Il-politika Ewropea tad-difiża effettiva tiddependi fuq ekonomiji u innovazzjoni reġjonali reżiljenti, jgħidu l-mexxejja lokali

L-Unjoni Ewropea qed iżżid l-isforzi ta’ difiża tagħha bir-reġjuni u l-bliet jaqdu rwol dejjem aktar ċentrali fit-twettiq fil-prattika. Matul it-tieni laqgħa tal-Grupp ta’ Ħidma dwar id-Difiża tal-Kumitat Ewropew tar-Reġjuni (KtR) fl-4 ta’ Diċembru, il-membri affermaw mill-ġdid ir-rwol ewlieni tar-reġjuni u l-bliet fil-ġestjoni tal-infrastruttura b’użu doppju u fl-iżgurar li l-investiment jappoġġja żvilupp reġjonali reżiljenti u bbilanċjat.

F’dibattitu ma’ Riho Terras, Membru tal-Parlament Ewropew u Viċi President tal-Kumitat SEDE, u ma’ rappreżentant mill-Kummissjoni Ewropea, il-membri tal-Grupp ta’ Ħidma ddiskutew l-implimentazzjoni tal-Pakkett dwar il-Mobbiltà Militari tal-UE u enfasizzaw li l-awtoritajiet lokali u reġjonali jaqdu rwol kritiku fid-difiża tal-Ewropa, b’mod partikolari permezz tal-mobbiltà militari u l-infrastruttura b’użu doppju, bħall-portijiet, il-ferroviji u ċ-ċentri loġistiċi, li huma ġestiti fil-livell reġjonali u lokali u li huma fil-qalba tat-tħejjija militari tal-Ewropa. Huma enfasizzaw il-ħtieġa li jitneħħew l-ostakli regolatorji u amministrattivi fil-qsim tal-fruntieri, li jiġu aċċellerati l-proċeduri għall-għoti ta’ permessi għall-infrastruttura strateġika, u li jiġi żgurat l-involviment bikri tar-reġjuni u l-bliet fit-tfassil u l-implimentazzjoni tal-proġetti. Huma fakkru wkoll li l-investimenti fil-mobbiltà militari jipprovdu benefiċċji ċivili diretti billi jsaħħu l-konnettività reġjonali, il-kompetittività ekonomika u l-koeżjoni territorjali. Il-parteċipanti appellaw ukoll għal appoġġ tal-UE aktar b’saħħtu għar-reġjuni tal-fruntiera tal-Lvant u sensibilizzazzjoni akbar fost il-pajjiżi l-aktar ’il bogħod mill-fruntiera Russa.

Il-Grupp ta’ Ħidma enfasizza wkoll li l-appoġġ tal-UE għall-industrija tad-difiża jrid joħloq opportunitajiet tanġibbli fil-livell reġjonali. Politika ta’ difiża effettiva tiddependi fuq l-innovazzjoni reġjonali b’saħħitha, l-involviment tal-SMEs u tan-negozji ġodda, il-kollaborazzjoni mal-universitajiet u ċ-ċentri ta’ riċerka, u l-iżvilupp ta’ teknoloġiji b’użu doppju f’setturi bħall-ajruspazju, il-kura tas-saħħa, il-mobbiltà, u t-teknoloġija diġitali. Il-mexxejja enfasizzaw il-ħtieġa għal diversifikazzjoni, effetti konsegwenzjali ċivili, u reżiljenza reġjonali fit-tul biex tiġi evitata dipendenza żejda fuq id-difiża u ppromwovew aċċess aktar faċli għall-finanzjament, servizzi ta’ konsulenza msaħħa għall-awtoritajiet lokali u l-SMEs, u allinjament imtejjeb bejn il-programmi ta’ finanzjament tal-UE u l-pjanijiet ta’ investiment reġjonali. Fl-aħħar nett, ġiet enfasizzata l-importanza li jiġu stabbiliti ekosistemi li jlaqqgħu flimkien l-awtoritajiet reġjonali u r-raggruppamenti bil-għan li jiġu kondiviżi l-aħjar prattiki, bħan-Network Ewropew tar-reġjuni relatati mad-Difiża. 

Kwotazzjonijiet: 

Fernando López Miras (ES/PPE), President tar-reġjun ta' Murcia u President tal-Grupp ta' Ħidma: “Ir-reġjuni u l-bliet huma lesti li jikkontribwixxu għall-Pjan Direzzjonali tal-UE għat-Trasformazzjoni tal-Industrija tad-Difiża u jżidu t-tħejjija għad-difiża tal-Ewropa: l-appoġġ u l-aċċellerazzjoni tal-kapaċitajiet u t-teknoloġiji industrijali, il-ħiliet, u t-talent u l-konnettività aktar fluwida u l-kapaċità loġistika, u l-espansjoni tal-ekosistema tad-difiża b’atturi ġodda.” 

Riho Terras (ET/PPE), Membru tal-Parlament Ewropew u Viċi President tal-Kumitat SEDE: “Il-gwerra fl-Ukrajna għallmitna kemm hija importanti r-reżiljenza tas-soċjetà quddiem il-gwerra u kriżijiet oħra. Sabiex inkunu nistgħu nitkellmu dwar ir-reżiljenza funzjonali, jeħtieġ li napplikaw għarfien espert minn oqsma differenti. Il-gvernijiet lokali u r-reġjuni għandhom rwol ta’ koordinazzjoni importanti ħafna biex ilaħħqu mal-kriżijiet. Dan ir-rwol jeħtieġ li jiġi aġġornat u mħarreġ b’mod kostanti.”

Sfond

• Filmat tal-laqgħa.

• Il-Grupp ta’ Ħidma dwar id-Difiża (WG Difiża) ġie stabbilit fl-1 ta’ April 2025 mill-Bureau tal-Kumitat Ewropew tar-Reġjuni, biex jirrifletti dwar u jippromovi l-kontribut tal-awtoritajiet lokali u reġjonali għall-arkitettura tas-sigurtà u d-difiża li qed tevolvi tal-Unjoni Ewropea. L-ewwel laqgħa saret fit-22 ta' Settembru, li mmarkat it-tnedija tal-ħidma tal-Grupp ta' Ħidma.

• L-istabbiliment tal-Grupp ta’ Ħidma dwar id-Difiża jsegwi sejħiet mill-Kunsill Ewropew għall-Ewropa biex tieħu responsabbiltà akbar għas-sigurtà tagħha stess wara l-gwerra ta’ aggressjoni tar-Russja li għaddejja kontra l-Ukrajna u t-theddid ibridu li qed jiżdied. Il-Grupp ta’ Ħidma jaġixxi bħala pjattaforma għall-kooperazzjoni interistituzzjonali mal-Kumitat għas-Sigurtà u d-Difiża (SEDE) tal-Parlament Ewropew, il-Grupp tal-Proġett tal-Kummissjoni Ewropea dwar id-Difiża, il-Grupp tal-Bank Ewropew tal-Investiment (BEI) u speċifikament l-Uffiċċju tas-Sigurtà u d-Difiża tiegħu, u sħab istituzzjonali u territorjali oħra.   

• F’Novembru 2025, il-Kummissjoni Ewropea u r-Rappreżentant Għoli għall-Affarijiet Barranin u l-Politika ta’ Sigurtà ppreżentaw il-Pakkett dwar il-Mobbiltà Militari, li għandu l-għan li jiżgura l-moviment bla xkiel ta’ truppi, tagħmir u assi militari madwar l-UE. Il-Pakkett jikkonsisti fi proposta għal regolament u komunikazzjoni konġunta li toffri sett komprensiv ta’ miżuri biex jiġi żgurat il-moviment rapidu, ikkoordinat u sigur ta’ persunal u tagħmir militari madwar l-Unjoni Ewropea. Dan isaħħaħ il-pożizzjoni tad-difiża tal-Ewropa billi jindirizza l-ostakli għall-mobbiltà militari fid-dimensjonijiet kollha - regolatorji, tal-infrastruttura u tal-kapaċitajiet - li bħalissa jnaqqsu r-ritmu tat-trasport militari bejn il-fruntieri. 

• Id-Direttorat Ġenerali tal-Kummissjoni Ewropea għad-Difiża, l-Industrija u l-Ispazju (DEFIS) stabbilixxa n-Network Ewropew ta’ Reġjuni Relatati mad-Difiża (ENDR) li jlaqqa’ flimkien reġjuni u organizzazzjonijiet u raggruppamenti reġjonali fis-settur tas-sigurtà u d-difiża.