Tosaíochtaí áitiúla agus réigiúnacha comhaontaithe le haghaidh Chomhpháirtíocht an Oirthir de chuid an Aontais

Tháinig ceannairí áitiúla agus réigiúnacha ón Aontas Eorpach agus ó thíortha comhpháirtíochta ar chomharsanacht thoir an Aontais le chéile in Eireaván an 27 Deireadh Fómhair chun réimsí tosaíochta le haghaidh comhair a shainaithint sna cúig bliana amach romhainn.

Ag an gcruinniú a bhí ag Comhdháil na nÚdarás Réigiúnach agus Áitiúil do Chomhpháirtíocht an Oirthir (CORLEAP) – ina dtugtar le chéile comhaltaí Choiste Eorpach na Réigiún (CnaR) agus polaiteoirí áitiúla agus réigiúnacha ón Úcráin, ón Moldóiv, ón Airméin, ón Asarbaiseáin agus ón tSeoirsia faoi láthair – sainaithníodh an comhshaol, an dílárú, fothú acmhainneachta agus cur i gcoinne na bréagaisnéise mar cheann de na príomhréimsí ina bhfuil na húdaráis áitiúla agus réigiúnacha i ndoimhniú an chomhair. Léiríonn roghnú na dtosaíochtaí clár oibre níos leithne Chomhpháirtíocht an Oirthir maidir le téarnamh, athléimneacht agus athchóiriú, a bunaíodh in 2009 chun an caidreamh idir an tAontas, a Bhallstáit agus tíortha ar theorainneacha thoir an Aontais a leathnú agus a dhoimhniú.

Dhírigh cruinniú CORLEAP láithreach – nár ghlac comhaltaí ón Asarbaiseáin páirt ann – ar athbhreithniú an Aontais ar a straitéis i réigiún na Mara Duibhe, mar chuid de phacáiste freagairtí beartais an Aontais ar athruithe ar an dinimic gheopholaitiúil arb é cogadh foghach na Rúise i gcoinne na hÚcráine is cúis leo. Tá trí cholún san athbhreithniú: slándáil, fás eacnamaíoch, agus athléimneacht chomhshaoil. Cuirfidh an díospóireacht ag CORLEAP le tuairim maidir le straitéis na Mara Duibhe atá á dréachtú faoi láthair ag CnaR.

Ba é an dara téama athbhreithniú ar staid reatha dhílárú na gcumhachtaí polaitiúla agus fioscacha i dtíortha Chomhpháirtíocht an Oirthir.

Ba iad Magali Altounian (FR/Renew Europe), comhalta de chomhairle réigiúnach Sud-Provence-Alpes-Côte d’Azur agus cathaoirleach an Choimisiúin um Shaoránacht, Rialachas, Gnóthaí Institiúideacha agus Seachtracha (CIVEX), agus Varsham Sargsyan, méara Armavir, a bhí ina gcomhchathaoirligh ar an gcruinniú. Is comhchathair de chuid Yerevan í cathair dhúchais Altounian, Nice, óstach an chruinnithe.

Tionóladh cruinniú CORLEAP an oíche roimh chruinniú bliantúil Thionól Parlaiminteach EuroNest, ina dtugtar le chéile ionadaithe ó Pharlaimint na hEorpa agus ó pharlaimintí náisiúnta na hÚcráine, na Moldóive, na Seoirsia, na hAirméine agus na hAsarbaiseáine. Labhair Comh-Uachtarán Thionól Parlaiminteach EuroNest, FPE Sergey Lagodinsky (DE/Na Glasaigh-SCE), ag cruinniú bliantúil CORLEAP, agus labhair comhalta CORLEAP – Csaba Borboly (RO/PPE), Leas-Uachtarán Chomhairle Contae Harghita – an 29 Deireadh Fómhair ag seisiún iomlánach EuroNest i dTionól Náisiúnta Phoblacht na hAirméine. Tá stádas breathnóra ag CORLEAP le EuroNest.

Luaigh:

Magali Altounian, comhalta de chomhairle réigiúnach Sud-Provence-Alpes-Côte d’Azur agus cathaoirleach an Choimisiúin um Shaoránacht, Rialachas, Gnóthaí Institiúideacha agus Seachtracha (CIVEX)in CnaR: "TáComhpháirtíocht an Oirthir fós ina saincheist straitéiseach don Aontas Eorpach. I gcomhthéacs fhogha na Rúise faoin Úcráin, tá sé níos riachtanaí ná riamh cobhsaíocht, athléimneacht agus comhar a chaomhnú ar ár mór-roinn. Níos mó ná riamh, tá an t-idirphlé, an dlúthpháirtíocht agus an comhar idir ár gcríocha ríthábhachtach do limistéar Eorpach síochána agus rathúnais chomhroinnte.”

Tuilleadh eolais:

• Sonraí an chruinnithe: Clár Oibre, Plean Gníomhaíochta CORLEAP 2025-29, grianghraif.
• CORLEAP: Tá faisnéis chúlra faoi Chomhdháil na nÚdarás Réigiúnach agus Áitiúil do Chomhpháirtíocht an Oirthir (CORLEAP) ar fáil ar shuíomh gréasáin Choiste Eorpach na Réigiún.
• Comhchathaoirleacht: Tá ionadaí ó Choiste Eorpach na Réigiún agus ionadaí ó thír chomhpháirtíochta i gComhpháirtíocht an Oirthir ina gcomhchathaoirligh ar CORLEAP. Chinn comhaltaí CORLEAP an 27 Deireadh Fómhair gurb é Constantin Cojocari, Méara Edineț sa Mholdóiv, an chéad chomhchathaoirleach eile ón 1 Feabhra 2026 ar aghaidh. Thug an tUasal Cojocari cuireadh do CORLEAP chun na Moldóive in 2026.
• Roinnt na gcumhachtaí agus dílárú: Tá a chuid oibre anailísí ar na struchtúir rialachais il-leibhéil i dtíortha éagsúla á cur chun cinn ag Coiste Eorpach na Réigiún. Tar éis staidéar a dhéanamh ar thíortha an mhéadaithe, comhlánaíodh an obair anois le comhpháirt maidir leis an Airméin agus an Asarbaiseáin. Comhlánaíonn sé sin an forléargas ar thíortha Chomhpháirtíocht an Oirthir. Cuireadh an staidéar faoi bhráid chomhaltaí CORLEAP ag an gcruinniú. Tá tuilleadh eolais agus naisc chuig an obair anailíseach le fáil anseo.