biex tippromwovi l-kooperazzjoni bejn ir-reġjuni u l-pajjiżi, filwaqt li tindirizza l-ostaklu tal-fruntieri. Hija parti mill-Politika ta’ Koeżjoni Ewropea usa’ u hija implimentata permezz tal-hekk imsejħa strumenti Interreg, li hija organizzata taħt diversi komponenti: il-kooperazzjoni transfruntiera, translazzjonali, interreġjonali u tar-reġjuni ultraperiferiċi.  
• Fl-20 ta’ Novembru, il-Kumitat Ewropew tar-Reġjuni adotta l-Opinjoni Insolvu l-ostakli għall-kooperazzjoni tas-servizzi ta’ emerġenza fir-reġjuni tal-fruntiera tal-UE, abbozzata minn Pavel BRANDA (CZ/KRE), Viċi Sindku ta’ Rádlo. Stqarrija għall-istampa. 
• Matul is-sessjoni plenarja tal-20-21 ta’ Novembru, il-membri tal-KtR adottaw ukoll pakkett ta’ Opinjonijiet li jiddefinixxu l-elementi kostitwenti tal-Politika ta’ Koeżjoni wara l-2027. Stqarrija għall-istampa. 
• Fl-14 ta’ Novembru, f’Budapest, il-KtR nieda uffiċjalment il-Pjattaforma Transfruntiera Ewropea, li għandha l-għan li tiġbor flimkien l-atturi kollha fil-kooperazzjoni transfruntiera, mill-bliet u r-reġjuni tal-fruntiera sar-Raggruppamenti Ewropej ta’ Kooperazzjoni Territorjali u l-Ewroreġjuni. S’issa, aktar minn 130 parti kkonċernata ngħaqdu mal-pjattaforma l-ġdida, li se titmexxa fi sħubija mal-Assoċjazzjoni ta’Reġjuni mal-Fruntieri Ewropej (AEBR),is-Servizz tal-Ewropa Ċentrali għall-Inizjattivi Transkonfinali (CESCI),u l-Missjoni Operazzjonali Transkonfinali (MOT). 

Ikkuntattja lil
Matteo Miglietta
Tel. +32 470895382
matteo.miglietta@cor.europa.eu