Il-Kumitat tar-Reġjuni jniedi Grupp ta’ Ħidma dwar id-Difiża biex jissaħħaħ ir-rwol tar-reġjuni fis-sigurtà tal-UE

Il-gwerra ta’ aggressjoni tar-Russja li għaddejja bħalissa kontra l-Ukrajna, flimkien ma’ theddid ibridu li qed jiżdied, sawret mill-ġdid b’mod profond l-approċċ tal-UE għad-difiża u s-sigurtà, u aċċellerat l-ispinta lejn politika aktar reattiva. F’dan l-isfond, il-Kumitat Ewropew tar-Reġjuni (KtR) illum nieda uffiċjalment il-Grupp ta’ Ħidma tiegħu dwar id-Difiża (WG Difiża), biex jinkorpora l-perspettivi reġjonali u lokali fid-difiża tal-UE u biex isaħħaħ ir-reżiljenza tal-Ewropa billi jippromovi kontributi territorjali għat-tħejjija għad-difiża, il-protezzjoni ċivili, ir-rispons għall-kriżijiet u industrija tad-difiża kompetittiva.  

Billi jipprovdi forum strutturat għall-kooperazzjoni, il-Grupp ta’ Ħidma dwar id-Difiża, ippresedut minn Fernando López Miras (ES/PPE), President tar-Reġjun ta’ Murcia, għandu l-għan li jgħaqqad l-awtoritajiet lokali u reġjonali mal-istituzzjonijiet tal-UE, irawwem l-iskambju tal-aħjar prattiki, u jappoġġja Unjoni Ewropea tad-Difiża aktar koordinata u effettiva. 

Matul il-laqgħa, il-membri tal-Grupp ta’ Ħidma kellhom skambju ta’ fehmiet dwar is-sitwazzjoni tas-sigurtà fil-kostitwenzi tagħhom, u ppreżentaw proġetti, investimenti u l-aħjar prattiki rilevanti f’oqsma bħall-protezzjoni ċivili, ir-reżiljenza, iċ-ċibersigurtà u l-ġlieda kontra d-diżinformazzjoni. L-iskambju enfasizza d-diversità tal-isfidi lokali iżda wkoll l-impenn komuni tar-reġjuni u l-bliet biex jikkontribwixxu għas-sigurtà tal-Ewropa. 

Il-Grupp ta’ Ħidma kellu wkoll dibattitu ma’ Klaus Welle, Konsulent Speċjali għal Andrius Kubilius, Kummissarju Ewropew għad-Difiża u l-Ispazju, li ppreżenta l-aħħar inizjattivi tal-Kummissjoni Ewropea biex jissaħħu l-istat ta’ tħejjija u l-industrija tad-difiża tal-Ewropa. Il-membri laqgħu l-ambizzjoni tal-Kummissjoni li taċċellera l-integrazzjoni tad-difiża tal-Ewropa u enfasizzaw l-importanza li l-awtoritajiet lokali u reġjonali jiġu involuti fl-implimentazzjoni ta’ din l-integrazzjoni msaħħa tad-difiża.  

Il-Grupp ta’ Ħidma dwar id-Difiża adotta l-pjan direzzjonali tiegħu għall-perjodu 2025-2027, li jiffoka fuq l-oqsma ta’ prijorità li ġejjin: 

• Investimenti fil-kapaċitajiet tad-difiża: l-iżgurar li l-fondi tal-UE jsaħħu l-ekosistemi tal-industrija reġjonali, l-SMEs, iċ-ċentri ta’ riċerka, u l-proġetti b’użu doppju. 

• Qafas Finanzjarju Pluriennali 2028-2034: l-iżgurar ta’ appoġġ robust fil-livell tal-UE għad-difiża, is-sigurtà u l-ispazju, inkluża żieda ta’ ħames darbiet fl-allokazzjonijiet għad-difiża. 

• Mekkaniżmu tal-protezzjoni ċivili: it-tisħiħ tar-reżiljenza tal-komunità, it-taħriġ, is-sensibilizzazzjoni taċ-ċittadini, u l-mobilizzazzjoni volontarja fil-livell lokali. 

• Trasport: it-titjib tal-infrastruttura b’użu doppju, inklużi l-kurituri ferrovjarji u l-punti ta’ qsim tal-fruntieri. 

• Il-ġlieda kontra t-theddid ibridu: it-tisħiħ tal-kooperazzjoni bejn l-awtoritajiet lokali u reġjonali, l-Istati Membri u l-istituzzjonijiet tal-UE biex jidentifikaw u jirrispondu għall-manipulazzjoni tal-informazzjoni u l-interferenza minn barranin. 

Il-membri ddiskutew ukoll tliet Opinjonijiet strateġiċi li qed jitħejjew bħalissa fi ħdan il-KtR: 

• Tħejjija Ewropea għad-Difiża 2030 – ippreżentata minn Ricardo Rio (PT/PPE), Sindku ta’ Braga 

• Perspettivi lokali u reġjonali fl-implimentazzjoni ta’ ProtectEU, l-Istrateġija Ewropea ta’ Sigurtà Interna l-ġdida – ippreżentata minn Anne Rudisuhli (FR/Renew Europe), Kunsillier Dipartimentali ta’ Bouches-du-Rhône 

• Strateġija tal-Unjoni Ewropea għat-Tħejjija – ippreżentata minn María Isabel Urrutia De Los Mozos (ES/PPE), Ministru Reġjonali għall-Presidenza, il-Ġustizzja, is-Sigurtà u s-Simplifikazzjoni Amministrattiva, il-Gvern ta’ Cantabria 

Kwotazzjoni

Fernando López Miras (ES/PPE), President tar-reġjun ta' Murcia: “It-tnedija tal-Grupp ta’ Ħidma dwar id-Difiża tal-Kumitat Ewropew tar-Reġjuni waslet f’mument deċiżiv. L-għan tagħna huwa ċar: li r-reġjuni u l-bliet jingħataw vuċi fid-dibattiti Ewropej dwar id-difiża, is-sigurtà, it-tħejjija u r-reżiljenza. Se nikkontribwixxu l-perspettiva territorjali, il-viżjoni u l-esperjenza miksuba mill-governanza u l-ġestjoni tal-bliet u r-reġjuni tagħna, il-konnessjoni diretta tagħna mat-territorju, l-ekosistemi industrijali u tal-innovazzjoni, u ċ-ċittadini nfushom. Nafu l-valur li nġibu u nħaddnu r-responsabbiltà strateġika tagħna biex ngħinu fil-bini ta’ Ewropa aktar b’saħħitha, aktar kompetittiva u aktar sigura.” 

Sfond

• Filmat u ritratti mil-laqgħa 

• Il-Grupp ta’ Ħidma dwar id-Difiża (WG Difiża) ġie stabbilit fl-1 ta’ April 2025 mill-Bureau tal-Kumitat Ewropew tar-Reġjuni, biex jirrifletti dwar u jippromovi l-kontribut tal-awtoritajiet lokali u reġjonali għall-arkitettura tas-sigurtà u d-difiża li qed tevolvi tal-Unjoni Ewropea.  

• L-istabbiliment tal-Grupp ta’ Ħidma dwar id-Difiża jsegwi l-appelli tal-Kunsill Ewropew biex l-Ewropa tieħu responsabbiltà akbar għas-sigurtà tagħha stess wara l-gwerra ta’ aggressjoni tar-Russja li għaddejja kontra l-Ukrajna u t-theddid ibridu li qed jiżdied. Il-Grupp ta’ Ħidma se jaġixxi bħala pjattaforma għall-kooperazzjoni interistituzzjonali mal-Kumitat għas-Sigurtà u d-Difiża (SEDE) tal-Parlament Ewropew, il-Grupp tal-Proġett tal-Kummissjoni Ewropea dwar id-Difiża, u sħab istituzzjonali u territorjali oħra.   

Kuntatt 

Theresa Sostmann 

Tel: +32475999415 

Theresa.Sostmann@cor.europa.eu