Molann ceannairí áitiúla agus réigiúnacha go gcuirfí feabhas ar thacaíocht an Aontais don tionscal glan agus don chosaint

Is straitéis fáis ríthábhachtach atá thar téarma é an Comhaontú maidir le Tionsclaíocht Ghlan chun borradh a chur faoi iomaíochas an Aontais. Tá sé ríthábhachtach réigiúin agus cathracha a chur i gcroílár an bheartais thionsclaíoch chun aistriú glas rathúil agus cothrom ó thaobh críche de a áirithiú ar fud an Aontais.  Is í seo príomhtheachtaireacht dréacht-tuairime a glacadh le linn chruinniú an Choimisiúin um Beartas Eacnamaíoch (ECON)an 23 Bealtaine. Bhí díospóireacht tosaigh ag comhaltaí ECON freisin ar dhréacht-tuairim maidir leis an bPacáiste Ullmhachta um Chosaint Eorpach 2030 agus phléigh siad tionchar na suaití trádála idirnáisiúnta atá ann faoi láthair ar réigiúin agus ar chathracha.  

An Comhaontú maidir le Tionsclaíocht Ghlan 

Le linn an chruinnithe, ghlac comhaltaí ECON dréacht-tuairim maidir leis an gComhaontú maidir le Tionsclaíocht Ghlan, inar iarradh beartas tionsclaíoch áitbhunaithe lena n-aithnítear láidreachtaí tionsclaíocha éagsúla chríocha na hEorpa. Chuir na ceannairí áitiúla agus réigiúnacha i bhfios go láidir gur príomhspreagthóirí iad na rialtais áitiúla chun tionscail iomaíocha a chothú. Leag siad béim ar roinnt uirlisí criticiúla chun tacú le tionscail san aistriú glan, lena n-áirítear bearta an Aontais maidir le simpliú agus soláthar poiblí a chur chun feidhme go hiomlán, acmhainní poiblí agus príobháideacha araon a shlógadh, creataí spriocdhírithe infheistíochta agus státchabhrach, straitéisí nuálacha agus cliste speisialtóireachta, agus comhpháirtíochtaí níos láidre idir gníomhaithe poiblí, fiontair, an saol acadúil agus soláthraithe scileanna. Leag na Feisirí béim freisin ar an ngá atá le costais fuinnimh a laghdú trí tháirgeadh fuinnimh ghlain a mhéadú. 

Seo mar a labhair an Rapóirtéir William Elofsson (SE/PPE), Dara Leas-Mhéara Gävle: “Inniu, ghlac Coimisiún ECON an tuarascáil maidir leis an gComhaontú maidir le Tionsclaíocht Ghlan, ina leagtar síos na húdaráis áitiúla agus réigiúnacha mar phríomhchumasóirí do chlaochlú tionsclaíoch glan iomaíoch na hEorpa. Iarrtar sa tuairim straitéisí áitbhunaithe, ceadú simplithe, infheistíocht i scileanna, agus beartais fuinnimh chothroma, agus ag an am céanna spreagtar cistiú comhleanúnach, tacaíocht nuálaíochta, agus cuir chuige atá neodrach ó thaobh na teicneolaíochta de chun dícharbónú agus forbairt thionsclaíoch a chur chun cinn ar fud an Aontais.” 

Pacáiste Cosanta 

Bhí an chéad mhalartú tuairimí ag comhaltaí ECON maidir le dréacht-tuairim i ndáil le ‘Ullmhacht Eorpach um Chosaint 2030’. Leag siad béim ar a thábhachtaí atá sé tosaíocht Eorpach níos láidre a thabhairt do tháirgí agus teicneolaíochtaí cosanta a fhorbraítear laistigh den Aontas Eorpach, agus ar an ngá atá le hionstraimí AE — amhail an Ghníomhaíocht Slándála don Eoraip (SAFE) — chun ilroinnt sa mhargadh cosanta a laghdú go héifeachtach, inar cheart dhá Bhallstát de chuid an Aontais ar a laghad a bheith rannpháirteach i soláthar comhoibríoch. Beidh sé ríthábhachtach freisin deireadh a chur le bacainní riaracháin náisiúnta laistigh den Aontas chun tionscal cosanta Eorpach láidir a thógáil, a d’áitigh siad. Chuir comhaltaí ECON i dtábhacht freisin nach mór úsáid chistí an Bheartais Chomhtháthaithe don chosaint a bheith fite fuaite le spriocanna forbartha réigiúnacha.  

Seo mar a labhair an Rapóirtéir Ricardo Rio (PT/PPE), Méara Braga: “Agus an straitéis nua Eorpach maidir le hinfheistíocht i réimse na cosanta á múnlú againn, leagaim béim láidir ar an ról ríthábhachtach atá ag na rialtais áitiúla agus réigiúnacha maidir le sásraí cosanta athléimneacha, inbhuanaithe agus cuimsitheacha a fhorbairt lena gcosnófar ní hamháin ár bpobail ach lena gcothófar comhtháthú, iomaíochas agus cobhsaíocht ar fud réigiúin na hEorpa freisin.” 

Beartas Trádála an Aontais Eorpaigh

Le linn díospóireachta maidir leis an tionchar a bhíonn ag peirspictíochtaí trádála atá ag athrú ar réigiúin agus ar chathracha, leag comhaltaí ECON béim ar an ngéarghá atá le cur chuige áitbhunaithe i leith athléimneacht trádála, agus thug siad rabhadh go bhfuil tionchair eacnamaíocha mhíchothroma á gcruthú ar fud an Aontais mar gheall ar theannas domhanda, taraifí méadaithe agus suaitheadh sa slabhra soláthair.   

Úsáid phíolótach uirlisí IS

Cheap comhaltaí ECON Cathaoirleach an choimisiúin agus Uachtarán Réigiún Piedmont, Alberto Cirio (IT/PPE) freisin mar rapóirtéir ar Phlean Gníomhaíochta Ilchríochach na hIntleachta Saorga (IS), a bhfuil rún daingean ag AE a bheith ina cheannaire domhanda in IS. Dúirt sé: “Is cuid dár saol laethúil anois í úsáid na hintleachta saorga agus tá acmhainneacht ollmhór aici maidir leis an riarachán poiblí. In Piedmont táimid ag obair go dian, mar shampla, chun córais intleachta saorga a úsáid chun dul i ngleic leis an dúshlán a bhaineann le faireachán a dhéanamh ar thruailliú iompair de bhóthar agus é a laghdú, trí bhealach nuálach chun soilse tráchta a oibriú. Ní mór do réigiúin agus do chathracha an Aontais a dtuairimí a chur in iúl maidir leis an infheistíocht i mbonneagair ríomhaireachta IS a mhúnlú, agus scileanna agus buanna IS a neartú. Beidh an tuairim atá le teacht ina hionchur tábhachtach do chuid na hearnála poiblí den Straitéis maidir leis an Intleacht Shaorga a Chur i bhFeidhm, a chuirfidh an Coimisiún Eorpach i láthair níos déanaí i mbliana.” 

Ghlac CnaR an chéad tuairim maidir le dúshláin agus deiseanna na hintleachta saorga san earnáil phoiblí, a dhréachtaigh an tUasal Cirio, i mí Dheireadh Fómhair 2024. Den chéad uair riamh le linn imeacht institiúideach de chuid CnaR, baineadh úsáid as teicneolaíocht IS chun na hábhair a pléadh ag cruinniú ECON a mhiondealú ina bhfaisnéis shoiléir inrochtana do shaoránaigh agus do gheallsealbhóirí. Beidh an nasc chuig an uirlis IS don chruinniú seo ar fáil anseo ón 4 Meitheamh ar aghaidh. 

Cúlra

• Féach ar an gcruinniú anseo.  

• An 25 Feabhra, thíolaic an Coimisiún Eorpach an Comhaontú maidir le Tionsclaíocht Ghlan, ina leagtar amach gníomhaíochtaí nithiúla chun an dícharbónú a iompú ina spreagadh fáis do thionscail na hEorpa. Áirítear leis sin praghsanna fuinnimh a ísliú, poist ardcháilíochta a chruthú agus na dálaí cearta chun go mbeidh rath ar chuideachtaí.   

• An 19 Márta, thíolaic an Coimisiún an Páipéar Bán maidir le Cosaint na hEorpa – Ullmhacht 2030 agus mar chuid de Phlean/Ullmhacht ReArm na hEorpa 2030, pacáiste uaillmhianach cosanta lena gcuirtear luamháin airgeadais ar fáil do Bhallstáit an Aontais chun borradh infheistíochta i gcumais chosanta a spreagadh. Cé go bhfuil sé d’aidhm ag Plean/Ullmhacht ReArm na hEorpa 2030 cumais chosanta uile-Eorpacha a neartú le hacmhainní airgeadais, leagtar amach sa Pháipéar Bán cur chuige nua i leith na cosanta agus sainaithnítear riachtanais infheistíochta ann.   

Teagmháil

Theresa Sostmann
Teil: +32475999415
Theresa.Sostmann@cor.europa.eu  

Matteo Miglietta 
+32470 89 53 82 
Matteo.Miglietta@cor.europa.eu