Il-mexxejja lokali u reġjonali jwissu kontra l-enfasi fuq terminu qasir fit-tfassil tal-politika tal-UE u jħeġġu aktar investiment f’futur ġust għall-ġenerazzjonijiet iżgħar

Il-mexxejja lokali u reġjonali appellaw biex iż-żgħażagħ u l-ġenerazzjonijiet futuri jiġu protetti aħjar mill-konsegwenzi tal-għażliet politiċi li jagħtu prijorità lill-interessi fuq terminu qasir fuq is-sostenibbiltà fit-tul, u biex tingħata aktar attenzjoni biex jiġi żgurat li l-azzjonijiet tal-lum ma jsirux piż għada. Dan huwa l-messaġġ ewlieni mwassal mill-bliet u r-reġjuni f’Opinjoni adottata fit-2 ta’ Lulju fis-sessjoni plenarja tal-Kumitat Ewropew tar-Reġjuni (KtR). 

Fl-Opinjoni mmexxija minn Tine Radinja (SI/Ħodor), Sindku ta’ Škofja Loka, il-mexxejja lokali u reġjonali jħeġġu lill-Unjoni Ewropea tqiegħed il-ġustizzja interġenerazzjonali u perspettiva taż-żgħażagħ fil-qalba tat-tfassil tal-politika tagħha. Huma appellaw biex il-politiki fit-tul u validi għall-futur dwar il-finanzi pubbliċi, il-protezzjoni ambjentali, u l-kura soċjali għall-ġenerazzjonijiet attwali u futuri jirnexxu, filwaqt li enfasizzaw li r-reazzjonijiet għall-isfidi soċjali u ambjentali tal-lum ma jridux jikkompromettu d-drittijiet, il-benesseri u l-opportunitajiet tal-ġenerazzjonijiet futuri.

Il-bliet u r-reġjuni ddikjaraw li l-bini ta’ futur ġust u sostenibbli għall-ġenerazzjonijiet kollha huwa responsabbiltà kondiviża li trid tinkludi l-livelli kollha ta’ governanza. Huma enfasizzaw ir-rwol ewlieni tal-awtoritajiet lokali u reġjonali fil-ħolqien ta’ komunitajiet inklużivi u sostenibbli billi jinvolvu lit-tfal u liż-żgħażagħ fit-teħid ta’ deċiżjonijiet lokali. F’dan ir-rigward, il-KtR fakkar fir-rakkomandazzjoni tiegħu fl-Opinjoni dwar “Il-Futurtal-Politika dwar iż-Żgħażagħ fl-UE”, fejn stieden lill-Istati Membri jikkunsidraw serjament li jnaqqsu l-età tal-vot għal 16-il sena għall-elezzjonijiet lokali u reġjonali. Il-membri appellaw għal kontribut attiv għall-istrateġija Ewropea li jmiss dwar il-ġustizzja interġenerazzjonali, ħeġġew l-adozzjoni ta' Dikjarazzjoni Interistituzzjonali dwar l-IGF, u rrakkomandaw qafas legali biex jiġu ssalvagwardjati d-drittijiet tal-ġenerazzjonijiet futuri.

Il-KtR enfasizza li l-indirizzar tal-inugwaljanzi soċjoekonomiċi strutturali li jaffettwaw b’mod sproporzjonat lill-komunitajiet emarġinati, inklużi n-nisa, il-migranti, u l-persuni li jgħixu fil-faqar, huwa vitali sabiex jinkiseb IGF sostenibbli u jintemmu ċ-ċikli tal-faqar interġenerazzjonali fit-tul. Dan jinkludi t-tfassil ta’ politiki inklużivi dwar iż-żgħażagħ imfassla għar-realtajiet rurali u ż-żoni periferiċi, azzjonijiet immirati għaż-żgħażagħ barra mill-edukazzjoni, impjieg jew taħriġ (NEET), u aċċess aħjar għall-protezzjoni soċjali għal dawk f’sitwazzjonijiet vulnerabbli. 

Il-membri enfasizzaw li politiki ekonomikament sodi u sostenibbli huma kruċjali għall-kisba tal-IGF, u appellaw għal orjentazzjoni mill-ġdid tal-prijoritajiet tal-kompetittività tal-Ewropa biex tiġi żgurata l-prosperità fit-tul. Il-miżuri ewlenin jinkludu mudell ekonomiku tal-UE li jirrifletti l-ġustizzja interġenerazzjonali, l-użu ta’ indikaturi alternattivi għall-PDG, bħall-Indiċi tal-Progress Soċjali, biex titkejjel is-sostenibbiltà ekonomika, ir-riforma tal-pensjonijiet biex jiġi żgurat bilanċ interġenerazzjonali ġust, u sistema tat-taxxa sostenibbli u ekwa li tqis l-impatt tagħha fuq iż-żgħażagħ.

Fl-aħħar nett, il-mexxejja lokali u reġjonali kienu favur l-użu sistematiku ta’ għodod ta’ prospettiva fil-livelli kollha ta’ governanza biex jinfurmaw it-tfassil tal-politika u l-ippjanar strateġiku, filwaqt li jiżguraw li l-ħtiġijiet tal-ġenerazzjonijiet futuri jiġu kkunsidrati b’mod sistematiku fit-tfassil tal-politika. Huma appoġġaw ukoll l-introduzzjoni ta' "test tal-politika dwar iż-żgħażagħ", biex jiġi vvalutat kif il-miżuri jaffettwaw liż-żgħażagħ illum u fil-futur. 

Kwotazzjoni: 

Ir-relatur Tine Radinja (SI/Ħodor), Sindku tal-Muniċipalità ta’ Škofja Loka: “X’tip ta’ legat inħallu jekk ma nqisux l-ilħna tal-futur? Il-ġustizzja interġenerazzjonali hija l-wegħda tagħna għal għada — impenn kuraġġuż biex nagħtu s-setgħa liż-żgħażagħ, nissalvagwardjaw id-drittijiet tal-ġenerazzjonijiet futuri, u nibnu dinja ġusta u sostenibbli fejn kulħadd jista’ jirnexxi, mhux biss jgħix.”

Sfond:

 Vidjow u ritratti mis-sessjoni.

 Kuntatt

Isem: Ângela Machado

Tel: +32 475 41 31 58

Angela.machado@cor.europa.eu