Il-Politika ta' Koeżjoni: il-mexxejja lokali u reġjonali ddiskutew mal-Viċi President Eżekuttiv Fitto prijoritajiet ġodda u miżuri ta’ flessibbiltà

Il-Viċi President Eżekuttiv tal-Kummissjoni Ewropea Fitto ngħaqad mal-plenarja tal-Kumitat Ewropew tar-Reġjuni (KtR) biex jippreżenta l-proposti reċenti għar-rieżami ta’ nofs it-terminu tal-Politika ta’ Koeżjoni. Il-membri laqgħu l-fatt li l-Kummissjoni Ewropea rrikonoxxiet il-ħtieġa li jiġu appoġġjati r-reġjuni tal-UE li qed jiffaċċjaw prijoritajiet eżistenti kif ukoll ġodda, bħall-kriżi tal-akkomodazzjoni u r-reżiljenza tal-ilma. Madankollu, tqajjem tħassib speċjalment dwar il-piż amministrattiv addizzjonali possibbli tal-eżerċizzju ta’ riprogrammazzjoni, u r-riskju li l-Politika ta’ Koeżjoni tiġi ddevjata mill-objettivi fit-tul tagħha. Il-mexxejja lokali u reġjonali tennew ukoll l-oppożizzjoni tagħhom għal kwalunkwe tentattiv biex tiġi ċċentralizzata l-Politika ta’ Koeżjoni.

Eżatt wara l-preżentazzjoni uffiċjali lill-Parlament Ewropew aktar kmieni din il-ġimgħa, fit-3 ta’ April il-Viċi President Eżekuttiv Raffaele Fitto ppreżenta lill-mexxejja lokali u reġjonali tal-UE l-proposti ewlenin inklużi fir-rieżami ta’ nofs it-terminu tal-programmi tal-Politika ta’ Koeżjoni. Il-membri tal-KtR laqgħu l-ftuħ tal-Kummissarju għad-djalogu u l-impenn tiegħu dwar ir-rispett tal-prinċipji ewlenin tal-Politika ta’ Koeżjoni bħall-approċċ ibbażat fuq il-post, il-prinċipju tas-sħubija u l-governanza f’diversi livelli. L-iskambju tal-lum jagħti bidu għall-ħidma tal-KtR biex jivvaluta u jtejjeb il-proposti, li jagħtu l-possibbiltà – fuq bażi volontarja – li r-riżorsi tal-Politika ta’ Koeżjoni jiġu diretti mill-ġdid lejn 5 prijoritajiet: il-kompetittività, id-difiża, l-akkomodazzjoni affordabbli, ir-reżiljenza tal-ilma u t-tranżizzjoni tal-enerġija.  

Inżommu l-Politika ta’ Koeżjoni bħala għodda ta’ investiment fit-tul

Id-dibattitu enfasizza l-apprezzament tal-membri għall-possibbiltà li l-investiment jiġi dirett mill-ġdid b’mod partikolari lejn l-akkomodazzjoni, ir-reżiljenza u s-sigurtà tal-ilma, għalkemm – huma wissew – dan ma jistax jipperikola n-natura tal-Politika ta’ Koeżjoni bħala politika ta’ investiment fit-tul. L-eżerċizzju ta' riprogrammazzjoni jista' jimplika piż amministrattiv u kumplessità - argumentaw membri oħra - filwaqt li l-istabbiltà u l-prevedibbiltà regolatorji huma essenzjali għat-twettiq rapidu u effettiv tal-Politika ta' Koeżjoni. Barra minn hekk, ġew espressi dubji dwar l-impatt potenzjali fuq id-disparitajiet territorjali tal-ftuħ tal-finanzjament tal-Politika ta’ Koeżjoni għal kumpaniji kbar. L-enfasi ewlenija, enfasizzata fid-dibattitu, għandha tinżamm fuq l-appoġġ għall-SMEs. Tqajjem tħassib ukoll dwar effett kollaterali possibbli ta’ rata ta’ finanzjament tal-UE ta’ 100 % fuq il-prijoritajiet ta’ politika diġà pprogrammati.  

Kwotazzjonijiet

Kata Tüttő, President tal-Kumitat Ewropew tar-Reġjuni: “Il-flessibbiltà proposta hija opportunità. Jeħtieġ li nħarsu lejn din il-proposta bil-ħġieġ ta’ ottimist. Jien nara l-akkomodazzjoni u prijoritajiet kruċjali oħra bħala r-reżiljenza tal-ilma u tal-enerġija, it-tħejjija bħala kruċjali għall-UE. Nafu li x-xitan jinsab fid-dettalji, iżda issa huwa f’idejn ir-reġjuni u l-bliet li jiddeċiedu dwar l-użu tal-opportunità. Dan jinkludi wkoll l-użu tal-libertà li ma jiġux modifikati l-pjanijiet ta’ investiment attwali jekk ikunu tajbin u effettivi. Iżda dawk li jeħtieġu jadattaw u jużaw il-flessibbiltà issa għandhom is-setgħa u l-appoġġ biex jagħmlu dan.” 

Raffaele Fitto, Viċi President Eżekuttiv tal-Kummissjoni Ewropea: “Din il-proposta għandha l-għan li tiżgura li l-Politika ta’ Koeżjoni tibqa’ mhux biss effettiva iżda adattata għal sfidi u realtajiet bla preċedent fil-prattika. Qed nagħtu lill-Istati Membri u lir-reġjuni l-opportunità li jonfqu f’oqsma speċifiċi ġodda. Din hija għażla volontarja, u jien impenjat li niddefendi l-prinċipji ewlenin tal-Politika ta’ Koeżjoni, li se tibqa’ komponent fundamentali tal-baġit fit-tul tal-UE wara l-2027. Aħna “Tim ta’ Koeżjoni” u rridu ningħaqdu flimkien biex nimmodernizzaw il-Politika ta’ Koeżjoni, flimkien.”

Juanma Moreno, l-Ewwel Viċi President tal-KtR, ikkummenta: “L-objettiv ma jistax ikun li jitqajmu dubji dwar il-Politika ta’ Koeżjoni jew li din tintuża għal skopijiet oħra. Fi kwalunkwe każ, dan ir-rieżami jista’ jservi bħala opportunità biex tiġi aġġornata l-Politika ta’ Koeżjoni fid-dawl ta’ ħtiġijiet u prijoritajiet ġodda u biex jiġu żgurati riżorsi addizzjonali għaliha. Id-difiża, l-akkomodazzjoni affordabbli, ir-reżiljenza tal-ilma, it-tranżizzjoni tal-enerġija, u d-dekarbonizzazzjoni, kif proposti mill-Kummissjoni, huma kollha kwistjonijiet rilevanti. Huwa dwar l-irkupru tal-kompetittività tal-UE.”

Il-kuntest

• Filmat u ritratti mid-dibattitu.
• Matul is-sessjoni plenarja tal-20-21 ta’ Novembru, il-Kumitat Ewropew tar-Reġjuni adotta pakkett ta’ Opinjonijiet li jiddefinixxu l-elementi kostitwenti tal-Politika ta’ Koeżjoni wara l-2027. Stqarrija għall-istampa.
• Il-Politika ta’ Koeżjoni b’valur ta’ kważi EUR 370 biljun ta’ fondi tal-UE fil-perjodu ta’ programmazzjoni attwali 2021-2027, jew terz tal-baġit fit-tul tal-UE.

Il-Kuntatt

Matteo Miglietta
Tel. +32 470895382
Matteo.Miglietta@cor.europa.eu